Á sveitarstjórnarfundi 1189 í sveitarstjórn Strandabyggðar sem haldinn var 25. október 2011 var samþykkt að rjúpnaveiði er ekki leyfð í landi í eigu sveitarfélagsins.

Skiptar skoðanir voru í sveitarstjórn varðandi rjúpnaveiðina. 3 sveitarstjórnarfulltrúar greiddu atkvæði með tillögu um að leyfa ekki rjúpnaveiði í landi sveitarfélagsins, 2 fulltrúar voru á móti tillögunni.

Fjórðungssamband Vestfirðinga stendur fyrir fundi þingmanna Norðurvesturkjördæmis og sveitarstjórnarfólks á Vestfjörðum á Hólmavík á morgun, fimmtudaginn 27. október. Á dagskrá verður m.a. umfjöllun um stöðu atvinnulífs og byggðar, nýjar og sértækar aðferðir sem gagnast landssvæði í stöðugum samdrætti, samgöngu- og heilbrigðismál, sóknaráætlun landshluta, frumvarp til fjárlaga 2012 og nýtingaráætlun strandsvæða.
...
Meira

Óskað er eftir húsnæði til leigu á Hólmavík með að lágmarki 2 svefnherbergjum. Húsnæðið þarf að vera laust ekki seinna en 1. febrúar 2012. Upplýsingar gefa Hildur Emilsdóttir í síma 692-7260 eða Sigurbjörn Jónsson í síma 691-1535.

Það verður mikið um dýrðir á Hólmavík næstkomandi föstudag, þann 28. október kl. 21:00. Þá fer fram sjöunda karaoke-keppni Café Riis í í Bragganum á Hólmavík. Að vanda mun fjöldi keppenda stíga á svið. Æfingar hefjast í Bragganum í kvöld, en heyrst hefur að vinningar í ár séu sérstaklega veglegir.

Eftir keppnina verður síðan ball á Café Riis með lífsreyndustu hljómsveit á Íslandi; GRM, Gylfa, Rúnari og Megasi. Í gegnum árin hafa tugir keppenda stigið á svið í karaoke-keppninni, en sigurvegarar fyrri ára eru Stefán Steinar Jónsson, Sigurður Vilhjálmsson, Salbjörg Engilbertsdóttir, Árdís Rut Einarsdóttir, Eyrún Eðvaldsdóttir og í fyrra vann Barbara Ósk Guðbjartsdóttir.

 

Sigurður Atlason, framkvæmdastjóri Strandagaldurs og formaður Ferðamálasamtaka Vestfjarða, fékk um síðustu helgi hvatningarverðlaun ferðaþjónustunnar á Vestfjörðum. Verðlaunin voru veitt á uppskeruhátíð ferðaþjónustunnar sem var haldin að Núpi í Dýrafirði. Sigurður hefur um árabil unnið mjög ötult starf í þágu ferðaþjónustu, umhverfismála, menningar og alhliða markaðssetningar á Ströndum og Vestfjörðum.

Meðal þess sem Sigurður hefur unnið að af miklum krafti er Upplýsingamiðstöð ferðamála sem rekin er af Strandabyggð í gegnum samning við Strandagaldur. Sérstök dómnefnd fór yfir tilnefningar sem bárust og var það samdóma álit hennar að Sigurður væri fremstur meðal jafningja. Við óskum Sigurði innilega til hamingju með verðlaunin, enda er hann afskaplega vel að þeim kominn!