Hildur Jakobína Gísladóttir hefur verið ráðin félagsmálastjóri á Ströndum og Reykhólahreppi. Hildur er með sálfræðimenntun frá Háskólanum í Utrecht í Hollandi og Háskóla Íslands auk þess sem hún hefur Mastersgráðu í viðskiptastjórnun (MBA próf)  frá Háskólanum í Reykjavík. Þá hefur hún lokið diplomanámi í stjórnendamarkþjálfun eða Coaching frá Háskólanum í Reykjavík.

 

Hildur Jakobína hefur undanfarin ár gegnt starfi forstöðumanns Fjölskyldudeildar Félagsþjónustunnar í Kópavogi en áður starfaði hún m.a. sem ráðgjafi hjá Barnavernd Reykjavíkur. Hildur hefur gegnt ýmsum trúnaðarstörfum m.a. á vegum Kópavogsbæjar. Hildur Jakobína er einnig stofnandi og ráðgjafi samtakanna ,,Litlir englar" sem eru samtök  fyrir fólk sem misst hefur börn sín í móðurkviði eða rétt eftir fæðingu og þeirra sem binda þurfa endi á meðgöngu vegna alvarlegs litningargalla.

Hildur mun hefja störf á næstunni og er hún boðin velkomin til starfa.

Á sveitarstjórnarfundi i gær, miðvikudaginn 12. janúar 2011, var samþykkt tillaga um flutning á skrifstofu Strandabyggðar í húsnæði Þróunarsetursins á Hólmavík að Höfðagötu 3, en það hús er í eigu sveitarfélagsins. Þegar leitað var eftir hugmyndum frá íbúum í haust um hagræðingu og sparnað í sveitarfélaginu komu fram tillögur um að flytja skrifstofuna frá Hafnarbraut 19 og nýta húsnæðið þar fyrir íbúð eins og áður var gert. Með þeim hætti gæti sveitarfélagið komið til móts við brýna húsnæðisþörf á Hólmavík og fengið jafnframt inn leigutekjur. Þá hefur slæmt aðgengi fatlaðra að skrifstofu Sveitarfélagsins að Hafnarbraut 19 mætt harðri gagnrýni. Skrifstofa Strandabyggðar verður staðsett á annarri hæð Þróunarsetursins og er aðgengi fatlaðra þar einnig ófullnægjandi. Sveitarstjórn sér möguleika á að bæta aðgengi í þvi húsnæði og verður það gert eins fljótt og auðið er.

Stefnt er að því að flutningarnir fari fram fyrir 1. febrúar n.k. og að húsnæðið að Hafnarbraut 19 verði tilbúið til útleigu á þeim tíma. Vonast er til að flutningarnir valdi sem minnstri röskun á þjónustu skrifstofunnar en viðbúið er að hún verði einhver.

 

Nýráðið starfsfólk hjá sveitarfélaginu Strandabyggð leitar eftir íbúðarhúsnæði á Hólmavík. Um tvær fjölskyldur er að ræða sem flytja til Hólmavíkur á næstu vikum og mánuðum. Tímabundið húsnæði til leigu kemur einnig til greina. Allar ábendingar má senda í netfangið holmavik@holmavik.is  eða hafa samband við skrifstofu Strandabyggðar í síma 451-3510.

Sveitarfélagið Strandabyggð tekur nú í janúar í notkun erindakerfið One Systems. Með kerfinu er á markvissan hátt unnt að halda utan um öll þau fjölmörgu erindi sem berast til sveitarfélagsins, afgreiðslu þeirra og vinnslu.  Kerfið auðveldar og sparar tíma við undirbúning og eftirvinnslu funda og heldur utan um þjónustu og verkbókhald í nýrri félagsþjónustu Stranda og Reykhólahrepps. Þá hjálpar kerfið sveitarfélaginu að uppfylla ýtrustu kröfur um upplýsinga- og gagnaöryggi. Með innleiðingu á kerfinu er horft til reynslu fjölmargra sveitarfélaga sem nota One Systems, m.a. nágrannasveitarfélaganna Súðavíkurhrepps og Reykhólahrepps.

Í byrjun árs voru helstu tölvukerfi sveitarfélagsins Strandabyggðar færð frá skrifstofu sveitarfélagsins til hýsingar hjá fyrirtækinu Tölvumiðlun. Með þessum hætti er unnt að tryggja öryggi mikilvægra gagna og spara endurnýjun á dýrum tölvubúnaði á skrifstofu Strandabyggðar. Þá auðveldar hýsingin aðgengi starfsmanna sveitarfélagsins að ákveðnum kerfum sem felur í sér vinnusparnað. Með færslu á hýsingu opnast einnig möguleikar á frekari breytingum og hagræðingu í tölvumálum sveitarfélagsins í framtíðinni.

Frá og með 1. febrúar 2011 fá starfsmenn sveitarfélagsins Strandabyggðar launaseðla senda á rafrænu formi inn á heimabanka sína og birtast þar undir rafræn skjöl. Ef sérstaklega er óskað eftir útprentuðum seðlum er hægt að senda póst á skrifstofa@holmavik.is  

Þá verða fundarboð og fundargögn sveitarstjórnar og nefnda á vegum sveitarfélagsins eingöngu send út í tölvupósti frá og með 1. janúar 2011.

Í nóvember s.l. var óskað eftir hagræðingar- og sparnaðarhugmyndum frá íbúum Strandabyggðar þar sem þessar hugmyndir komu m.a. fram. Með þessum hætti er unnt að draga úr pappírs- og sendingarkostnaði og spara launakostnað á sama tíma og stuðlað er að umhverfisvænni starfsemi.