Staða skólastjóra við Grunn- og tónskóla Hólmavíkur er laus til umsóknar. Um framtíðarstarf er að ræða.

Markmið og verkefni

• Stjórnun og ábyrgð á daglegri starfsemi, fjárhagsáætlunum og rekstri skólans

• Fagleg forysta

• Stuðla að framþróun skólastarfsins

• Ráðningar og mannauðsstjórnun

• Leiða samstarf starfsmanna, nemenda, heimila og skólasamfélagsins í heild

 

Menntun, færni og eiginleikar

• Grunnskólakennaramenntun og önnur reynsla skv. lögum nr. 87/2008, 12. gr.

• Skipulags- og stjórnunarfærni

• Samskiptafærni og geta til að tjá sig í ræðu og riti

• Frumkvæði og styrkur í ákvarðanatöku

• Hvetjandi og góð fyrirmynd

 

Leitað er eftir sterkum einstaklingi sem er tilbúinn í að leggja sitt af mörkum til að viðhalda og byggja áfram upp öflugt skólasamfélag þar sem hver einstaklingur fær notið sín.

Upplýsingar veitir Þórir Þorvarðarson thorir@hagvangur.is s. 520-4700
Umsóknarfrestur er til og með 19. maí nk. 
Umsóknir óskast fylltar út á www.hagvangur.is

Í Strandabyggð búa rúmlega 500 íbúar og er Hólmavík þéttbýlisstaðurinn. Atvinnulíf í sveitarfélaginu er fjölbreytt og skólastarf öflugt. Í Strandabyggð er blómlegt tómstunda-, íþrótta- og menningarlíf. Félagsstarf í sveitarfélaginu er fjölbreytt og þar er hugað að því að sem flestir aldurshópar fái notið sín til fullnustu. Góð aðstaða er til íþróttaiðkunar og menningarlíf er kraftmikið og fjörugt allt árið um kring.

Nánari upplýsingar um Strandabyggð er að finna á vefsíðunni www.strandabyggd.is.

Nú er búið að opna sundlaugina og er hún orðin volg og notaleg. Gleðin yfir þessu var mikil í blíðskaparveðrinu í gær en fjöldi fólks lagði leið sína í Sundlaugina á Hólmavík til að njóta veðurblíðunnar og leika sér í lauginni eftir langa bið. Gleði gærdagsins leynir sér ekki á meðfylgjandi mynd og ekki er ólíklegt að dagurinn í dag bjóði upp á svipaða stemmningu, enda sól og blíða.

Keppnin Hjólað í vinnuna er að hefjast og það strax á morgun!

Strandabyggð hvetur íbúa og vinnustaði til að taka virkan þátt í þessari skemmtilegu og gefandi keppni.

Keppnin snýst um að nýta eigin orku til að koma sér til og frá vinnu og á milli á vinnutíma. Það er því ekki skylda að hjóla heldur er í góðu lagi að ganga, hlaupa, línuskauta, handahlaupa, ferðast á hjólabretti eða hvaðeina.

Munið að vera með hjálm ef þið notið sjálfknúið farartæki. Hjálmurinn er mjög mikilvægt öryggistæki jafnt fyrir börn og fullorðna og ekki síður dýrmætt að vera til fyrirmyndar hvað notkun öryggisbúnaðar varðar.

 

Svona keppnir eru frábærar fyrir eigin heilsu, starfsandann og umhverfið svo að sjálfsögðu erum við öll með og gerum hvað við getum. Skráningin er einföld og fer fram á www.hjoladivinnuna.is.

 

Í gær, mánudaginn 5. maí, áttu sveitastjórn og ungmennaráð Strandabyggðar sinn fyrsta fund. Ungmennaráð var sett á laggirnar í Strandabyggð fyrir rúmu ári síðan og hefur síðan unnið ötult starf sem málsvari ungs fólks í stjórnsýslunni og meðal annars komið á fót ungmennahúsi í Strandabyggð.

Meginniðurstaða fundarins var gagnkvæm ánægja með störf og samvinnu ungmennaráðs og sveitastjórnar. Helsta niðursta fundarins var sú að ungmennaráðinu ætti að gefa aukna möguleika til áhrifa í samfélaginu með tíðari fundum og fleiri sameiginlegum fundum með sveitarstjórn, í það minnsta einn að hausti og annan að vori. Fundargerð fundarins verður aðeingengileg á vefsíðu Strandabyggðar fljótlega.

Vekjum athygli á þessum tengli: http://namsmenn.atvest.is/
Fyrirtæki og stofnanir eru hvött til að skoða þetta og senda inn umsóknir.