Verslun á Hólmavík
Þann 3. janúar 1890 varð Hólmavík löggiltur verslunarstaður, en frá miðri 19. öld hafði verið verslað um borð í skipum kaupmanna sem sigldu á Skeljavík, svokallaðra spekúlanta.
Sumarið 1894 auglýsti kaupmaðurinn R.P. Riis sem hafði haft mest umsvif við verslun í Skeljavík að hann myndi ekki sigla þangað oftar og var þá gengið í að fá kaupmann til að hefja verslun á Hólmavík. Haustið 1895 var mæld út lóð og sama ár hóf Björn Sigurðsson, kaupmaður í Skarðsstöð á Skarðsströnd í Dalasýslu, verslun í bráðabirðaskúr sem var hvort tveggja verslun og vörugeymsla. Skúrinn var kallaður Langiskúr og var rifinn um 1950.
Sama haust lét Riis mæla út byggingarlóð á Hólmavík og Björn seldi honum verslunina í byrjun næsta árs. Næstu sumur var aðeins verslað yfir sumartímann en Riis lét síðan byggja vandað timburhús sem var allt í senn sölubúð, skrifstofa og íbúð handa verslunarstjóra árið 1897. Riis-húsið var hið glæsilegasta og stendur enn, þar er nú rekinn veitingarstaðurinn Café Riis. Eftir þetta var fastaverslun á Hólmavík.
Verslunarfélag Steingrímsfjarðar, sem var forveri Kaupfélagsins, var svo stofnað 29. desember 1898. Guðjón Guðlaugsson alþingismaður og bóndi á Ljúfustöðum í Kollafirði var fyrsti formaður stjórnar og framkvæmdastjóri til 1919. Fyrsta hús kaupfélagsins hefur sennilega verið reist nálægt aldamótunum en Verslunarfélagið var fyrst pöntunarfélagsskapur. Guðjón alþingismaður átti heima á Hólmavík 1907-19 og hafði mikil áhrif á uppbyggingu þorpsins.
Kaupfélag Steingrímsfjarðar óx hratt, en í september 1931 varð það fyrir verulegu áfalli. Þá kom upp eldur í kaupfélagshúsunum og þau brunnu nær öll; íbúðarhús, verslunin, nærri nýtt sláturhús og nokkur geymsluhús. Engu var bjargað af vörum eða innanstokksmunum. Eitt nýbyggt steinsteypt geymsluhús stóð eftir en í því voru geymd útlend matvara. Í þessu húsi, sem nú hýsir Galdrasýningu á Ströndum, var verslað áfram og endurbygging hófst strax vorið eftir. Þá var sláturhúsið endurbyggt, 1934 var reist verslunarhús og íbúð, 1937 voru hús Riis-verslunarinnar keypt og hraðfrystihús byggt 1943-5.
Ýmsar verslanir hafa starfað á Hólmavík, en lengst þeirra fyrir utan Kaupfélagið, störfuðu Verslun R.P. Riis 1896-1932 og Verslun G. Brynjólfsson frá 1910 og fram yfir 1960.