Bókin Fjallkonan. Þú ert móðir vor kær er gjöf til landsmanna frá forsætisráðuneytinu og Forlaginu í tilefni af 80 ára afmæli lýðveldisins Íslands. 

Fjallkonan er þjóðartákn og í bókinni er kafað ofan í sögu fjallkonunnar, ávörpin sem flutt hafa verið af íslenskri fjallkonu allt frá árinu 1947 ásamt úrvali þjóðhátíðarljóða. Í bókinni eru þýðingar m.a. á ensku og pólsku. 

Hægt er að nálgast eintak af bókinni á skrifstofu Strandabyggðar og í íþróttamiðstöð Strandabyggðar.

Kæru íbúar Strandabyggðar,

Á svona degi væri nú ekki amalegt að sitja á pallinum í sumarhúsi fyrir ofan Skeljavík og njóta þess sem Steingrímsfjörður hefur uppá að bjóða.  Þvílíkt útsýni og fegurð!

Sveitarstjórn hefur ákveðið að auglýsa 6 lóðir í hverfi fyrir ofan þjóðveginn, eins og þessi mynd sýnir.  Verkefnið er allt í réttu ferli og í yfirferð hjá Skipulagsstofnun.  Hér má finna frekari upplýsingar og lýsingu á svæðinu.

Áfram Strandabyggð!

Kæru íbúar Strandabyggðar,

Nú styttist í að framkvæmdir hefjist við byggingu raðhúss á Lillaróló reitnum.  Róbert Óskar Sigurvaldason, verktakinn sem kemur til með að byggja húsið, kom í dag og við ræddum næstu skref.  Á næstu dögum munum við fjarlægja og færa leiktæki af Lillaróló og setja þau upp við ærslabelginn, þau þeirra sem eru í lagi.  Síðan hefst jarðvegsvinna og stefnt er að því að húsið verði komið upp í lok september.

Á myndinni eru þeir Grettir Örn Ásmundsson byggingarfulltrúi, Þorgeir Pálsson Oddviti og Róvert Óskar Sigurvaldason, verktaki. Myndina tók Bjarni, starfsmaður Pakkhússins.

Áfram Strandabyggð!

Ungmennaráð Strandabyggðar verður með leikjakvöld miðvikudaginn 12 júní kl 19:30 á skólalóðinni.

Allir velkomnir. 

Strandabyggð óskar eftir tilboðum í réttarsmíði í Kollafirði, í landi Litla Fjarðarhorns. Verklýsing sem byggir á ráðleggingum bænda, og er eftirfarandi:

Fjárfjöldi: Varlega áætlað munu koma 4500 -6000 fjár í réttina. 

Gerð réttar: Sundurrekstrargangur með dilkum. Eingöngu fastar grindur í úthring. Það á einnig við um úthringi hvers og eins dilks og úthringi sundurrekstrargangs. Úthringur og allar milligerðir þurfa að vera fastar og ófjarlægjanlegar til að notagildi haldist.  Réttin sé smíðuð úr efni sem gripum stendur ekki hætta af hvorki eitrunarhætta né slysahætta.

Fjöldi dilka:  9 - 11.

Griðing:  Girða þarf af almenning.

Um stærðir rétta gildir fjallskilasamþykkt Strandasýslu

  "6 gr. Dilkar í fjárréttum skulu vera svo rúmgóðir að enginn þurfi að hleypa út fé fyrr en sundurdrætti er lokið. Skylt er að sjá utansveitarmönnum fyrir nægilegu dilkarými, þá skal vera aðstaða til að einangra sjúkar kindur. Ómerkingum, óskilafé og línubrjótum skulu ætlaðir sérstakir dilkar."

Hönnun og útfærsla: Öll nánari hönnun og útfærsla réttarinnar skal unnin í samráði við bændur og fulltrúa sveitarfélagsins.  Stuðst verður við teikningar af Staðardalsrétt rétt sem eru aðgengilegar á skrifstofu Strandabyggðar.

Verklok: Verktaki skal skila réttinni fullbúinni og tilbúinni fyrir notkun, 9. September 2024, kl 17.00. Dagsektir: Dagsektir skulu reiknast 1% af kostnaðaráætlun verksins. Kostnaðaráætlun er kr. 4.500.000.-

Allar frekari upplýsingar má fá hjá sveitarstjóra; thorgeir@strandabyggd.is

Tilboðum skal skila á skrifstofu Strandabyggðar eða á netfangið strandabyggd@strandabyggd.is fyrir lok dags 21.júní n.k.