Sorpsamlag Strandasýslu minnir á sorphreinsunardag á Hólmavík mánudaginn 17. janúar n.k. Íbúar eru hvattir til að moka frá tunnunum sínum.

Fundur 1176 í sveitarstjórn Strandabyggðar verður haldinn þriðjudaginn 18. janúar 2011 og hefst hann kl. 18:15. Fundurinn verður haldinn á skrifstofu sveitarfélagsins að Hafnarbraut 19 og verður það væntanlega síðasti sveitarstjórnarfundurinn sem haldinn verður þar en fyrirhugað er að skrifstofan verði flutt að Höfðagötu 3 fyrir 1. febrúar n.k.

Dagskrá fundarins má sjá hér.

Strandamenn óska strákunum okkar í íslenska handknattleikslandsliðinu góðs gengis á HM í Svíþjóð og senda þeim hamingjuóskir með sigurinn gegn Ungverjum í fyrsta leik þeirra á mótinu í dag. Áfram Ísland!

Í þessari viku hafa þrjár nefndir fundað í síðasta sinn og verða nú lagðar niður í núverandi mynd vegna breytinga á nefndum sveitarfélagsins. Menningarmálanefnd fundaði í síðasta sinn mánudaginn 10. janúar 2011 en í nefndinni voru Salbjörg Engilbertsdóttir formaður, Rúna Stína Ásgrímsdóttir, Lýður Jónsson, Ester Sigfúsdóttir og Steinunn J. Þorsteinsdóttir. 

Íþrótta- og tómstundanefnd fundaði í síðasta sinn miðvikudaginn 12. janúar 2011. Í þeirri nefnd voru Hildur Guðjónsdóttir formaður, Kristján Sigurðsson ritari, Vala Friðriksdóttir, Aðalbjörg Guðbrandsdóttir og Kristjana Eysteinsdóttir. Menningarmálanefnd og Íþrótta- og tómstundanefnd verða lagðar niður og í stað þeirra verður ein nefnd sett á laggirnar í hagræðingarskyni. Skipað verður í nýja nefnd á næsta sveitarstjórnarfundi þann 18. janúar n.k.

Miðvikudaginn 12. janúar 2011 hélt Félagsmála- og jafnréttisnefnd einnig sinn síðasta fund en í þeirri nefnd voru Hrafnhildur Guðbjörnsdóttir formaður, Bryndís Sveinsdóttir, Jóhanna Guðbrandsdóttir, Sverrir Guðmundsson og Rósmundur Númason. Ný sameiginleg Velferðarnefnd Árneshrepps, Kaldrananeshrepps, Strandabyggðar og Reykhólahrepps tekur við hlutverki Félagsmálanefndarinnar og jafnréttismálin verða færð inn í Atvinnumála- og hafnarnefnd. Fulltrúar fyrir hönd Strandabyggðar Í nýrri velferðarnefnd eru Hrafnhildur Guðbjörnsdóttir og Rósmundur Númason.

Sveitarfélagið Strandabyggð þakkar nefndarmönnum í nefndunum þremur kærlega fyrir unnin störf. 

Sveitarfélagið Strandabyggð leggur til eftirfarandi breytingu á 4. grein reglugerðar 999/2010, um úthlutun byggðakvóta til fiskiskipa fiskveiðiárið 2010/2011:

- Helmingi úthlutaðs byggðakvóta verði skipt jafnt á milli fiskiskipa

- Helmingi úthlutaðs byggðakvóta verði skipt eftir lönduðum afla síðasta fiskveiðiárs, 2009/2010

 

Í bréfi ráðuneytis dags. 22. desember 2010 kemur fram að ráðuneytið leggur ríka áherslu á að byggðakvóta sé landað til vinnslu innan viðkomandi byggðarlags/sveitarfélags. Sveitarstjóri og oddvitar hafa fundað með Magnúsi Bragasyni fiskverkanda á Hólmavík sem lýsir yfir eindregnum vilja til að taka á móti aflanum til vinnslu. Sveitarstjórn fagnar eflingu fiskvinnslu í Strandabyggð.

 

Í bréfi ráðuneytisins kemur einnig fram að í reglum ráðuneytisins hefur verið fellt niður 15 tonna hámark á fiskiskip og að gerð er krafa um að ekki hafi verið flutt meira aflamark í þorskígildum talið á fiskveiðiárinu 2010/2011 frá viðkomandi fiskiskipum en flutt hefur verið til þeirra þegar afhending aflamarks á sér stað.

 

Fiskistofa annast úhlutun byggðakvótans til fiskiskipa á grundvelli þeirra reglna sem um það gilda.