Nú hefur verið ákveðin ný dagsetning fyrir Tónaflóð, sem eru fjáröflunartónleikar nemendafélags Grunnskólans á Hólmavík og félagsmiðstöðvarinnar Ozon. Tónleikarnir verða haldnir miðvikudaginn 13. mars og verða nú staðsettir í Bragganum.

Þar munu hljómsveitir skipaðar nemendum úr 5-10 bekk spila valda slagara ásamt hinum og þessum söngvurum sem jafnan setja mikinn svip á viðburðinn. 

Í dag sátu nemendur í 8. - 10. bekk frá grunnskólunum á Hólmavík, Reykhólum og Drangsnesi á vinnufundi um dreifnám. Líflegar umræður voru í vinnuhópunum og margar góðar hugmyndir komu fram. Ljóst er að ungafólkið okkar hefur skarpa sýn á hvað má laga og bæta í samfélaginu og eru þau mjög áhugasöm um stofnun framhaldsdeildar í Strandabyggð. Á vinnufundinum kynnti Þorkell Þorsteinsson, aðstoðarskólameistari FNV, þær námsleiðir sem eru í boði. Framhaldsskólanemarnir Guðrún Helga Magnúsdóttir og Ragnar Bragi Ægisson sögðu frá sinni reynslu af dreifnámi á Hvammstanga og aðstoðuðu í umræðuhópunum.

Kynningarfundur um framhaldsdeild í Strandabyggð verður haldinn í Félagsheimilinu á Hólmavík kl. 18.00  í kvöld og er opinn öllum sem  áhuga hafa á málefninu.

Fjáröflunartónleikum félagsmiðstöðvarinnar Ozon og nemendafélags Grunnskólans sem vera áttu í Félagsheimilinu á Hólmavík sunnudaginn 24. febrúar hefur verið frestað um óákveðinn tíma.

Sundkennsla hefst mánudaginn 18. febrúar og stendur til 24. maí 2013 eða í 13 vikur. Jóhanna Ása mun kenna sund en Árdís Rut verður henni til aðstoðar. 
Fyrst í stað verður sundkennslan einu sinni í viku en eftir páska verður kennt sund í öllum tímum sem merktir eru íþróttir á stundatöflu. 

Kennarar skólans eru nú að undirbúa sig fyrir innleiðingu á nýrri Aðalnámskrá grunnskóla. Eitt af verkefnunum sem kennarar þurfa að huga að eru kennsluhættir og námsmat. Á öskudaginn var starfsdagur kennara sem nýttur var í fræðslu og verkefnavinnu. Jenný Gunnbjörnsdóttir, forstöðumaður miðstöðvar skólaþróunar HA, kom og hélt námskeið um einstaklingsmiðaða kennsluhætti og verður með hópinn í leiðsögn fram á vor. Markmið með vinnu að verkefninu er að kennarar auki við þekkingu sína á einstaklingsmiðuðum kennsluháttum, útbúi kennsluáætlun sem tekur mið af slíkum vinnubrögðum og leggi mat á árangur eigin starfs og nemenda sinna.
 

Lið Grunnskólans á Hólmavík stóð sig mjög vel og að lokinni keppni stóðu liðin jöfn. Þá var útsláttarkeppni en hvort lið þurfti að svara tveimur bjölluspurningum rétt til að vinna keppnina. Eftir mjög harða baráttu stóð lið Grunnskólans á Ísafirði uppi sem sigurvegari. 
Við óskum Ísfirðingum til hamingju með sigurinn og óskum þeim góðs gengis í keppninni. 

Í dag kl.17.30 mun lið Grunnskólans á Hólmavík keppa við lið Grunnskólans á Ísafirði í Spurningakeppni grunnskólanna. Lið skólans var valið eftir spurningakeppni sem haldin var í unglingadeildinni fyrir áramót. Þrír stigahæstu keppendurnir komust áfram en þeir eru, Guðjón Alex í 8. bekk, Sigfrús og Ísak Leví í 9. bekk. Liðstjóri er Trausti Rafn í 8. bekk.
Keppnin er útsláttarkeppni.
Landinu var skipt upp í sjö landshluta en aðeins skráðu tveir skólar sig til keppni á Vestfjörðum, Grunnskólinn á Hólmavík og Grunnskólinn á Ísafirði. Sigurvegarinn á svæðinu kemst í átta liða úrslit. Úrslitaviðureignin verður í beinni útsendingu á RÚV.
Við óskum strákunum góðs gengis.

Í kvöld, fimmtudaginn 31. janúar, fer hin árlega Söngkeppni félagsmiðstöðvarinnar Ozon fram í Grunnskólanum á Hólmavík. Valin verða þau atriði sem fá keppnisrétt í Vestfjarðariðli landshlutakeppni Samfés sem haldin verður á Ísafirði föstudaginn 8. febrúar. Keppnin hefst kl. 18:00 og allir eru hjartanlega velkomnir. Aðgangseyrir fyrir fullorðna er 500 krónur, grunnskólanemar borga kr. 100 en börn undir fimm ára aldri fá frítt inn.

Hólmvíkingar eru hvattir til að mæta á þessa skemmtilegu uppákomu í menningarlífinu og styðja við bakið á söngvurunum og starfsemi félagsmiðstöðvarinnar.

Nemendum grunnskólans er boðið á generalprufu hjá Þorranefndinni kl. 20 í Félagsheimilinu.
Vonumst til að sjá ykkur sem flest
Nefndin

Á morgun miðvikudaginn 16. janúar verður hina árlega íþróttahátíð  nemenda í Grunn- og tónskólanum á Hólmavík. Um morguninn munum flétta íþróttir og hreyfingu inn í skólastarfið t.d. verður haldin keppni í gerð snjóskúlptúra.

Sjálf íþróttahátíðin hefst kl. 18.00 í Íþróttamiðstöðinni á Hólmavík. Þar munu umsjónarkennarar taka á móti nemendum í anddyri og ganga með þeim í salinn þar sem formleg dagskrá hefst.
Dagskrá:
Upphitun í umsjá nemenda í 9. - 10. bekk 
Íþróttamaður ársins 2012 í Strandabyggð heiðraður
1.-3. bekkur trampolín og boðhlaup við foreldra

4. bekkurþrautabraut og brennibolti v ið foreldra
5-7. bekkur  - keiló við foreldra
8. - 10. bekkur - dodgeball við foreldra
10. bekkur - körfubolti við kennara

Nemendafélag skólans verður með samlokur og svala til sölu á vægu verði í anddyrinu (samloka 300 kr., Svali 100 kr.)

Vonumst til að sjá sem flesta