Íbúafundur um tómstundir í Strandabyggð verður haldinn fimmtudagskvöldið 3. maí  kl. 19:30 í Félagsheimilinu á Hólmavík. Þar mun íbúum sveitarfélagsins gefast tækifæri til að koma á framfæri skoðunum sínum, hugmyndum og framtíðarsýn varðandi tómstundir, menningu, félagslíf, íþróttir og aðstöðu í Strandabyggð.

Tilgangurinn með fundinum er að fá fram skoðanir sem flestra íbúa á þessum mikilvæga málaflokki og nýta þær til stefnumótunar í honum, en það verður gert með hópavinnu og umræðum. Íbúafundurinn er öllum opinn og fólk á öllum aldri er hvatt til að mæta!

Sveitarstjórn Strandabyggðar samþykkti hreinsunarátak í Strandabyggð 2012 á sveitarstjórnarfundi 17. apríl s.l. Hreinsunarátak og umhverfisvikur verða sem hér segir:

Umhverfisdagur fyrirtækja og stofnanna á Hólmavík 16. maí 2012
Umhverfisdagur fyrirtækja og stofnanna verður haldinn miðvikudaginn 16. maí 2012. Þann dag geta fyrirtæki og stofnanir óskað eftir að starfsmenn Áhaldahúss Strandabyggðar fjarlægi rusl. Þeir sem vilja taka þátt er bent á að hafa samband við starfsfólk Áhaldahússins en góð þátttaka var í umhverfisdegi fyrirtækja og stofnanna árið 2011.

...
Meira

Íþróttamiðstöðin á Hólmavík lokar mánudaginn 30. apríl vegna viðhaldsverkefna og opnar aftur mánudaginn 7. maí með voropnunartíma sem verður auglýstur nánar í næstu viku. Eru íbúar beðnir velvirðingar á þeim óþægindum sem þetta kann að valda. 

Sveitarstjórnir Árneshrepps, Kaldrananeshrepps, Strandabyggðar, Reykhólahrepps og Dalabyggðar komu saman til fundarhalda í Hnyðju s.l. mánudag. Á dagskrá fundarins voru sameiginleg hagsmunamál á svæðinu. M.a. var rætt um stofnun framhaldsdeildar á Hólmavík, sýslumannsembætti á svæðinu, rekstur og þjónustu Heilbrigðisstofnunar Vesturlands og möguleg samstarfsverkefni þessara sveitarfélaga.

Viktoría Rán Ólafsdóttir verkefnastjóri hjá Atvinnuþróunarfélagi Vestfjarða kynnti vinnu við atvinnustefnu á Ströndum og Reykhólahreppi sem nú er að hefjast. Atvinnustefnan verður unnin í samráði við atvinnumálanefndir og sveitarstjórnir á svæðinu og er stefnt að því að hún verði tilbúin næsta haust. 

Nemendur í Grunnskólanum á Hólmavík gerðu aldeilis góða hluti í fegrun Hólmavíkur í dag þegar haldinn var árlegur umhverfisdagur grunnskólans. Þá gengu allir nemendur skólans víðsvegar um bæinn og tíndu ógrynnin af rusli. Herlegheitin voru síðan vigtuð á hafnarvoginni sem sýndi hvorki fleiri né færri en 540 kg. þyngd. Sveitarstjórn Strandabyggðar hét á vinnu og árangur hópsins við ruslatínstluna og fengu nemendurnir þrjátíu þúsund krónur í staðinn fyrir dugnaðinn. Markmiðið með deginum er að efla umhverfisvitund nemenda og hvetja þá til að huga betur að umhverfi sínu, bættri umgengni almennt og vekja athygli almennings á umhverfismennt.

Þetta var í fjórða skipti sem dagurinn er haldinn hátíðlegur í Grunnskólanum á Hólmavík. Dagurinn hófst með fræðslu frá Einari Indriðasyni framkvæmdastjóra Sorpsamlags Strandasýslu, en að lokinni ruslatínslunni fengu allir heitt kakó í skólanum og áttu saman góða stund í vikulokin. Það var Ingibjörg Emilsdóttir verkefnisstjóri ásamt umhverfisnefnd skólans sem skipulagði umhverfisdaginn. Hann er liður í Grænfánastarfi skólans, en Grænfáninn er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum. Grunnskólinn á Hólmavík hefur nú flaggað honum í þrjú ár.

Nemendum og starfsfólki grunnskólans á Hólmavík er þakkað frábært framlag við fegrun kauptúnsins!