Dagur leikskólans er í dag, sunnudaginn 6. febrúar. Leikskólinn Lækjarbrekka hélt upp á daginn s.l. föstudag með því að bjóða foreldrum og forráðamönnum í heimsókn í leikskólann. Nemendur, foreldrar, forráðamenn og starfsfólk áttu notalega morgunstund og bauð leikskólinn gestum upp á hollan og góðan morgunmat. Það er til fyrirmyndar að finna hvað foreldrar og forráðamenn í Strandabyggð eru áhugasamir um þáttöku í lífi og starfi nemenda og starfsfólks í leikskólanum Lækjarbrekku, en skemmst er að minnast fjölmenns piparkökumorguns sem haldinn var á Café Riis í desember. Í tilefni af Degi leikskólans hafa nemendur sett upp sýningu í Kaupfélagi Steingrímsfjarðar á Hólmavík og eru allir hvattir til að leggja leið sína þangað og upplifa listsköpun yngstu íbúanna á Ströndum. Strandamönnum er óskað til hamingju með dag leikskólans.

Hægt er að fylgjast með fréttum af leikskólanum Lækjarbrekku á vefsíðu skólans, sjá hér.

Fjölmenni var á fyrirlestri Kjartans Ólafssonar, fv. þingmanns og ritstjóra, um Fjalla-Eyvind og Höllu í Skelinni á Hólmavík í gær. Fyrirlesturinn sem bar yfirskriftina ,,Nýjar fréttir af Fjalla-Eyvindi á Ströndum" byggði Kjartan á upplýsingum sem Björk Ingimundardóttir, skjalavörður á Þjóðskjalasafninu, fann í skjölum um yfirheyrslur yfir þeim hjónum sem fram fóru í Árnesi í Trékyllisvík og á Hrófbergi við Steingrímsfjörð vorið 1763. Rannsókn Bjarkar hefur m.a. leitt í ljós að Eyvindur og Halla eignuðust barn í útilegubæli í Drangavíkurfjalli á Ströndum í mars árið 1763 en barnið lifði aðeins í tvo daga. Þetta var skömmu áður en hjónin voru handtekin fyrir sauðaþjófnað og dæmd til ævilangrar refsivistar. 

Kjartan Ólafsson leiddi gesti á eftirminnilegan hátt inn í lífshlaup Eyvindar og Höllu og sýndi skemmtilegar myndir frá ferð hans á slóðir þeirra hjóna norður í Drangavík og Bjarnafjörð s.l. sumar. Björk Ingimundardóttir vinnur nú að grein um þessar nýju upplýsingar til birtingar í Strandapóstinum, tímariti Strandamannafélagi Reykjavíkur.

Sveitarfélagið Strandabyggð styrkir Skelina, lista- og fræðimannadvöl á vegum Þjóðfræðistofu.

Vefur Strandabyggðar fagnaði tveggja ára afmæli sínu í desember 2010 en hann tók við af vefnum www.holmavik.is sem geymir skemmtilegar myndir, upplýsingar og fróðleik um sveitarfélagið. Starfsfólk Strandabyggðar vinnur nú að því að auka fréttaflutning á vef Strandabyggðar til að efla upplýsingaflæði til íbúa og velunnara svæðisins. Alls voru birtar 29 fréttir á vefnum í janúar 2011 en að meðaltali birtust 2 fréttir í mánuði árið 2009 og 5,4 fréttir í mánuði árið 2010. Auglýsingar um sveitarstjórnarfundi eru birtar undir atburðardagatalinu og fundarboðin sjálf má nú finna neðst á síðunni undir Skýrslur og samþykktir. Unnið verður að uppfærslu og nýjungum á vefnum næstu mánuði. Allar hugmyndir og ábendingar um það sem betur má fara á vef Strandabyggðar ásamt nýjum og gömlum myndum af lifi og starfi í sveitarfélaginu eru vel þegnar. Senda má póst á holmavik@holmavik.is eða hafa samband við Jónas Gylfason vefstjóra, í síma 451-3510. 

Oddvitar, sveitarstjórar og bæjarstjórar á Vestfjörðum áttu góðan fund í dag í húsnæði Sambands íslenskra sveitarfélaga Í Reykjavík. Á fundinum var farið yfir 20/20, sóknaráætlun Vestfjarða. Fyrirtækið Alta hélt kynningu á hugmyndum sínum um svæðisgarða auk þess sem Þóroddur Bjarnason, Háskólanum á Akureyri, var með erindi um byggðarþróun og tækifæri á Vestfjörðum. Á fundinum var einnig rætt um brýnustu hagsmunamál sveitarfélaganna. Segir það nokkuð um samgöngumál á Vestfjörðum að auðveldast reyndist að ná flestum framkvæmdarstjórum sveitarfélaga á Vestfjörðum saman á fund í Reykjavík en þangað gátu allir mætt fyrir utan oddvita Árneshrepps, Oddnýju Þórðardóttur þar sem ófært er í hreppinn. Framkvæmdastjórarnir stefna á að hittast aftur á fundi á Hólmavík í lok febrúar ef veður og færð leyfa.

Ingibjörg Alma Benjamínsdóttir leikskólastjóri í leikskólanum Lækjarbrekku auglýsir eftir íbúðarhúsnæði á Hólmavík til leigu. Áhugasömum um að leigja húsnæði til framtíðar eða tímabundið, er bent á að hafa samband við Ingibjörgu Ölmu í síma 8454589 eða hafa samband við sveitarstjóra, Ingibjörgu Valgeirsdóttur, í síma 451 - 3510. Óskað er eftir íbúð í mars eða byrjun apríl.