Nú nálgast haustið og þar með styttist í leitir og réttir. Fyrstu réttardagarnir í Strandabyggð eru um næstu helgi, en þá verður réttað í Skeljavíkurrétt við Hólmavík á laugardegi og sunnudegi, kl. 16:00 báða dagana. Næstu réttir eru viku síðar, sunnudaginn 18. september, í Staðarrétt og Kirkjubólsrétt kl. 14:00 á báðum stöðum.

Fólk er eindregið hvatt til að gera sér dagamun og kíkja í réttirnar í haust. Leitir og réttir eru nefnilega afskaplega hressandi og skemmtileg iðja, hvort sem menn eru í því hlutverki að rölta um fjöll, draga í dilka eða bara horfa á iðandi mannlífið sem blómstrar í kringum sauðfjárbúskapinn þegar hausta tekur.  
 

Björn Hafberg náms- og starfsráðgjafi verður til viðtals á Hólmavík þriðjudaginn 6. september frá kl. 10:00 Tímapantanir hjá honum eru í síma 899 0883. Viðtölin fara fram á skrifstofu Fræðslumiðstöðvarinnar á Höfðagötu 3, annarri hæð.

Fræðslumiðstöð Vestfjarða stendur fyrir fjölda námskeiða og námsleiða á Ströndum veturinn 2011 - 2012. Kynningarriti verður dreift á heimili von bráðar. Nánari upplýsingar veitir Kristín S. Einarsdóttir verkefnastjóri.

Óskað er eftir tillögum að lógó félagsþjónustu Stranda og Reykhólahrepps. Lógóið þarf að vera tilbúið til notkunar á tölvutæku formi.

Félagsþjónusta Stranda og Reykhólahrepps er sameiginleg félagsþjónusta sveitarfélaganna, Árneshrepps, Kaldrananeshrepps, Strandabyggðar og Reykhólahrepps. Félagsþjónustann sinnir þjónustu á sviði barnaverndar, félagslegrar ráðgjafar, fjárhagsaðstoðar, málefni fatlaðs fólks, félagslegrar heimaþjónustu og málefni aldraðra....
Meira

Skipaður verður starfshópur sem fjalla á um hugsanlega sameiningu Atvinnuþróunarfélags Vestfjarða, Menningarráðs Vestfjarða, Markaðsstofu Vestfjarða, Vaxtarsamnings Vestfjarða og Fjórðungssambands Vestfirðinga. Tillaga þessa efnis var samþykkt á Fjórðungsþingi Vestfirðinga sem haldið var í Bolungarvík um helgina. Á þinginu var m.a. rætt um tillögur að framtíðarskipulagi stoðkerfis atvinnu- og byggðaþróunar. Markmiðið með mögulegri sameiningu er að skapa stærri og öflugari einingu. Starfshópnum er ætlað að skila af sér útfærslu á tillögunni sem lögð verði fyrir aukaþing sem haldið verður í lok október.

Frétt af bb.is

Vetraropnun í Íþróttamiðstöðinn á Hólmavík tók gildi 1. september s.l. eins og sjá mér hér.

Sú breyting verður á opnunartíma sundlaugarinnar þessa fyrstu góðviðrisdaga í haust meðan sundkennsla fer fram fyrir nemendur í Grunnskólanum á Hólmavík, að opið verður fyrir almenning í hádeginu mánudaga - fimmtudaga milli kl. 12:00 - 13:00 og eftir kl. 14:00. Sveitarfélagið Strandabyggð hvetur íbúa og gesti á Ströndum til að nýta sér frábæra aðstöðu í Íþróttamiðstöðinni á Hólmavík.