Menningarhátíðin Kaldalónstónar verður haldin í Hólmavíkurkirkju og Félagsheimilinu á Hólmavík í dag til minningar um Sigvalda Kaldalóns lækni og tónskáld. Snjáfjallasetur, Þjóðfræðistofa, Kór Hólmavíkurkirkju og listamenn í Borgarfirði standa fyrir hátíðinni sem hefst kl. 14:00.

Dagný Sigurðardóttir, Snorri Hjálmarsson, Viðar Guðmundsson, Sveinn Arnar Sæmundsson og Kór Hólmavíkurkirkju sjá um tónlistarflutning. Sigurður Atlason og Katla Kjartansdóttir flytja fróðleik um skáldið auk þess sem sýningin Kaldalóns verður opnuð í Félagsheimilinu á Hólmavík eftir að dagskrá lýkur í Hólmavíkurkirkju. Þar verða einnig boðið upp á kaffiveitingar. Miðaverð er kr. 2.000 (ekki er tekið við greiðslukortum). Menningarráð Vestfjarða styrkir Kaldalónstóna.

Lionsklúbbur Hólmavíkur fagnaði 50 ára afmæli klúbbsins með glæsilegri afmælishátíð í Félagsheimili Hólmavíkur í gær. Lionsklúbburinn hefur í hálfa öld staðið fyrir uppbyggilegum verkefnum og hlúð að mikilvægri starfsemi á Ströndum. Má þar nefna góðar gjafir sem Lionsklúbburinn hefur gefið til eflingar heilbrigðisþjónustu á svæðinu.  

Fulltrúar frá öðrum Lionsklúbbum komu víða að og fögnuðu afmælinu með heimamönnum. Lionsklúbbur Ísafjarðar vildi við þetta tilefni færa Tónskóla Hólmavíkur gjafabréf að upphæð kr. 100.000 til styrktar því öflugu tónlistarlífi sem Tónskólinn stendur fyrir á Ströndum. Fulltrúar frá Tónskólanum, Gunnur Arndís Halldórsdóttir, Sara Jóhannsdóttir og Stella Guðrún Jóhannsdóttir fluttu falleg tónlistaratriði á afmælishátíðinni.

Sveitarfélagið Strandabyggð sendir Lionsklúbbi Hólmavíkur hamingjuóskir með hálfrar aldar afmælið og þakkar fyrir óeigingjarnt starf í þágu samfélagsins.

Sveitarstjórnarfólk úr Dalabyggð kom í heimsókn í Strandabyggð í dag og átti góðan fund með sveitarstjórnarfólki hér. Tilgangurinn var fyrst og fremst að kynnast, fara yfir stöðu og sóknarfæri sveitarfélaganna og skoða möguleika á samstarfi. Nýr vegur yfir Arnkötludal hefur gert samstarf Strandamanna við Dalabyggð og Reykhólahrepp mögulegt á heilsársvísu og fjölmörg tækifæri felast í þessari mikilvægu samgöngubót. Má í því samhengi nefna nýlega stofnun sameiginlegrar félagsþjónustu Stranda og Reykhólahrepps og ráðningu sameiginlegs félagsmálastjóra á svæðinu.

Á fundinum var rætt um flest það sem snýr að sveitarfélögunum; íbúaþróun, atvinnumál, menntamál, húsnæðismál, ferðaþjónustu, gatnagerð, snjómokstur, löggæslu, refaveiðar og sorphirðu svo eitthvað sé nefnt. Tilefni heimsóknarinnar er sprottið úr íbúaþingi í Dalabyggð þar sem fram kom eindreginn vilji íbúa um að efla samstarf við Strandamenn. Sveitarstjórnarfólk í Strandabyggð fagnar þeim tækifærum sem í því felst og hlakkar til áframhaldandi hugmyndavinnu.

Á myndinni frá vinstri: Ingibjörg Valgeirsdóttir sveitarstjóri Strandabyggðar, Ingveldur Guðmundsdóttir formaður byggðarráðs Dalabyggðar, Sveinn Pálsson sveitarstjóri Dalabyggðar, Katla Kjartansdóttir, sveitarstjórn Strandabyggðar, Jón Jónsson varaoddviti Strandabyggðar, Jón Gísli Jónsson oddviti Strandabyggðar og Halla Steinólfsdóttir oddviti Dalabyggðar.

Starfshópur hefur lokið við úttekt á viðhaldsþörf á öllu íbúðarhúsnæði í eigu sveitarfélagsins Strandabyggðar. Stefnt er að því að hefja viðhald á flestum íbúðunum núna í febrúar og mars og hafa starfsmenn áhaldahúss þegar byrjað á þeirri vinnu. Ljóst er að þörf á viðhaldi er mismikil, margt verður hægt að vinna fljótt og vel meðan annað krefst lengri tíma og stærri aðgerða. Er það von okkar að viðhaldsvinnan valdi íbúum sem minnstri truflun.

Sólveig Dagmar Þórisdóttir, menningarmiðlari, grafískur hönnuður og ökuleiðsögumaður, er nýr gestur í Skelinni, lista- og fræðimannadvöl Þjóðfræðistofu. Hún býður ferðaþjónustuaðilum á Ströndum og nærsveitum upp á námskeiðið ,,Mennta- og menningartengd ferðaþjónusta á Ströndum og Vestfjörðum" í tengslum við uppbyggingu ferðaþjónustu á svæðinu.

Sólveig mun leiða hugmyndavinnu á námskeiðinu með aðaláherslu á vetrartímann. Á meðan dvöl hennar stendur, 8. - 19. febrúar, mun hún einnig veita einstaklingsráðgjöf til ferðaþjónstuaðila og hægt verður að panta hjá henni viðtalstíma í Skelinni í síma 8630360.

Námskeiðið fer fram fimmtudaginn 17. febrúar, kl. 20 í Grunnskólanum á Hólmavík, Skólabraut 20-22. Námskeiðið er gestum að kostnaðarlausu.

Sveitarfélagið Strandabyggð styrkir Skelina, lista- og fræðimannadvöl Þjóðfræðistofu.