Jólatréð hjá Svönu og Nonna skartar sínu fegursta. Jólakortakassi Lions að fyllast í Kaupfélaginu. Spennan að magnast út af jólahappdrætti KSH. Dulúð og erill í kringum pakkana á pósthúsinu. Smáfuglarnir sitja á þakinu á Galdrasafninu. Þeir vita að þeir eiga von á góðgæti. Allt hvítt, nema bleiku skýin á himninum. Að keyra Hafnarbrautina og horfa á Hólmavíkurkirkju eins og að vera staddur inn í póstkorti. Jólabærinn Hólmavík. Fallega Hólmavík.

Það er Þorláksmessa og jólakveðjurnar eru lesnar í útvarpinu. Ég vona að jólasveinarnir gleymi ekki að bera út jólakortin. Ég vona að við gleymum ekki að njóta augnabliksins. Ég hlakka til að fara í messuna í Hólmavíkurkirkju kl. sex á morgun. Fyrir mér er hún hátíðleg hamingjustund. Innihaldsrík, friðsæl - og full af samkennd. Fyrir mér er jólamessan eins og jólatréð hjá Svönu og Nonna, jólakortakassinn hjá Lions, jólahappdrætti KSH, smáfuglarnir á þakinu á Galdrasafninu - og Strandirnar allar. Hún er það sem gerir okkur rík - í hjartanu.

Ég óska ykkur öllum innihaldsríkar jólahátíðar og farsæls komandi árs.
Með hlýjum þökkum fyrir vináttu og væntumþykju á árinu sem er að líða,

Ingibjörg





 

Lionsfélagar í Lionsklúbbi Hólmavíkur minna á að jólakortakassinn góði verður  í Kaupfélagi Steingrímsfjarðar á Hólmavík til kl. 16:00 í dag. Í jólakortakassann er hægt að setja jólakort endurgjaldslaust sem eiga að berast á heimili á Hólmavík.

Lionsklúbburinn á Hólmavík sendir Strandamönnum og landsmönnum öllum hugheilar jóla- og nýárskveðjur með þökkum fyrir ánægjulega samfylgd á liðnum árum.

Frá og með áramótum verður 5 - 10% hækkun á öllum gjaldskrám sveitarfélagsins Strandabyggðar fyrir utan fasteignagjöld, sorphirðugjöld og gjöld í Tónskóla Hólmavíkur. Breytingum á gjaldskrám er ætlað að mæta verðlagsþróun og hækkandi rekstrar- og launakostnaði sem nýjir kjarasamningar kveða á um. Útsvarsprósenta ársins 2012 verður óbreytt eða 14,48%. Samanlögð rekstrarniðurstaða úr A- og B-hluta sjóðum sveitarfélagsins árið 2012 er áætluð kr. 2.014.000....
Meira

Jólatrésnefndin minnir á hið árlega jólaball sem haldið verður annan í jólum í Félagsheimilinu á Hólmavík. Jólaballið hefst kl. 14:00 og eru allir íbúar á Ströndum hjartanlega velkomnir! Boðið verður upp á ekta íslenska jólaballastemningu með skemmtilegum jólalögum undir stjórn Bjarna Ómars Haraldssonar skólastjóra Tónskólans, dansað verður í kringum jólatréð og vonandi sjá jólasveinar sér fært að kíkja í heimsókn - jafnvel með eitthvað góðgæti í poka?...
Meira

Lokað verður í Þróunarsetrinu á Þorláksmessu vegna vinnu við breytingar á rafmagni og símatengingum á neðstu hæðinni. Öll þjónusta í Þróunarsetrinu fellur niður á morgun vegna þessa.

Einnig verður lokað í eftirfarandi stofnunum vegna framkvæmdanna:

28. desember 2011
Skrifstofu sveitarfélagsins Strandabyggðar

29. desember 2011
Menningarráði Vestfjarða
Þjóðfræðistofu
Fræðslumiðstöð Vestfjarða
Náttúrustofu Vestfjarða