Ingibjörg Emilsdóttir hefur verið ráðin sem aðstoðarskólastjóri við Grunn- og Tónskóla Hólmavíkur út skólaárið 2012-2013. Ingibjörg er fædd árið 1975 og hefur starfað við Grunnskólann á Hólmavík frá árinu 2001. Þar hefur hún sinnt fjölbreyttum kennslustörfum undanfarin ár, m.a. íþróttakennslu, smíðakennslu og umsjónarkennslu í bekkjum. Undanfarinn vetur hefur hún séð um umsjónarkennslu í 5.-7. bekk.

Ingibjörg útskrifaðist með B.Ed. gráðu í grunnskólakennarafræðum frá Kennaraháskóla Íslands árið 2006. Hún hefur þegar tekið til starfa.

Æskulýðsvettvangurinn heimsækir Strandabyggð næsta fimmtudag, þann 22. nóvember, með fyrirlestur um einelti, forvarnir og úrvinnslu eineltismála. Fyrirlesturinn fer fram kl. 16:30-18:00 í Félagsheimilinu á Hólmavík. Það er Kolbrún Baldursdóttir sálfræðingur sem flytur fyrirlesturinn, en hann er byggður á nýútkominni bók hennar Ekki meir, sem er leiðarvísir í aðgerðum gegn einelti fyrir starfsfólk skóla, íþrótta- og æskulýðsfélög, foreldra og börn. Allir eru velkomnir á fyrirlesturinn - léttar kaffiveitingar verða í boði....
Meira

Nú nálgast aðventan og þá fara flestir að huga að jólagjöfum. Strandabyggð fær eins og oft áður góða gjöf frá vinum okkar í vinabæjarsveitarfélaginu Hole í Noregi, en þaðan koma þrír hressir gestir færandi hendi með fallegt jólatré sem verður sett upp á Hólmavík. Norðmennirnir verða á ferðinni dagana 9.-11. desember. Hér með er óskað eftir sjálfboðaliðum sem eru til í að taka þátt í móttökunni, t.d. með því að bjóða gistingu, bjóða í mat, skoðunarferðir eða aðra afþreyingu.  Fólkið mun gista tvær nætur og vilja helst gista saman á heimili. Áhugasamir mega hafa samband í s. 865-3838 eða 451-3510 eða í netfangið salbjorg@holmavik.is.

Föstudaginn 16. nóvember býður Héraðsbókasafn Strandasýslu á Hólmavík upp á hina árlegu bangsastund á bókasafninu. Bangsastundin hefst klukkan 16:30 og stendur í um klukkustund. 

Andrea Kristín Jónsdóttir sveitarstjóri mun lesa bangsasögu fyrir gesti. Síðan verður boðið upp á djús og bangsaköku og efnt til samkeppni um nafn á nýja bókasafnsbangsanum. Ungir sem aldnir eru minntir á að bjóða bangsa með á bókasafnið af þessu tilefni.

Allir velkomnir!

Gísli Sverrir Halldórsson dýralæknir í Búðardal mun sinna hreinsun á skráðum hundum á Hólmavík miðvikudaginn 14. nóvember n.k. Gísli verður við störf í áhaldahúsi Strandabyggðar milli kl. 16:00 og 18:00. Kattareigendur eru einnig minntir á nauðsyn þess að láta hreinsa ketti sína. Slík hreinsun er þó ekki innifalin í leyfisgjaldi. 

Þeir sem óska eftir annari dýralæknisþjónustu er velkomið að hafa samband við Gísla í síma 434-1122 eða 862-002.