Hólmavík
Hólmavík er stærsta kauptúnið á Ströndum og jafnframt verslunar- og þjónustumiðstöð sýslunnar. Þorpið stendur undir Kálfanesborgum, innan við miðjan Steingrímsfjörð að vestanverðu og hefur byggst úr landi Kálfaness.
Áður en Hólmavíkurþorp varð til var um tíma þurrabúðarlóð í vestanverðri Hólmavíkinni, austan undir Höfðanum. Þar bjuggu Ásgeir Snæbjörnsson og Elínborg Gísladóttir en þau settust að á Hólmavík árið 1878 og hafa trúlega lifað á sjósókn. Bær þeirra stóð í litlum hvammi, skammt frá við lækjarsytru sem fellur til sjávar rétt við bæinn Hvol (Hafnarbraut 1). Hann ætti því að standa afar nálægt þeim stað sem fyrsti bær Hólmavíkur sem sögur fara af stóð á. Ásgeir og fjölskylda fluttu síðan árið 1883 að Ytri-Ós og bjuggu þar lengstum.
Sama ár og Ásgeir og Elínborg fluttu frá Hólmavík fluttu Sigurður snikkari og kirkjusmiður Sigurðsson og Guðrún Jónsdóttir frá Felli í Kollafirði að Kálfanesi og bjuggu þar eitt ár. Síðan fluttu þau niður í víkina og byggðu sér nýjan bæ töluvert utar, á túnbletti sem Ásgeir hafði byrjað að rækta. Sigurður vann fyrir sér alla ævi sem smiður, en hann lærði trésmíði í Flatey á Breiðafirði. Þarna bjuggu þau í fjögur ár og þar fæddist sonur þeirra hjóna, Stefán skáld frá Hvítadal, þann 16. október 1887. Hann getur því líklega talist vera fyrsti innfæddi Hólmvíkingurinn. Minnisvarði um Stefán var reistur nærri fæðingarstað hans árið 1990.