Móttökuáætlun nýnema úr leikskólanum Lækjarbrekku

Fimm ára börn úr Leikskólanum Lækjarbrekku í Grunnskólann Hólmavík mæta í allt að 25 kennslustundir á vorönn. Börnin hitta umsjónarkennara yngsta stigs ásamt því að hitta aðra nemendur í frímínútum. Börnin kynnast fleiri kennurum og öðru starfsfólki og borða í grunnskólanum og taka þátt í frístund og fara á íþróttaæfingu hjá Geislanum.

Auk þess mæta leikskólabörn fjögurra og fimm ára í íþróttatíma til íþróttakennara yfir vetrartímann. 

Starfsmaður leikskóla fylgir hópnum og er til taks ef á þarf að halda. Mögulegt er að fara með skólabíl frá leikskóla að grunnskóla viðri þannig og starfsmenn leikskóla sjá um nesti lengri dagana.

Hópurinn tekst á við skóladaginn eins og hann gæti orðið næsta haust og kynnist flestum verkefnum sem tekist er á við á venjulegum skóladegi svo sem íslensku, stærðfræði, matartíma, frímínútum, íþróttum, list- og verkgreinum og frístundastarfi.

Nemendum leikskólans er boðið að taka þátt í sérstökum viðburðum eins og vordegi.

Nemendum í 1. bekk grunnskólans verður boðið í heimsókn í leikskólann og taka þátt í starfi leikskólans úti og inni tvo daga að vori.    

Móttökuáætlun nemenda úr leikskólanum er endurskoðuð í desember/janúar á hverju ári á sameiginlegum fundi skólastjóra leik og grunnskóla, umsjónarkennara í 1. bekk, umsjónarmanni skólahóps og sérkennara.

Leikskólinn sér um að kynna dagskrána fyrir foreldrum barnanna. Sameiginlegur sérkennari leik- og grunnskóla heldur utan um skimanir og greiningar. Í lok maí er skilafundur leikskóla til grunnskóla.

 
Móttökuáætlun nýrra nemenda

Nýir nemendur eru ávallt velkomnir. Lögð er áhersla á að nýir nemendur byrji rólega og á eigin forsendum. Þeir hitta skólastjóra og umsjónarkennara, skoða skólann, fara yfir reglur, skráningu í Mentor og fá stundaskrá.

Mikilvægt er að aðrir nemendur fái tækifæri til að bjóða nýja nemendur velkomna. Umsjónarkennari undirbýr móttökuna með bekknum. Ekki er síst mikilvægt að undirbúa nemendur vel sé nýr nemendi að bætast í hópinn á miðju ári. Nýir nemendur hitta samnemendur í kennslustund(um) og fara í frímínútur, þeir eru boðnir velkomnir af kennara og bekkjarfélögum.

Foreldrar eru velkomnir allan tímann og lögð er áhersla á að miðla upplýsingum til þeirra. Þetta ferli getur átt sér stað á þremur samliggjandi dögum, lengri eða styttri tíma allt eftir þörfum barnsins. Foreldrar eru hafðir með í ráðum á aðlögunartímanum.

Móttökuáætlun nemenda með sérþarfir

Nýir nemendur eru ávallt velkomnir.  Lögð er áhersla á að nýir nemendur með sérþarfir  byrji rólega og á eigin forsendum. Þeir hitta skólastjóra og umsjónarkennara skoða skólann, fara yfir reglur, skráningu í Námfús og fá stundaskrá.

Foreldrar mæta á fund sérkennara og umsjónarkennara þar sem upplýsingum um þarfir nemandans er miðlað. Eftir þann fund gera sérkennari og umsjónarkennari áætlun um fyrirkomulag kennslu og eftir atvikum er stofnað teymi. Sérkennari sér um stofnun teymis og í teyminu sitja foreldrar, umsjónarkennari og sérkennari og eftir atvikum stuðningsfulltrúi, þroskaþjálfi eða félagsmálastjóri. Meta skal aðstæður í skólanum með það í huga að ryðja burt hindrunum hvort sem þær eru náms- félagslegar eða varða aðgengi.

Mikilvægt er að aðrir nemendur fái tækifæri til að bjóða nýja nemendur velkomna. Umsjónarkennari undirbýr móttökuna með nemendahópnum. Nýir nemendur  hitta samnemendur í kennslustund(um) og fara í frímínútur, þeir eru boðnir velkomnir af kennara og bekkjarfélögum.

Foreldrar eru velkomnir allan tímann og lögð er áhersla á að miðla upplýsingum til þeirra. Þetta ferli getur átt sér stað á þremur samliggjandi dögum, lengri eða styttri tíma allt eftir þörfum barnsins. Foreldrar eru hafðir með í ráðum á aðlögunartímanum.

Móttökuáætlun nemenda með annað móðurmál

Nýir nemendur með annað tungumál en íslensku eru velkomnir.  Lögð er áhersla á að nýir nemendur með annað móðurmál en íslensku byrji rólega og á eigin forsendum. Þeir hitta skólastjóra og umsjónarkennara skoða skólann, fara yfir reglur, skráningu í Námfús og fá stundaskrá.

Mikilvægt er að nemendur með annað tungumál en íslensku og nemendur af erlendu bergi brotnir og fái sambærilegar móttökur og aðrir nýir nemendur. Meta skal aðstæður í skólanum með það í huga að ryðja burt hindrunum hvort sem þær eru náms- félagslegar eða varða aðgengi.

Foreldrar mæta á fund sérkennara og umsjónarkennara og sérkennara þar sem upplýsingum um er miðlað. Staða nemanda í íslensku er metin og stuðningur við hann ákveðinn í framhaldi af því. Gerð er áætlun um kennslu í íslensku og eftir atvikum er stofnað teymi.

Mikilvægt er að aðrir nemendur fái tækifæri til að bjóða nýja nemendur velkomna. Umsjónarkennari undirbýr móttökuna með nemendahópnum.  Nýir nemendur hitta samnemendur í kennslustund(um) og fara í frímínútur, þeir eru boðnir velkomnir af kennara og bekkjarfélögum.

Foreldrar eru velkomnir allan tímann og lögð er áhersla á að miðla upplýsingum til þeirra. Þetta ferli getur átt sér stað á þremur samliggjandi dögum, lengri eða styttri tíma allt eftir þörfum barnsins. Foreldrar eru hafðir með í ráðum á aðlögunartímanum.

Öryggisatriði vegna móttöku nýrra nemenda

Góð samskipti foreldra og skóla eru grundvallaratriði þegar tryggja þarf öryggi barna. Þar sem foreldrar og skóli bera sameiginlega ábyrgð á öryggi barnsins á leið í og úr skóla er mikilvægt að kynna fyrir foreldrum hvaða öryggisreglur gilda í skólanum og hvernig heimilið og skólinn geta hjálpast að við að framfylgja þeim til að tryggja börnum hámarksöryggi. Mikilvægt er að setja upplýsingarnar á heimasíðu skólans og fjalla um öryggismál og viðbragðsáætlanir í skólanámskrá.

Eftirfarandi atriði er mikilvægt að kynna fyrir foreldrum nýrra barna við skólann:

• Reglur skólans.

• Aðferðir skólans við að tryggja jákvæðan skólabrag og öryggi nemenda.

• Viðbrögð í skóla ef barn hlýtur minniháttar meiðsli og hvað talin eru minniháttar meiðsli.

• Viðbrögð í skóla ef barn verður fyrir ofbeldi af einhverju tagi innan eða utan skóla eða hlýtur alvarleg meiðsli á skólatíma.

• Upplýsingar um nemanda vegna slysa og bráðaveikinda.

• Tryggingar skólans ef barnið slasast – hver ber kostnað.

• Þeir ferlar sem unnið er eftir þegar slys verður.

• Þeir ferlar sem unnið er eftir í kjölfar slyss.

• Fyrirkomulag öryggismála í skólanum og í öllu starfi hans.

• Örugg aðkoma gangandi og hjólandi barna að skóla.

• Öryggi í akstri skólabíla.

• Örugg aðkoma foreldra sem aka börnum í skóla.

• Öryggi í ferðalögum skólabarna.

• Vinnureglur skólans varðandi ofbeldi og einelti.

• Viðbrögð við náttúruvá – almannavarnir.

• Starf skólahjúkrunarfræðings – skólaheilsugæslu.

• Í upphafi hvers skólaárs er mikilvægt að minna foreldra á ákveðin öryggisatriði svo sem öryggi barna á leið í og úr skóla hvort sem þau ganga, hjóla eða eru keyrð í skólann í einkabíl eða í skólabíl.

Forsjáraðilar nýrra nemenda verða að gefa skólanum grunnupplýsingar um nemanda vegna slysa eða bráðaveikinda.

• Nafn barns.

• Kennitala barns.

• Er barnið með ofnæmi? Nauðsynlegt er að skrá ofnæmi sem vitað er um.

• Er barnið, fatlað eða með greindan sjúkdóm? Mikilvægt er að skrá tegund fötlunar, heiti

• sjúkdóms og nafn læknis sem annast barnið.

• Tekur barnið lyf að staðaldri? Mikilvægt er að skrá heiti lyfs, magn og tímasetningu inntöku.

• Skrá ber nöfn foreldra, heimilisfang, heimasíma farsíma, vinnusíma og vinnustað.

• Nauðsynlegt er að skrá heiti vinnustað og heimilisfang og deild ef um stóran stað er að ræða.

• Skrá þarf nafn á þeim sem hafa á samband við ef ekki næst í foreldra, heimilisfang símanúmer,

• vinnusíma og vinnustað.

• Taka þarf fram ef foreldrar eiga erfitt með að skilja eða tala íslensku og tilgreina móðurmál þeirra.

Nemendur taka á móti nýjum nemendum

Mikilvægt er að nemendur fái tækifæri til að bjóða nýja nemendur velkomna. Umsjónarkennari undirbýr móttökuna með nemendahópnum. Nýir nemendur eru boðnir velkomnir. Nemendur í 1.-10. bekk hafa fjallað um móttöku nýrra nemenda á nemendaþingum og sett upp hugmyndalista um það hvernig taka má vel á móti nýjum nemendum.

Það skiptir máli að:

•  Heilsa og segja nafnið sitt
• Vera góð og vera fyrirmynd
• Sýna skólann og umhverfið
• Fara saman í íþróttir
• Biðja kennara að leyfa okkur að fara í leiki eða spila eða hópefli
• Vinna verkefni saman
• Bjóða með í leik, fótbolta, hjóla og svo framvegis
• Labba saman, hanga saman  
• Bjóða fylgd í félagsmiðstöð 
• Bjóða aðstoð í kennslustund og jafnvel þiggja aðstoð 
• Spyrja um áhugamál, við gætum átt eitthvað sameiginlegt
• Bjóða heim í tölvuleik eða horfa á mynd saman
• Sýna staðinn okkar og segja hvað hægt er að gera
• Passi að nýi nemandinn lendi ekki í vandræðum af því að hann kann ekki reglurnar
• Sýna virðingu þó nýir nemendur hagi sér ekki alveg eins og við eða séu á einhvern hátt öðruvísi. 
• Það er mikilvægt að tilheyra hópnum
• Ekki gefast upp, munum að fólk er fjölbreytilegt og enginn er nákvæmlega eins og einhver annar, ekki við heldur 
• Við getum öll lent í því að vera nýi nemandinn einhvers staðar

Uppfært maí 2025