Sveitarstjórn Strandabyggðar auglýsir hér með tillögu að deiliskipulagi fyrir urðunarstað í landi Skeljavíkur skv. 41. gr. laga nr. 123/2010. Deiliskipulagssvæðið er um 3,3 ha að stærð þar sem gert er ráð fyrir allt að 500 tonnum árlega til urðunar.  Urðunarstaðurinn er í landi Skeljavíkur í Strandabyggð.  Svæðið er um 750 m austur af  Þverárvirkjun og 400 m frá gatnamótun Djúpvegar (61).

Tillagan er sett fram á uppdrætti með greinargerð og umhverfisskýrslu, dags. 17. febrúar 2011.  Tillagan og umhverfisskýrsla mun vera til sýnis á skrifstofu Strandabyggðar Höfðagötu 3, 510 Hólmavík frá 24. febrúar 2011 til 31. mars  2011. Ennfremur er tillagan til sýnis (hér). 

Athugasemdum skal skilað til skrifstofu Strandabyggðar fyrir 14. apríl 2011 og skulu þær vera skriflegar. Þeir sem ekki gera athuga­semdir innan tilskilins frests teljast samþykkir tillögunni.

Ingibjörg Valgeirsdóttir

Sveitarstjóri

Ákveðið hefur verið að nýráðinn tómstundafulltrúi Strandabyggðar, Arnar Snæberg Jónsson, muni hafa umsjón með bæjarhátíðinni Hamingjudögum á Hólmavík þetta árið en hún verður haldin dagana 1.-3. júlí. Sér hann um undirbúning og skipulagningu í nánu samráði við Tómstunda-, íþrótta- og menningarnefnd Strandabyggðar. Arnar hefur þegar hafist handa við undirbúninginn og allar hugmyndir íbúa og velunnara hátíðarinnar eru vel þegnar. Netfangið er tomstundafulltrui@strandabyggd.is og símanúmer 894-1941. Splunkuný vefsíða Hamingjudaga er að finna á slóðinni www.strandabyggd.is/hamingjudagar.

Ákveðið hefur verið að efna til lagasamkeppni vegna Hamingjudaga á Hólmavík 2011. Skilafrestur á lagi í keppnina er til föstudagsins 29. apríl. Keppnin sjálf verður haldin kl. 20:00 sunnudagskvöldið 8. maí. Lagið má ekki hafa heyrst opinberlega áður og ekki er verra að textinn fjalli að einhverju leyti um hamingjuna, Hólmavík eða Hamingjudaga. Það er þó alls ekki skilyrði. Allar reglur varðandi keppnina má nálgast með því að smella hér.

...
Meira

Fundur 1178 í sveitarstjórn Strandabyggðar verður haldinn þriðjudaginn 1. mars n.k. Frestur til að skila inn erindum fyrir fundinn rennur út á miðnætti miðvikudaginn 23. febrúar. Dagskrá fundarins verður auglýst á vefsíðu sveitarfélagsins, í Kaupfélagi Steingrímsfjarðar á Hólmavík, Söluskála KSH og í anddyri Þróunarsetursins. Sveitarstjórnarfundurinn verður haldinn á skrifstofu Strandabyggðar að Höfðagötu 3, 2. hæð, og hefst kl. 18:15. 

Nemendur í 7. bekk í Grunnskólanum á Hólmavík lögðu af stað í morgun í skólabúðir í Reykjaskóla í Hrútafirði. Nemendurnir munu dvelja út vikuna í skólabúðunum þar sem þeirra bíður skemmtileg ævintýradagskrá. Sund, íþróttir, stöðvaleikir, náttúrufræði, Byggðasafnið á Reykjum og kvöldvökur er meðal þess sem ungmennin fá að kynnast næstu daga.

Skólabúðirnar i Reykjaskóla hafa notið mikilla vinsælda undanfarin ár en þangað koma 7. bekkingar víðsvegar að af landinu. Nemendur Grunnskólans á Hólmavík hafa safnað fyrir skólabúðunum með kökubasar, félagsvist og flöskusöfnun svo eitthvað sé nefnt. Sveitarfélagið Strandabyggð óskar þeim ánægjulegrar ferðar.