Framkvæmdir á neðstu hæðinni í Þróunarsetrinu á Hólmavík eru langt komnar en áætlað er að opna hæðina í mars. Ákveðið hefur verið að fullklára verkið og setja m.a. gólfefni strax í stað þess að bíða með það eins og til stóð í upphafi. Rýmið verður sem fyrr segir notað sem móttaka sveitarfélagsins Strandabyggðar, fundaraðstaða, fræðsluaðstaða auk þess sem það verður nýtt sem sýningar- og viðburðarými. Þá er fyrirhugað að framhaldsdeild á Hólmavík geti hafið starfsemi sína á neðstu hæðinni en sveitarstjórn samþykkti í kjölfar fundar með fulltrúa Mennta- og menningarmálaráðuneytisins nú í febrúar að sækja um til ráðuneytisins að framhaldsdeild verði opnuð á Hólmavík haustið 2013.

Þróunarsetrið á Hólmavík og Fræðslumiðstöð Vestfjarða koma að enduruppbyggingu neðstu hæðarinnar með sveitarfélaginu Strandabyggð auk þess sem sótt er um styrki í verkefnið.

Af gefnu tilefni vill Félagsþjónusta Stranda og Reykhólahrepps beina þeim tilmælum til ökumanna að vinsamlegast ekki leggja bílum sínum fyrir framan merkt bílastæði fyrir hreyfihamlað fólk fyrir utan Kaupfélag Steingrímsfjarðar á Hólmavík. Því miður hefur borið á því þegar hreyfihamlaðir einstaklingar hafa ætlað að nýta sér bílastæðið, að öðrum bílum er lagt fyrir framan það sem kemur í veg fyrir mögulega notkun á stæðinu.

Félagsþjónusta Stranda og Reykhólahrepps hvetur fyrirtæki og stofnanir til að taka Kaupfélag Steingrímsfjarðar sér til fyrirmyndar og bæta aðgengi fyrir hreyfihamlaða að þeirri þjónustu sem veitt er á Ströndum og Reykhólahreppi.

5 manna fjölskylda auglýsir eftir húsnæði til leigu í Strandabyggð frá og með næsta vori eða sumri. Fjölskyldan hefur áhuga á að flytja úr borginni og setjast að úti á landi og horfa til búsetu á Hólmavík eða nágrenni. Fjölskyldan er með hund. Allar upplýsingar eru vel þegnar í netfang Rannveigar Óskarsdóttur: raa1@hi.is 

Nú hefur sveitarfélagið Strandabyggð gefið öllum nemendum Grunnskólans á Hólmavík merkt endurskinsvesti til þess að tryggja öryggi þeirra í umferðinni. Mikilvægi þess að vera vel sýnilegur í umferðinni á jafnt við börn sem og fullorðna, hvort sem fólk er gangandi, hlaupandi eða hjólandi. Hildur Guðjónsdóttir aðstoðarskólastjóri fagnar því að Strandabyggð vilji tryggja að börnin okkar séu vel upplýst á dimmustu mánuðum ársins til að forða slysum. Börnin eru hvött til að nota vestið á leið til og frá skóla og við önnur tækifæri, til dæmis á leið í íþróttir og tómstundastarf.

Mikilvægt er að foreldrar og starfsfólk skóla hvetji og veiti því athygli hvort börnin þeirra séu sjáanleg í umferðinni og að foreldrar séu sjálfir til fyrirmyndar og noti endurskinsmerki. Hannes Leifsson yfirlögregluþjónn á Hólmavík kom og ræddi við börnin og fræddi okkur um hvernig hægt er að auka öryggi allra í umferðinni margfalt með því að nota þessi einföldu, léttu og þægilegu öryggistæki sem endurskinsvesti og endurskinsmerki eru. Börn sem eru með endurskin sjást miklu fyrr en ella eða í um 100 metra fjarlægð frá ökutæki. Nemendur fóru strax í vestin sín eins og sjá má á meðfylgjandi myndum og voru þakklát sveitarfélaginu fyrir umhyggjuna sem þeim hefur verið sýnd með þessari góðu gjöf og í þakkarskyni tóku þau lagið með viðstöddum.

Nýlega skrifaði sveitarfélagið Strandabyggð undir styrktarsamning við hið öfluga Skíðafélag Strandamanna. Í samningnum, sem er til þriggja ára og gildir því út árið 2014, er kveðið á um árlegan stuðning Strandabyggðar við Skíðafélagið ásamt endurgjaldslausum afnotum af húsnæðisaðstöðu í eigu sveitarfélagsins undir æfingar og aðra viðburði. Skíðafélagið hefur verið sérstaklega öflugt undanfarin ár í að efla veg og vanda skíðaíþróttarinnar á Ströndum, einkum og sér í lagi skíðagöngu. Í þeirri grein á félagið fólk í fremstu röð sem hefur náð góðum árangri á mótum, til dæmis á Andrésar Andar leikunum.

Við undirskrift samningsins kom fram í máli Rósmundar Númasonar, stjórnarmanns í Skíðafélaginu, að félagið stefnir á mikla uppbyggingu í Selárdal á komandi árum. Þar hefur félagið haft aðsetur undanfarin ár til æfinga og mótshalds. Þar á að reisa húsnæði til afnota fyrir iðkendur, hvort sem er við æfingar eða mótshald. Framtíð skíðaíþróttarinnar á Ströndum er því björt.