Í morgun héldum við jólaball í leikskólanum. Börnin mættu í sínu fínasta pússi og röðuðu sér í tvo hringi kring um jólatréð og hófu upp raust sína á sama tíma og Siggi Villa sló taktinn á gítarinn. Eftir nokkra stund bárust tónar leikskólabarnanna upp í Borgir og fljótlega létu þeir Þvörusleikir og Kertasnýkir sjá sig í neðri byggðum. Þeir príluðu yfir grindverkið og léku sér í garðinum. Réttara sagt þá reyndu þeir að leika sér, þeir kunnu ekki alveg á leiktækin og stundum var eins og þeir væru frekar áhættuleikarar í hasarmynd heldur en jólasveinar af fjöllum. Börnin höfðu gaman af þessum uppátækjum og buðu þeim svo inn til sín að syngja og dansa. Þeir voru alveg til í að koma innúr frostinu og hlýja sér. Börnin voru óskaplega kurteis og sungu og léku á alls oddi með jólasveinunum. í lok ballsins laumuðust sveinarnir fram og komu inn með pokana sína og gáfu öllum leikskólabörnunum sinn pakkann hverju. Það voru því afskaplega þakklát og glöð börn sem skottuðust í hádegismat á deildinni sinni og fengu jólamat; hangikjöt, kartöflur, uppstúf, baunir, rauðkál og laufabrauð með smjöri.
Í kaffitímanum voru piparkökur sem börnin sjálf höfðu bakað og skreitt fyrr í mánuðinum og kakó sem Reimonda okkar lagaði fyrir okkur.
Svo toppaði nú daginn fyrir þeim þegar byrjaði að snjóa og jólasnjónum kingir nú niður og minnir okkur stór og smá að jólahátíðin er skammt undan.
Frábær dagur í alla staði.
Á föstudaginn verður svo náttfata og kósídagur þar sem við horfum á bíómynd og léttum okkur lundina í jólaundirbúningnum. Það verður fínt að vera með kósidag á föstudag því spáð er miklu frosti.

Næstkomandi sunnudag 30. október nk. standa Barnaheill – Save the Children á Íslandi fyrir símalausum sunnudegi í fjórða sinn. 

Yfirskrift Símalauss Sunnudags er ,,Upplifum ævintýrin saman” og er markmiðið að vekja foreldra og annað fullorðið fólk til umhugsunar um áhrif snjalltækja á samveru og nánd innan fjölskyldna.
Snjallsímar og önnur snjalltæki eru skemmtileg og gagnleg tæki sem hafa umbylt því hvernig við eigum í samskiptum, nálgumst upplýsingar og verjum tíma okkar. Í mörgum tilvikum eru áhrif tækninnar jákvæð og sniðug en einnig hefur verið bent á skuggahliðar hennar. Óhófleg notkun á snjalltækjum getur meðal annars haft áhrif á samskipti innan fjölskyldunnar – samskiptin og nándin minnka því það er eitthvað sem stelur athyglinni.

Hægt er að skrá sig til leiks á www.simalaus.is og taka áskorun Barnaheilla. Allir þátttakendur eiga möguleika á að vinna fjölbreytta og fjölskylduvæna útdráttarvinninga og fá auk þess nokkur góð ráð send í tölvupósti laugardaginn 29. október.  Tökum þátt.

Staða leikskólakennara
Auglýst er staða leikskólakennara, almennt starf á deild. Starfshlutfall er 100% og vinnutíminn frá 8:00-16:00. Æskilegt að viðkomandi geti hafið störf sem fyrst.

Leikskólinn Lækjarbrekka tilheyrir sameinuðum leik-, grunn- og tónskóla í Strandabyggð og starfar samkvæmt lögum og reglugerðum um leikskóla. Uppeldisstefnan er jákvæður agi, skólinn er grænfánaskóli og unnið er að innleiðingu heilsueflandi skóla.

 Menntunar og hæfniskröfur:

• Kennaramenntun, leyfisbréf og hæfni til kennslu í viðeigandi skólagerð

• Góð íslenskukunnátta

• Áhugi, reynsla og hæfni í starfi með börnum

• Jákvæðni, frumkvæði og góður samstarfsvilji

• Lipurð og hæfni í mannlegum samskiptum

• Frumkvæði, sjálfstæði og sveigjanleiki í vinnubrögðum

• Reglusemi og samviskusemi

• Hreint sakavottorð

Laun eru samkvæmt samningum Sambands íslenskra sveitarfélaga og Kennarasambands Íslands.

Umsóknarfrestur er til 15. september 2022.

Hrafnhildur Guðbjörnsdóttir skólastjóri gefur upplýsingar um starfið og tekur á móti umsóknum ásamt ferilskrá, afriti leyfisbréfa og upplýsingum um meðmælendur netfang skolastjori@strandabyggd.is

Leikskólinn Lækjarbrekka verður opnaður klukkan 11, mánudaginn 8. ágúst að loknu sumarleyfi. Vel hefur gengið að manna stöður í skólanum og starfsfólk hlakkar til að hitta börnin og hefja starfið.
Tölvupóstur með nánari upplýsingum hefur verið sendur til foreldra sem við biðjum að láta vita ef börnin verða í fríi áfram eða  einhverja daga.  
Leikskóladagatalið 2022-2023 má finna hér.

Það er líf og fjör í leikskólanum þessa dagana. Sólin skín og sólarvörnin hefur verið brúkuð í nokkur skipti og það er alltaf gleðilegt.
Í dag er hjóladagur í leikskólanum og þá fá börn að koma með hverskyns farartæki á hjólum og leika sér úti í góða veðrinu. Lögreglan á svæðinu kemur og spjallar um öryggi við börnin, allir setja á sig hjálma og hjóla af stað og lögreglan sér um að loka veginum inn á svæðið á meðan.
Eldri börnin hjóla á planinu fyrir framan leikskólann og Braggann en yngri hjóla í garðinum. Öll börnin fá tækifæri til að spjalla við lögregluna og sjá ljósin á löggubilnum blikka.
Hjóladagur er alltaf sérlega skemmtilegur dagur og frábært að sjá að öll börn eiga farartæki á hjólum og hjálm til að nota.
Veðrið leikur líka við okkur í dag sem er frábært því það verður einhvernveginn allt enn betra og skemmtilegra í góðu veðri.

Skólastarf hefst í Leik- grunn- og tónskóla þriðjudaginn 4. janúar 2022. Starfsfólk skólans óskar nemendum og foreldrum gleðilegs nýs árs og þakkar fyrir samstarfið á liðnu ári. 

Núgildandi reglur um skólahald eru þannig:

• Á öllum skólastigum miðast hámarksfjöldi barna/nemenda við 50 einstaklinga í rými.
• Hámarksfjöldi starfsfólks í sama rými eru 20 manns og starfsfólki er heimilt að fara á milli rýma.
• Nálægðarregla: Almennt 2 metra en sé ekki unnt að tryggja 2 metra reglu er grímuskylda. Leikskólabörn eru undanþegin nálægðarreglu.
• Grímuskylda: Almennt er skylt að nota grímu ef ekki er hægt að virða 2 metra regluna. Börn fædd 2006 og síðar eru undanþegin grímuskyldu.

Starfsfólk og foreldrar skulu þannig viðhafa grímuskyldu í fataklefa leikskóla og grunnskóla þar sem ekki er hægt að tryggja 2 metra reglu milli fullorðinna einstaklinga.
Skipulagsdagur starfsfólks verður mánudag 3. janúar og þar verður meðal annars farið yfir sóttvarnarráðstafanir og aðgerðir, til dæmis í kennslu barna sem eru í sóttkví og einangrun og lausnir á mönnun ef starfsfólk fer í sóttkví eða einangrun. Verði vart við einkenni ætti starfsfólk að vera heima og foreldrar að halda börnum heima og panta tíma fyrir covid próf á heilsugæslu.   
Mikil aukning hefur verið í smitum á landinu og við þurfum öll að sýna sérstaka aðgát ekki síst eftir hátíðisdagana og nýleg ferðalög á milli landa og landshluta.

 

Í vikunni var formleg afhending grænfána til skóla í Strandabyggð. Í ár bættist við þriðji skólinn sem fær þessa umhverfisvottun sem grænfáninn er, en það er Vinnuskóli Strandabyggðar. 

Grænfáninn er umhverfisverkefni sem skólar á öllum skólastigum geta tekið þátt í og er helsta innleiðingartæki menntunar til sjálfbærni í heiminum í dag. 

 

Grunn- og tónskólinn á Hólmavík hefur verið í grænfánaverkefninu síðan 2007 og fær nú sinn fimmta fána. Leikskólinn Lækjarbrekka er að fá sinn þriðja fána eftir nokkurt hlé. Þessir tveir skólar voru sameinaðir árið 2020 og munu framvegis vinna sem einn skóli og setja sér sameiginleg þemu og markmið til næstu tveggja ára. Nú þegar hafa umhverfisnefndir skólans ákveðið að annað þemað af tveimur verði lýðheilsa en samtímis er sameinaður skóli að fara í verkefnið „heilsueflandi grunnskóli“ sem Landlæknisembættið stendur fyrir.

Umhverfisnefnd grunnskólans skipulagði samverustund í tilefni afhendingarinnar og var farið upp í skóg.  Hrafnhildur Guðbjörnsdóttir skólastjóri afhenti fulltrúum hvers skóla viðurkenningarspjöld frá Landvernd ásamt grænfánaskiltum sem fest verða utan á húsnæði skólanna. Þá var boðið upp á kakó og piparkökur, farið í leiki fyrir alla aldurshópa og jólasveinarnir létu sig ekki vanta 

Skólar á grænni grein, grænfánaverkefnið er alþjóðlegt umhverfismenntaverkefni sem rekið er af Landvernd á Íslandi. Markmið verkefnisins er að auka umhverfismennt, menntun til sjálfbærni og að styrkja umhverfisstefnur skóla. Verkefnið er stærsta umhverfismenntaverkefni í heimi og er haldið úti af samtökunum Foundation for Environmental Education.

 

Á mánudaginn var gulur dagur í leikskólanum og klæddust börnin fötum í gulum litum í tilefni dagsins.

Á föstudaginn verður svo bleikur dagur í leikskólanum og hvetjum við börn og foreldra til að klæðast bleiku þann dag. Við klæðumst bleiku á föstudag til að heiðra konurnar í okkar lífi sem og að styðja við átaksverkefni Krabbameinsfélagsins sem tileinkað er baráttunni gegn krabbameini hjá konum.

Í tilefni bleika dagsins mun skemmtinefnd sameiginlegs leik-, grunn-, og tónskóla Strandabyggðar hveta starfsfólk skólanna til að klæðast bleiku. Skemmtinefndin mun svo styrkja krabbameinsfélagið um 1000 krónur fyrir hvern starfsmann sem mætir í bleiku þann dag.

Leikskólinn stendur nú fyrir átaksverkefni Lubba. Í átaksverkefninu lesum við bækur í leikskólanum og hvetjum foreldra til að lesa fyrir börnin heima. Fyrir hverja bók sem lesin er fær Lubbi eitt málbein sem hann safnar saman og myndar að lokum þetta fína málbeinafjall.

Átakið stendur yfir til 18. október og því er enn tími til að bæta í beinafjallið. Beinin er hægt að nálgast í leikskólanum og hvet ég foreldra til að taka með sér fleiri bein heim og skila inn á mánudag.
Beinafjöllin eru farin að taka á sig góða mynd og sjá börnin fjallið sitt stækka dag frá degi. 

Hann Ómar Elías okkar varð 5 ára 3. október.

Hann hélt upp á afmælið sitt í leikskólanum með ávaxtaveislu. Hann fékk þessa fínu kórónu og afmælissöng í tilefni dagsins.

Innilegar hamingjuóskir með afmælið þitt elsku Ómar Elías okkar!