Kæru foreldrar og forráðamenn nemenda.
Nú er fyrstu skólavikunni lokið og hún gekk mjög vel. Krakkarnir hafa almennt verið jákvæðir og þau hafa verið mjög vinnusöm í kennslustundum.
Nemendur fengu verkefni í íslensku og stærðfræði til að meta hvar þau eru stödd í námsgreinunum og hefst vinnan samkvæmt því mati. Í vetur munum við svo taka stöðumat á nokkurra vikna fresti.
Veðrið, var námsefni vikunnar í náttúrufræði og skipting landsins og Vesturland, námsefnið í samfélagsfræði.
Anna Birna sér um að kenna 5.-7. bekk ensku og nemendur eru það áhugasamir að þeir tala ensku í öðrum kennslustundum. Í vikunni voru þau að læra að segja hvað klukkan er.
6. og 7. bekkur læra einnig dönsku og vonandi verða þau jafnáhugasöm um það tungumál.
Heimadæmi hafa verið sett á nýja vefinn, Námfús.is, og skal þeim lokið fyrir mánudag. Flestir nemendur nota Skjatta til að halda áætlun í markmiðum sínum en ef það gleymist þá eru markmiðin á Námfús.
Í vetur verða ekki send út hefðbundin foreldrabréf því nemendur munu sjálfir sjá um að miðla upplýsingum til foreldra á heimasíðu Grunnskólans á Hólmavík. Í hverri viku verða skipaðir 2 umsjónarmenn og eitt af verkefnum þeirra verður að draga saman fréttir vikunnar í máli og myndum.
Að lokum minnum við á að nemendur eiga að skila útfylltum markmiðsblöðum sem fyrst og í framhaldinu verða stutt nemendaviðtöl.
Bestu kveðjur
Sóley Ósk Sigurgeirsdóttir, umsjónarkennari 5. bekkjar.
Lára Jónsdóttir, umsjónarkennari 6. og 7. bekkjar.