Kæru íbúar Strandabyggðar,

Síðastliðin vika einkenndist af vinnu við fjárhagsáætlanagerð.  Sveitarstjórn sat nokkra fundi í vikunni, og var byrjað á fundi með Haraldi Líndal Haraldssyni ráðgjafa, sem fór yfir mikilvægi fjárhagslegrar markmiðasetningar.  Þetta var í senn fræðandi og hvetjandi fundur fyrir okkur í sveitarstjórn og mun efni hans nýtast okkar við á næstu dögum og vikum.

Ferlið við fjárhagsáætlanagerðina er þannig að  sveitarstjórn heldur nokkra vinnufundi ásamt skrifstofustjóra, þar sem áherslur næsta árs hvað verkefni og fjárfestingar varðar, eru ræddar og ákveðnar.  Til hliðsjónar í þessari vinnu styðst sveitarstjórn við upplýsingar frá Sambandi íslenskra sveitarfélaga þar sem helstu breytur í íslensku efnahagslífi eru tilteknar.  Einnig erum við með áætlanir forstöðumanna þar sem tillögur að verkefnum/fjárfestingum innan þeirra deilda eru lagðar fram. Síðan tínum við til ýmis önnur gögn og auðvitað fjárhagsáætlun síðasta árs.

Sveitarstjórn fundar síðan með forstöðumönnum og heimsækir gjarnan viðkomandi vinnustaði.  Við áttum t.d. fund í vikunni í áhaldahúsinu o.s.frv.  Þetta er í grunninn skemmtileg vinna þó svo staða okkar sé þannig, eins og flestir ættu að vita, að við verðum að forgangsraða mjög ákveðið okkar fjármagni.  Á þessu ári og síðan í nóvember í fyrra, hefur megináherslan eðlilega verið endurgerð grunnskólans.

Fjárhagsáætlun næsta árs og næstu þriggja ára þar á eftir, fer síðan í fyrri umræðu á sveitarstjórnarfundi í nóvember og síðari umræða er í desember.

Grunnskólinn

Vinnu við grunnskólann miðar vel.  Nú er verið að setja upp nýja glugga og hurðir í yngri hlutann.  Á myndinni sem fylgir þessum pistli, sést þvílík breyting verður á þeirri hlið skólans sem snýr upp í Borgirnar.  Þarna verða kennarar með sitt vinnurými og voru því allir gluggar á þessum vegg síkkaðir, til að skapa meiri birtu og betra vinnuumhverfi.  Þetta kemur sérlega vel út að okkar mati.  Stefnt er að því að þessum verkætti ljúki um eða upp úr mánaðarmótun.  Þá tekur við málun og frágangur á lofti og gólfum.

Starfsmannamál

Í vikunni voru tekin starfsmannaviðtöl vegna tveggja starfa sem vð auglýstum í gegnum Hagvang.  Ekki hefur gengið að manna nokkrar stöður hjá sveitarfélaginu á undanförnum vikum og er það miður og gerir auðvitað meiri kröfur til þeirra starfsmanna sem fyrir eru, t.d. á leikskólanum.  Við sjáum þó fram á lausn þar að hluta til, sem nánar verður sagt frá síðar. 

Skortur á starfsfólki gerir það að verkum að erfiðara verður að halda uppi því þjónustustigi sem við erum vön.  Og á endanum er það þannig, að þjónustu sem ekki er hægt að manna, er heldur ekki hægt að bjóða.  En við höldum áfram að leita og reyna að leysa vandann.  Mannfæðin kemur oft í bakið á okkur, þó svo fámennið hafi líka sína kosti.

Mörg önnur spennandi mál og verkefni eru á okkar borðum þessa dagana og má þar nefna;  réttarsmíði í Kollafirði, sem kemur til framkvæmda á næsta ári, en fyrst munum við kalla eftir tillögum bænda hvað varðar stærð, fyrirkomulag og staðsetningu réttarinnar.  Eins erum við í viðræðum við ISAVIA um uppsetningu jarðstöðvar við flugvöllinn, við erum að undirbúa íbúafund vegna breytinga á sorphirðu og starfsemi Sorpsamlagsins, samskipti við matvælaráðuneytið varðandi frumvarp um stefnumótun í lagareldi (fiskeldi), framundan eru fundir sveitarstjóra með heilbrgðisráðherra og félags- og vinnumarkaðsráðherra um m.a. mögulegan þjónustukjarna fyrir aldraða á Hólmavík ofl ofl. 

Áfram Strandabyggð!

Kveðja

Þorgeir Pálsson

oddviti.

 

 

Þann 24. október 2023 munu konur og kvár leggja niður störf í heilan dag til að mótmæla vanmati á vinnuframlagi kvenna og kynbundnu ofbeldi sjá kvennafri.is og koma saman til að styrkja samstöðuna.

Vegna kvennaverkfalls 24. október eru lokanir stofnana í Strandabyggð sem hér segir:
Grunnskóli-engin kennsla
Leikskóli-engin kennsla
Skrifstofa Strandabyggðar-lokað að hluta
Félagsþjónusta Strandabyggðar-lokað
Íþróttamiðstöð-lokað að hluta, nánar auglýst síðar

Við biðlum við til skipuleggjenda að tilkynna til okkar um viðburði á svæðinu og þegar hefur verið tilkynnt um samstöðufund á Malarhorni á Drangsnesi sjá dagskrá:

Þriðjudaginn 24. október 2023, eru konur og kynsegin fólk hvött til að leggja niður launuð sem ólaunuð störf allan daginn eins og konur gerðu fyrst á kvennaári Sameinuðu þjóðanna árið 1975.

Við ætlum að sýna okkar stuðning og um leið fram á mikilvægi vinnuframlags kvenna fyrir samfélagið með því að hittast og horfa á samstöðufundinn á Arnarhóli í beinu streymi.
Fundurinn verður haldinn á Malarkaffi og hefst með hádegismat kl. 12:00 (öll koma með e-ð á borðið).
Sjáumst!

sjá viðburð á facebook

Sýnum samstöðu það er sterkasta vopnið! Knýjum fram réttlæti! Áfram stelpur!

Kæru íbúar Strandabyggðar,

Eins og fram hefur komið, hefur Sveitarstjórn Strandabyggðar sótt um áframhaldandi aðild að verkefninu Brothættar byggðir, eða Sterkar Strandir, eins og það heitir hjá okkur. Sótti ég þess vegna fund í sl viku með forstjóra og starfsmönnum Byggðastofnunar.  Mikilvægi verkefnisins fyrir okkar samfélag er óumdeilt, þar sem það gefur almenningi færi á að koma fram með nýjar verkefnahugmyndir og fá styrki til að koma þeim af stað.

Nokkur umræða hefur verið um þessar styrkveitingar að undanförnu og hafa fulltrúar stofnana í verkefninu því viljað koma á framfæri upplýsingum um það verklag sem stuðst er við, þegar umsóknir eru metnar og styrkúthlutanir ákveðnar.  Þessar upplýsingar má nálgast hér.

Einnig má sjá almennar upplýsingar um verkefnið hér á heimasíðu Vestfjarðastofu.  Í ársskýrslu Sterkra Stranda frá 2022, má líka sjá upplýsingar um styrkúthlutanir þess árs og fyrri ára.  Sá tengill er hér.  Styrkúthlutanir 2023 eru síðan hér.

Til að einfalda yfirsýn yfir þessar styrkúthlutanir, hef ég tekið þær allar saman í eina töflu, sem má finna hér.

Vonandi verða þessar upplýsingar til að upplýsa íbúa Strandabyggðar og aðra um eðli þessara styrkja og styrkhafa undanfarinna ára.  Þessum styrkjum má ekki rugla saman við þá beinu styrki sem Strandabyggð hefur veitt í áraraðir, þó um sömu styrkhafa sé þar oft að ræða.

Kveðja
Þorgeir Pálsson
oddviti

Kæru íbúar Strandabyggðar,

Nokkrar línur um vikuna að baki og upphaf skólaárs.  Vegna veikinda hafa undanfarnar vikur verið hálf undarlegar.  Ég er núna í 50% veikndaleyfi og litast dagarnir auðvitað af því.

En það er sem fyrr nóg að gera, verkefnin skemmtileg og krefjandi.  Vikan byrjaði á eftirfylgni við nýafstaðið Fjórðungsþing, sem ég gerði grein fyrir í pistli í byrjun vikunnar.  Síðan tóku við verkefni sem tengjast endurbótum á Grunnskólanum, sem miðar vel  Nú eru gluggar og hurðir komnar hingað til Hólmavíkur og er það næsti stóri verkþátturinn í ferlinu að skipta um og laga.  Sveitarstjórnarfundur var haldinn í liðinni viku og gerði ég einnig grein fyrir helstu punktum þess fundar í sérstökum pistli.

Upphaf skólaárs

Mig langar að fara nokkrum orðum um upphaf skólaársins þó svo nokkuð sé liðið á það.  Skólaárið hófst frábærlega og fá umskónarkennar og starfsmenn skólans mikið hrós fyrir. Fyrsta vikan fór í útikennslu með mjög fjölbreyttri dagskrá.  Veðrið lék við okkur og krakkarnir voru yfir sig glaðir með þessa byrjun. 

Í byrjun september var samningi okkar við rekstraraðila Café Riis varðandi skólamáltíðir sagt upp af þeirra hálfu og réði þar úrslitum að börnum sem skráðu sig í mat hafði fækkað úr um 40 í um 20.  Fyrir hafði Hólmadrangur lokað með tilheyrandi tekjumissi.  Við stóðum frammi fyrir því að hugsa hratt og finna aðrar lausnir og skólastjóri, skrifstofustjóri og starfsmenn grunnskólans stóðu sig sérlega vel í því ferli.  Fljótlega eftir að samningur okkar við Riis var laus, barst tilboð í rekstur mötuneytis frá fyrirtæki í sveitarfélaginu, en samningar náðust ekki.  Það var því úr að samið var við starfsmenn skólans um að taka að sér mötuneytið og er það nú rekið af sveitarfélaginu.  Hefur nemendum í mötuneytinu fjölgað aftur í kjölfar þessa.

En þetta er ekki eina áskorunin.  Illa hefur gengið að manna nokkrar lykilstöður í tengslum við grunnskólann og má þar nefna stöður tónlistarkennara, deildarstjóra í leikskóla, þroskaþjálfa ofl.  Við munum reyna áfram en því miður bitnar þetta á þjónustuframboði, enda augljóslega ekki hægt að bjóða fram þjónustu ef enginn starfsmaður er til að sinna starfinu.  Við reynum hins vegar áfram eins og hægt er.

En þá aftur að liðinni viku. 

Sterkar Strandir

Ég gerði mér ferð á Sauðárkrók á fimmtudag til að fylgja eftir umsókn sveitarstjórnar um áframhaldandi aðild að verkefninu Brothættar byggðir, sem hjá okkur heitir Sterkar Strandir.   Þar hitti ég m.a. forstjóra Byggðastofnunar, sem og formann og nefndarmann verkefnastjórnar Sterkra Stranda. Við erum sammála um mikilvægi verkefnisins fyrir Strandabyggð og ég geri mér því vonir um að verkefnið verði framlengt.  Einnig ræddi ég hugsanlega úthlutun sértæks byggðakvóta til Strandabyggðar, en það er hluti þeirra verkefna og lausna sem komið hafa upp í umræðunni í kjölfar lokunar Hólmadrangs.  Ég bind vonir við jákvæðan tón og velvilja sem ég fann í okkar garð á þessum fundi, þó svo engin niðurstaða sé komin. 

Hótelbygging

Ég endaði vikuna í Reykjavík á fundi með forsvarmönnum Fasteignaumsýslunar ehf, og ræddum við þróun mála varðandi Hótelbyggingu á Hólmavík.  Unnið er að hönnun hótelsins og eins gerð afstöðumyndar og skipulagsbreytinga sem sýna hvernig allt svæðið í kring um staðsetningu hótelsins, íþróttamiðstöðina, félagsheimilið o.s.fr.v mun þróast.  Við vonumst til að geta sýnt þessar myndir á næstu vikum, hugsanlega í tengslum við íbúaþing Sterkra Stranda sem stefnt er á að halda hér í nóvember, ef stjórn Byggðastofnunr samþykkir umsókn okkar um áframhald verkefnisins.

Að auki er nú verið að undirbúa fjárhagsáætlanagerð, við erum að ræða þróun Félagsþjónustunnar, Velferðarþjónustu Vestfjarða, samgöngumál, sameiningarmál og margt fleira. 

Kveðja

Þorgeir Pálsson

oddviti

Kæru íbúar Strandabyggðar,

Í gær var sveitarstjórnarfundur 1351 haldinn í Hnyðju.  Þetta var góður fundur og góð samstaða um þau mál sem voru tekin fyrir.  Það var líka ánægjulegt að sjá þá íbúa sem komu á fundinn og fylgdust með.  Og það er rétt að árétta, að allir sveitarstjórnarfundir eru opnir almenningi, nema ef um trúnaðarmál er að ræða.

Mig langar að nefna hér nokkur þeirra mála sem rædd voru á fundinum, en svo má einnig lesa fundgerð fundarins hér, eða á heimasíðu Strandabyggðar.

Velferðarþjónusta vestfjarða. 

Á fundinum var farið yfir samning sem öll sveitarfélög á Vestfjörðum, utan Strandabyggðar, hafa samþykkt.  Samningurinn snýr að þjónustu í barnaverndamálum og í málefnum fatlaðs fólks.  Ísafjarðarbær er leiðandi sveitarfélag og heldur utan um alla stjórnsýslu samningsins.  Strandabyggð mun fá fulla aðild að samningnum samkvæmt viðauka sem öll sveitarfélögin samþykkja.  Það er mikilvægt fyrir alla að þessi samningur skuli orðinn að veruleika, ári eftir að umræða um hann hófst á Fjórðungsþingi, 2022 á Patreksfirði.  Við munum kynna Velferðarþjónstu Vestfirðinga síðar, þegar öllum formsatriðum er framfylgt. 

Félagsþjónusta Stranda og Reykhóla og nú líka Dalabyggðar, mun eftir sem áður starfa, en mun þó taka einhverjum breytingum þar sem Dalabyggð sameinast okkur í Félagsþjónustunni.  Þar verður áfram sú þjónusta sem verið hefur, félagsmálastjóri er þar áfram sem fyrr o.s.frv.  það er aðeins í barnaverndarmálum og málefnum fatlaðra sem við snúum okkur til Velferðarþjónustu Vestfjarða.

Aukin fjárframlög til Slökkviliðsins. 

Ákveðið var að auka framlög til Slökkviliðsins en þar vantaði orðið nokkuð vegna lækkunar fyrri áætlunar.  Það hefur orðið mjög mikil nýliðun í Slökkviliði Hólmavíkur undanfarið og er það mjög jákvætt.  Margir hafa sótt grunnnámskeið og það er góður og jákvæður hópur sem prýðir slökkviliðið okkar þessa dagana.

Sterkar Strandir

Farið var yfir fundargerð verkefnastjórar frá 24 ágúst s.l.  Sveitarstjórn Strandabyggðar hefur nú formlega óskað eftir áframhaldandi aðild að verkefninu Brothættar byggðir og hefur umsóknin verið móttekin.  Ég mun fara á Sauðárkrók á morgun, fimmtudag, til að fylgja þessu máli eftir, sem og umsókn um sértækan byggðakvóta sem einnig er farin til Byggðastofnunar.  Sértækum byggðakvóta er ætlað að mæta því áfalli sem lokun Hólmadrangs var fyrir atvinnulíf og samfélagið allt í Strandabyggð. 

Sorpsamlag Strandasýslu

Á fundinum var farið yfir fundargerð stjórnar Sorpsamlagsins frá 4. október s.l.  Þar var rætt um húsnæðismál Sorpsamlagsins og þá hugmynd að taka á leigu hluta sláturhússins.  Ástæða þessa er sú staðreynd, að Sorpsamlagið þarf stærra húsnæði til að mæta aukunum umsvifum og nýjum reglum varðandi sorphirðu.  Ákveðið var að horfa frá leiguhugmyndum en vinna þess í stað að uppbyggingu á framtíðarhúsnæði Sorpsamlagsins.

 

Vinnuskýrslur forstöðumanna og sveitarstjóra

Á hverjum fundi sveitarstjórnar er farið yfir verkefni forstöðumanna og sveitarstjóra.  Oft skapast umræður um einstök verkefni og lagðar eru fram spurningar til að skerpa á stöðu mála.  Ég hvet íbúa til að kynna sér þessar skýrslur sem eru aðgengilegar á heimasíðu sveitarfélagsins.

Ýmislegt annað rætt

Á hverjum sveitarstjórnarfundi eru mörg mál lögð fram til kynningar sem fá samt enga umræðu.  Það er þó alls ekki þannig að þau gögn séu ekki lesin af sveitarstjórn og oft er vísað einstök mál í þeim gögnum.  En, allt er þetta lesið og er liður í að halda sveitarstjórn upplýstri hvað varðar mál í stoðkerfinu, hjá t.d. Vestfjarðastofu, Fjórðungssambandinu, Sambandi íslenskra sveitarfélaga, Hafnarsambandi Íslands ofl ofl.

Ég mun setja svona stutta pistla á heimasíðuna í kjölfar sveitarstjórnarfunda til upplýsingar fyrir íbúa. 

Kveðja

Þorgeir Pálsson

Oddviti