Strandabyggð
Steingrímsfjörður er stærsti fjörðurinn sem gengur úr vestanverðum Húnaflóa inn í Strandasýslu, um 28 km langur. Hólmavíkurhreppur eða Staðarsveit eins og svæðið var kallað forðum nær yfir landsvæðið frá Hrófá við sunnanverðan Streingrímsfjörð og fyrir botn hans, að Selá í Selárdal að norðanverðu. Eftir sameiningu við Nauteyrarhrepp við Ísafjarðardjúp árið 1994 stækkaði svo Hólmavíkurhreppur til mikilla muna, því Nauteyrarhreppur náði allt frá botni Kaldalóns við norðanvert Djúp að Ísafjarðará sem rennur í botn Ísafjarðar. Fjölgun íbúa var hins vegar ekki í samræmi við landflæmið sem bættist við, því gríðarleg fólksfækkun hefur orðið í sveitunum vestan Steingrímsfjarðarheiðar á síðustu áratugum. Við sameininguna var íbúatala Nauteyrarhrepps komin niður í 31. Árið 2002 voru Hólmavíkurhreppur og Kirkjubólshreppur sameinaðir undir nafni þess fyrrnefnda. Árið 2006 voru Hólmavíkurhreppur og Broddaneshreppur síðan sameinaðir og nafninu breytt í kjölfarið í Strandabyggð.
Hólmavíkurhreppur hét áður Hrófbergshreppur eftir Hrófbergi sem var þingstaðurinn. Svo hét sveitin fram til 1942, en þá var hreppnum skipt í tvennt við Ósá. Norðan Ósár hélt landsvæðið sínu gamla heiti, en sveitarfélagið fyrir sunnan ána hlaut nafnið Hólmavíkurhreppur. Ástæðan fyrir þessari skiptingu var sú að mönnum þóttu hagsmunir kauptúnsins á Hólmavík um framkvæmdir og fjármagn ekki fara saman við hagsmuni sveitarinnar. Í ársbyrjun 1987 voru hrepparnir síðan sameinaðir aftur undir nafni Hólmavíkurhrepps, enda hafði fólki í Hrófbergshreppi þá fækkað mjög.