Árshátíð Grunn- og Tónskólans á Hólmavík var haldin í Félagsheimilinu á Hólmavík í gær. Nemendur og starfsfólk skólans settu upp glæsilega leiksýningu þar sem rakin var 100 ára saga skólahalds á Hólmavík en í vetur eru einmitt 100 ár frá því að skólahald hófst. Arnar S. Jónsson, tómstundafulltrúi í Strandabyggð samdi leikritið, leikstjóri var Hrafnhildur Guðbjörnsdóttir kennari í Grunnskólanum á Hólmavík, tónlistarstjóri var Stefán Jónsson tónlistarkennari en Tónskólinn á Hólmavík sá um tónlistina og nemendur og starfsfólk Grunnskólans léku og sungu. Að sýningu lokinni var haldinn fjölskyldudansleikur í Félagheimilinu. Íbúar í Strandabyggð fjölmenntu á árshátíðina.

Sveitarfélagið Strandabyggð óskar Grunn- og Tónskólanum til hamingju með vandaða sýningu og íbúum öllum til hamingju með 100 ára afmæli skólahalds á Hólmavík.

Landsþing Sambands íslenskra sveitarfélaga var haldið í Reykjavík föstudaginn 25. mars 2011. Á þinginu var unnið að stefnumörkun Sambandsins fyrir árin 2011 - 2014. Unnið var í hópum á þinginu undir stjórn Guðríðar Arnardóttur, Elínar R. Líndal, Dags B. Eggertssonar, Gunnars Einarssonar og Eiríks B. Björgvinssonar en vinnan var framhald af ítarlegri greinargerð og hópvinnu sem fór fram á Landsþingi Sambands íslenska sveitarfélaga sem haldið var á Akureyri haustið 2010. Stjórnin mun vinna úr þeim hugmyndum og ábendingum sem komu fram á þinginu og birta niðurstöður á heimasíðu sambandsins. Katrín Júlíusdóttir iðnaðarráðherra og Kristinn Jónasson bæjarstjóri í Snæfellsbæ fjölluðu að lokum um horfur í atvinnumálum á Íslandi.

U1000, fundur sveitarfélaga með færri en 1000 íbúa, var haldinn fimmtudaginn 24. mars en alls eru 43 sveitarfélög á Íslandi í þeim hóp eða 56% sveitarfélaga á Íslandi. Á fundinum var farið yfir drög að nýjum sveitarstjórnarlögum og áhrif þeirra á fámenn sveitarfélög, úthlutunarreglur jöfnunarsjóðs og byggðarþróun á Austurlandi. Ingibjörg Valgeirsdóttir, sveitarstjóri var fulltrúi Strandabyggðar á fundunum. 

Kór Menntaskólans við Hamrahlíð mætir á Hólmavík um helgina og heldur tónleika í Hólmavíkurkirkju. Tónleikarnir fara fram sunnudagskvöldið 27. mars og hefjast kl. 20:00. Aðgangur er ókeypis og eru Strandamenn hvattir til að láta ekki þennan stóra menningarviðburð fram hjá sér fara. Efnisskrá kórsins er afar fjölbreytt með íslenskum og erlendum tónverkum eftir ólíka höfunda. Þetta er í fyrsta sinn sem kór Menntaskólans við Hamrahlíð heimsækir Strandir, en hann er skipaður 87 nemendum á aldrinum 16-20 ára....
Meira

Ingólfur V. Gíslason félagsfræðingur og dósent við Háskóla Íslands mun flytja erindi um breytta stöðu feðra í Skelinni á morgun, fimmtudaginn 24. mars 2011. Ingólfur V. Gíslason hefur mikla þekkingu á jafnréttismálum og þróun þeirra í íslensku samfélagi.

Ingibjörg Valgeirsdóttir sveitarstjóri og Katla Kjartansdóttir fulltrúi í sveitarstjórn Strandabyggðar, funduðu í dag með Ingólfi og fengu álit hans á drögum að jafnréttisáætlun Strandabyggðar sem lögð verður fyrir sveitarstjórnarfund 1179 í dag kl. 18:15. Jafnréttisáætlunin hefur farið fyrir tvær nefndir, Félagsmála- og jafnréttisnefnd og Atvinnumála- og hafnarnefnd, en jafnréttismálin voru færð frá Félagsmála- og jafnréttisnefnd þegar nefndin var lögð niður og ný Velferðarnefnd Árneshrepps, Kaldrananeshrepps, Strandabyggðar og Reykhólahrepps tók við. Jafnréttismálin voru við þessar breytingar færð yfir til Atvinnumála- og hafnarnefndar.

Fyrirlestur Ingólfs V. Gíslasonar fer fram í Skelinni í hádeginu á morgun, milli kl. 12:00 - 13:00 og eru allir íbúar hvattir til að mæta. Skelin, lista- og fræðimannadvöl er styrkt af sveitarfélaginu Strandabyggð.

Haldin verður Menningarhátíð Mið-Fjóns dagana 18.-19. júní í framhaldsskólanum í Ryslinge sem staðsettur er um 8 km. frá Arslev, hinum danska vinabæ Strandabyggðar.  Verður boðið upp á leiksýningar og tónlistarviðburði en einnig verða starfræktar vinnubúðir þar sem boðið verður upp á markaðsstemmningu þar sem hægt verður að kaupa hvers kyns handverk. 

Allir eru hjartanlega velkomnir til Ryslinge á þessa miklu menningarhátíð en íbúum Strandabyggðar býðst auk þess að verða beinir þátttakendur sem sýningar- og söluaðilar með handverk sín.  Þeir sem áhuga hafa á að taka þátt í handverkssýningu er bent á að láta Niels Kronvald (kronvald@gmail.com) vita af því.  Nánari upplýsingar er hægt að nálgast á www.midtfynskulturfestival.dk.