Sunna Karítas Oktavía Torfhildur Tildurrófa Aðaldal ræður ríkjum í Stundinni okkar sem sýnd er á RÚV alla sunnudaga. En hún er nú bara oftast kölluð Skotta. Skotta býr í Álfheimunum ásamt Rósenberg sem er virðulegt heldra skoffín. Í síðustu viku kom Stundin okkar til að taka upp hér á Hólmavík. Umsjónarmaður er Margrét Sverrisdóttir og handritshöfundur ásamt henni Oddur Bjarni Þorkelsson. Þau fylgdu nemendum í 3. bekk eftir, heimsóttu Galdrasýninguna, fóru í vettvangsferð um Hólmavík, heimsóttu skólann og leikskólann Lækjarbrekku, ræddu við nemendur í Tónskólanum og tóku upp nokkur lög með þeim. Það var mikil spenna og tilhlökkun í nemendahópnum sem skemmti sér afar vel við að taka þátt í þessu líflega verkefni. Efnið frá Hólmavík verður unnið og klippt niður og sýnt sem stutt innslög í Stundinni okkar í vetur. Við þökkum Stundinni okkar kærlega fyrir komuna og hlökkum til að fylgjast með sjónvarpsstjörnunum okkar á skjánum.

Nú er skólinn okkar skráður í Lífshlaupið sem er heilsu- og hvatningarverkefni ÍSÍ fyrir alla aldurshópa. Í fyrra lentum við í Grunnskólanum á Hólmavík í 2. sæti í okkar flokki en keppnin virkar þannig að landsmenn eru hvattir til þess að huga að sinni daglegri hreyfingu og auka hana eins og kostur er þ.e. í frítíma, heimilisverkum, vinnu, skóla og við val á ferðamáta.

Lýðheilsustöð ráðleggur börnum og unglingum að hreyfa sig í minnst 60 mínútur á dag og fullorðnum í minnst 30 mínútur á dag.

Til þess að fá stig í Lífshlaupinu gerir þú eftirfarandi:
- Ferð inn á www.lifshlaupid.is
- Efst hægra megin ferðu í innskráning og skráir inn netfangið: grunnskolinn@holmavik.is og lykilorðið: holmavik
- Þá skoðar þú valmöguleikana á ljósbláa svæðinu vinstra megin og velur ,,skólinn minn"
- Þá smellir þú á bekkinn þinn, smellir á ,,skrá/breyta stigum" og skráir hreyfinguna fyrir hvern dag. Ath. að aðeins er hægt að skrá tíu daga aftur í tímann.

Hér má nálgast nákvæmari leiðbeiningar.

KOMA SVO KRAKKAR :o)

Við vorum að senda frá okkur febrúardagskrá Skólaskjóls sem er eins og sjá má full af skemmtilegheitum, leikjum og spilum. Það eru þau Alda og Steinar Ingi hafa skipulagt dagskrána og halda utan um starfið í Skjólinu með hressum krökkum í 1.-4. bekk sem eru nú tólf þegar þau eru flest. Skólaskjólið hefst að loknum skóladegi kl. 14:00 og snæða krakkarnir léttar veitingar og hressingu í kaffitímanum. Að loknum kaffitíma er stefnt að því að fara út að leika alla daga ef veður leyfir. Það hefur verið líflegt og skemmtilegt að fylgjast með þeim hoppa og skoppa um gangana í janúar í ýmsum furðuklæðum, fataleik, hópleikjum, á dótadaginn og á hinum sívinsæla bíódegi þar sem allir fá popp og djús. Hér má sjá febrúardagskrá Skólaskjóls.

Á morgun, þann 1. febrúar, hefst Lífshlaupið sem er heilsu- og hvatningarverkefni ÍSÍ fyrir alla aldurshópa. Í fyrra lentum við í Grunnskólanum á Hólmavík í 2. sæti í okkar flokki en keppnin virkar þannig að landsmenn eru hvattir til þess að huga að sinni daglegri hreyfingu og auka hana eins og kostur er þ.e. í frítíma, heimilisverkum, vinnu, skóla og við val á ferðamáta.

Lýðheilsustöð ráðleggur börnum og unglingum að hreyfa sig í minnst 60 mínútur á dag og fullorðnum í minnst 30 mínútur á dag. Inn á vef Lífshlaupsins er hægt að velja um þrjár leiðir til að taka þátt í Lífshlaupinu: Ef þú ert 15 ára og yngri getur þú tekið þátt í hvatningarverkefni fyrir grunnskóla. Ef þú ert 16 ára og eldri getur þú tekið þátt í vinnustaðakeppni. Allir geta tekið þátt í einstaklingskeppni þar sem þátttakendur geta skráð niður sína daglegu hreyfingu allt árið. Hægt er að fylgjast með fjölda þátttakenda, fjölda liða og með þeim árangri sem þátttakendur ná í hverju sveitarfélagi fyrir sig með því að smella á Staðan vinstra megin á vef Lífshlaupsins http://lifshlaupid.is/ en þar má einnig nálgast ítarlegri upplýsingar um hvatningarleikinn þar sem grunnskólanemendur eru hvattir til þess að ná að hreyfa sig alla daga meðan á leiknum stendur í samræmi við ráðleggingar um hreyfingu.

Nemendur í 6. og 7. bekk dvelja nú í góðu yfirlæti í Reykjaskóla og vinna þar að mjög fjölbreyttum viðfangsefnum, íþróttum og leikjum, umhverfisfræðslu, náttúrufræði. Hver hópur fer einu sinni í heimsókn í Byggðasafn Strandamanna og Húnvetninga en hápunktur þeirrar ferðar er svo við Hákarlaskipið Ófeig þar sem fólki gefst kostur á að sanna hreysti sína með hákarlsáti. Það hefur sýnt sig að nemendur af Ströndum hafa ævinlega staðið sig betur en aðrir í þessari íþróttagrein. Í gær hélt Trausti Rafn upp á 13 ára afmælið sitt í skólabúðunum og af því tilefni stóðu allir upp í hádegishlénu og sungu afmælissönginn fyrir hann og var boðið upp á gómsæta snúða um kvöldið. 

Í morgun var bjart, kalt og svolítill vindur hjá þeim. Nú njóta þau síðustu stundanna í Hrútafirðinum og það sem liggur fyrir er m.a. hópmyndataka, valfrjáls tími og hárgreiðslukeppni. Að sögn Hafnhildar Guðjörnsdóttur eru allir eru hraustir og hressir og hafa staðið sig gríðarlega vel. Á morgun heldur hópurinn okkar svo heim á leið eftir góða dvöl í Reykjaskóla með nemendum úr Kársnesskóla í Kópavogi, Brekkuskóla á Akureyri og Grunnskólanum á Drangsnesi. Ítarlegari fréttir frá hópnum okkar má lesa með því að smella hér og hér má skoða skemmtilegar myndir.

Vinsamlega athugið að skólastarf í Grunnskólanum á Hólmavík fellur niður í dag, fimmtudaginn 26. janúar, vegna ófærðar og veðurútlits. Þessi ákvörðun var tekin að vel athuguðu máli og í samráði við þá sem sjá um snjómokstur í sveitarfélaginu með hagsmuni nemenda að leiðarljósi. Settar hafa verið inn tilkynningar í morgunútvarp Rásar 2 og fréttatíma útvarpsins eftir kl. 7.15. Einnig er sett tilkynning inn á vef skólans og síðu Strandabyggðar á Facebook. Öllum er velkomið að hafa samband við okkur símleiðis ef einhverjar spurningar vakna í gsm Bjarna Ómars 892-4666 eða gsm Hildar 661-2010.

Skólastjórar Grunnskólans á Hólmavík.

Skákdagur Íslands verður haldinn í fyrsta sinn á morgun, fimmtudaginn 26. janúar. Skákdagurinn er haldinn til heiðurs Friðrik Ólafssyni, fyrsta stórmeistara Íslendinga, en Friðrik verður 77 ára þennan dag og tekur virkan þátt í hátíðahöldum. Þetta kemur fram í tilkynningu frá Skáksambandi Íslands. Til að heiðra Friðrik mun forseti Íslands, Ólafur Ragnar Grímsson, halda móttöku á Bessastöðum. Á meðal annarra gesta verða þau börn sem í febrúar tefla fyrir Íslands hönd á Norðurlandamóti barna og mun Friðrik tefla við Nansý Davíðsdóttur, 10 ára, sem er nýkrýndur Íslandsmeistari barna, fyrst stúlkna á Íslandi. Að Skákdeginum standa Skáksamband Íslands, Skákakademía Reykjavíkur, Skákskóli Íslands og taflfélög um allt land, í samvinnu við skóla, íþróttafélög, sveitarfélög, fyrirtæki og einstaklinga. Markmiðið er að heiðra Friðrik Ólafsson, fyrir einstakt framlag til samfélags okkar í heild og skákarinnar sérstaklega, jafnframt því að sýna þá grósku sem er í íslensku skáklífi um allt land.

Við munum halda Skákdag Íslands hátíðlegan hér í Grunnskólanum á Hólmavík og bjóða upp á stutta kennslu í skák í öllum bekkjardeildum í samvinnu við nemendur í 8. bekk. Síðar mun Jón Kristinsson, stórbóndi á Klúku og fyrrverandi skákmeistari m.a. Skákmeistari Reykjavíkur 1973 (nánar um það hér) heimsækja skólann og bjóða nemendum í fjöltefli. Jón ætlaði að koma til okkar á morgun en vegna veðurs var ákveðið að fresta heimsókninni í bili. Jón færði skólanum bókagjöf sem nýtist vel til þess að fræða nemendur um skáklistina eða sem geta nýst sem verðlaun eða viðurkenning í skákstarfi innan skólans. Þess má geta að í starfsmannahópnum okkar er fyrrverandi skákmeistari Grunnskólans á Hólmavík en það er hann Kolbeinn Skagfjörð Jósteinsson.

Vitað er að holl næring skiptir miklu máli fyrir árangur og vellíðan barna og ungmenna í leik og starfi. Mörg börn hafa lítinn tíma til að borða á morgnana áður en þau fara í skólann, eða eru jafnvel lystarlaus og koma engu niður. Morgunverðurinn er þó almennt talinn til mikilvægustu máltíða dagsins og börn sem ekki nærast vel að morgni dags skortir oft úthald og einbeitingu í amstri skóladagsins. Hollt og gott nesti er mikilvægt því flestir eru aftur orðnir svangir þegar líður á morguninn.

Í umhverfissáttmála skólans, sem er liður í Grænfánaverkefninu, er lögð áhersla á hollt og gott nesti. Mikilvægt er að hafa fjölbreytnina í fyrirrúmi og prófa reglulega eitthvað nýtt – gjarnan í samráði við börnin. Flestur matur er hollur ef gætt er að hæfilegum skammtastærðum, samsetningu máltíða og fjölbreyttu fæðuvali. Öllum nemendum gefst kostur á að fá léttmjólk að drekka í nestistíma og hafa aðgang að grillum og örbylgjuofni í matarhléi. Á vef Lýðheilsustöðvar má sjá ýmsar hugmyndir og lesa um þessi mál.

Næstu vikuna, dagana 23.-27. janúar, fara nemendur 6. og 7. bekkjar í skólabúðirnar að Reykjum í Hrútafirði. Nemendum grunnskóla víðsvegar að af landinu gefst kostur á að dvelja í skólabúðunum, vikutíma í senn við nám, leik og störf. Starfið beinast að sömu markmiðum og starfið í almennum grunnskólum. Í skólabúðunm er lögð sérstök áhersla á að auka samstöðu og efla samvinnu milli kennara og nemenda, að auka félagslega aðlögun nemenda, að þroska sjálfstæði nemenda, að nemendur fáist við áður óþekkt viðfangsefni, að nemendur kynnist nýju umhverfi og ólíkum lífsmáta, að örva löngun nemenda til að athuga og rannsaka umhverfið og komast að niðurstöðu og að auka athyglisgáfu nemenda.

Mikil tilhlökkun og gleði var í hópnum í dag og er það Hrafnhildur Guðbjörnsdóttir sem fer með hópinn á mánudaginn. Viðfangsefni eins og bátsferðir, heimsókn á Byggðasafnið, að dvelja á heimavistinni, þátttaka í íþróttum, náttúrufræðiathugunum, fjármálafræðslu og síðast en ekki síst kvöldvökunum er krökkunum mikið tilhlökkunarefni.

Tilraunir í kennslu er frábær aðferð til að prófa veruleikann í þeim tilgangi að skýra einhverja þætti hans. í 3. bekk fengu börnin á dögunum að fá að sjá og upplifa á áþreifanlegan hátt hvernig hringrás vatns getur verið. Hvernig vatn umbreytist í ís, bráðnar við hita og gufar svo upp og rennur niður sem vatn. Þær Kristjana og Árný Huld fengu Borgar tónlistarkennara í lið við sig sem sýndi tilraunina við mikla undrun og hrifningu viðstaddra. Hér má sjá skemmtilegar og lærdómsríkar myndir frá ferlinu.