Nú stendur yfir evrópsk vitundarvika um athyglisbrest og ofvirkni (ADHD). Þeir sem eru með ADHD eru með frávik í þeim hluta heilans sem stjórnar athygli og virkni. Það þýðir að taugaboð í þeim hluta heilans eru trufluð (taugaþroskaröskun) og því eiga þeir í erfiðleikum með að einbeita sér, eru eirðarlausir og lenda oft í vandræðum. Orsakir ADHD eru af líffræðilegum toga og hafa ekkert að gera með slakt uppeldi foreldra eða lélegar kennsluaðferðir....
Meira

Það var fjölmennt og afar góðmennt í Félagsheimilinu á Hólmavík í gær, en þá fór fram fundur um málefni eldri borgara í Strandabyggð. Tæplega þrjátíu manns mættu á fundinn, en öllum einstaklingum 67 ára og eldri í Strandabyggð var boðið að mæta. Gestir fundarins tóku þátt í hópvinnu og skráðu niður hvað væri gott hjá sveitarfélagini í málefnum eldri borgara, hvað mætti bæta og hvers væri óskað til viðbótar við þá þjónustu sem nú þegar er í boði. Margar góðar hugmyndir og nytsamlegar ábendingar rötuðu á blað.  

Meðal þess sem kom fram á fundinum voru t.d. óskir um leikfimi, sundleikfimi, spilamennsku, aukið tómstundastarf fyrir karlmenn, stærri aðstöðu fyrir félagsstarfið, fleiri bekki á gönguleiðum, betra aðgengi frá Heilbrigðisstofnuninni á Hólmavík og sjúkraþjálfara. Meðal þess sem fundargestir voru sáttir við var frír aðgangur í sund, þjónusta frá sveitarfélaginu, félagsstarf í félagsheimilinu svo fátt eitt sé nefnt. Að hópvinnu lokinni var félagsleg heimaþjónusta kynnt og fólk hvatt til að nýta sér þjónustu félagsmálastjóra.  

Fundurinn var afar gagnlegur og án efa verða þær upplýsingar og ábendingar sem fram komu í hópvinnunni nýttar til áframhaldandi jákvæðrar uppbyggingar fyrir hinn öfluga og kraftmikla hóp sem aldraðir í Strandabyggð skipa.
 
 

Leikskólinn Lækjarbrekka er öflugur leikskóli á Hólmavík, en þar eru 32 börn við nám, leik og störf á hverjum degi ásamt góðum hópi starfsfólks. Kynningarfundur um vetrarstarfsemi leikskólans verður haldinn í leikskólanum kl. 21:00 miðvikudagskvöldið 21. september. 

Meðal þess sem eflaust verður rætt er innleiðing nýrrar leikskólastefnu í leikskólanum Lækjarbrekku, en hún hefur verið í mótun hjá starfsfólki undanfarið. Stefnan byggir á svokölluðu "flæði" og er byggð á kenningum og aðferðum Mihaly Csikszentmihalyi. Allir foreldrar eru hvattir til að mæta og fræðast um starfsemina leikskólans í vetur.
 

Í sjónvarpsþættinum Landanum sem sýndur var í Ríkissjónvarpinu á sunnudaginn var rætt við unga og sprellfjöruga iðkendur í Mótorkrossfélagi Geislans sem hefur aðsetur sitt á mótorkrossbrautinni rétt utan við Hólmavík. Mikil vinna hefur verið lögð í uppbyggingu brautarinnar undanfarin ár, en hún ber nafnið Skeljavíkurbraut og er lögleg 1.400 metra löng keppnis- og æfingabraut fyrir fyrir minni hjól eða fyrir hjól með allt að 85cc tvígengis- eða 125 fjórgengisvélum. 

Strandabyggð hefur stutt við uppbyggingu brautarinnar í gegnum tíðina með styrkjum, en mestöll vinna við uppbyggingu hefur verið unnin af sjálfboðaliðum.  Unga fólkið okkar kom að vanda vel fyrir í þættinum og var Ströndum til sóma.

Hægt er að horfa á umfjöllunina með því að smella hér.
 
 

Í vikunni sem er nýhafin verða haldin samræmd könnunarpróf í öllum grunnskólum landsins. Grunnskólinn í Hólmavík er þar engin undantekning, en þar mun elsti bekkur grunnskólans taka þrjú samræmd próf fyrripart vikunnar; í íslensku, ensku og stærðfræði. Á fimmtudag og föstudag taka síðan 4. og 7. bekkur samræmd próf í íslensku og stærðfræði. Fræðast má um nánar um prófin á vefsíðunni www.namsmat.is.

Í tilkynningu frá skólanum á vefsíðu hans eru nemendur hvattir til að hvílast vel, óttast ekki prófin en um leið leitast við að gera sitt besta. Þá er þeim einnig óskað velgengni í hvívetna. Starfsfólk Strandabyggðar tekur heilshugar undir þessar góðu kveðjur til unga fólksins.