Á Hamingjudögum afhenti listamaðurinn Einar Hákonarson sveitarfélaginu Strandabyggð listaverk sem hefur hlotið nafnið Seiður. Unnið hafði verið að uppsetningu verksins undanfarnar vikur, en það setur sérstaklega mikinn svip á Hólmavíkurkauptún.

Ingibjörg Valgeirsdóttir veitti listaverkinu viðtöku fyrir hönd Strandabyggðar og skýrði frá því við sama tækifæri að Einar hefði hlotið Menningarverðlaun Strandabyggðar árið 2012, en tómstunda-, íþrótta- og menningarnefnd Strandabyggðar tók ákvörðun um verðlaunin sem nú voru veitt í þriðja sinn. Við óskum Einari innilega til hamingju með verðlaunin og Strandamönnum öllum til hamingju með hið glæsilega og seiðandi listaverk.

Nú eru Hamingjudagar á Hólmavík að baki. Hátíðin gekk frábærlega. Blíðviðri var alla helgina og mikill fjöldi fólks heimsótti Strandabyggð í hamingjuleit. Á laugardeginum var fjöldi sölubása í Fiskmarkaðnum, Leikhópurinn Lotta sýndi Stígvélaða köttinn á Klifstúni, fólk gat skoðað listsýningar, skellt sér í gokart, siglingu, á hestbak, til teiknara eða miðils svo fátt eitt sé nefnt.

Um kvöldið var síðan blásið til Hnallþóruhlaðborðs sem var afskaplega glæsilegt þetta árið. Hvanndalsbræður lokuðu síðan laugardagsskemtuninni með fjölsóttum dansleik í Félagsheimilinu. Hér með fréttinni gefur að líta fjölda svipmynda frá laugardeginum á Hamingjudögum.

Auglýst er tímabundið starf skólastjóra Grunn- og tónskólans á Hólmavík til eins árs, frá 1. ágúst 2012 - 31. júlí 2013.
Skólinn er samrekinn grunn- og tónlistarskóli sem leggur áherslu á tónlist og tjáningu í skólastarfi. Í skólanum er lögð áhersla á sveigjanlega og fjölbreytta kennsluhætti, einstaklingsmiðað nám og samvinnu. Sveitarfélagið Strandabyggð er að hefja úttekt á kostum og göllum sameiningar grunn-, leik- og tónskóla í sveitarfélaginu....
Meira

Í gærkvöldi hélt tónlistarmaðurinn og trúbadorinn KK frábæra tónleika á Klifstúni. Þeir stóðu yfir í klukkustund og var KK afskaplega vel tekið af fjölmenni sem hafði komið sér vel fyrir í brekkunni. Fyrr um kvöldið hafði töframaðurinn Ingó Geirdal heillað Strandamenn og gesti Hamingjudaga upp úr skónum með ótrúlegum töfrabrögðum á heimsmælikvarða og unga kynslóðin kíkt á Furðufataball í Bragganum.

Dagskrá Hamingjudaga heldur síðan áfram af fullum krafti í dag.

Í gær opnaði Strandastelpa, einstök sýning Ingibjargar Valgeirsdóttur í Hnyðju að Höfðagötu 3. Sýningin byggir á dagbókarskrifum og hugleiðingum Ingibjargar í ættleiðingarferli þegar hún og fjölskylda hennar ættleiddu litla stelpu frá Yangjiang í Kína árið 2006. Sýningin er afskaplega áhrifamikil og ekki var laust við að sæist í tár blika á hvarmi á nokkrum gestana við opnunina í gær, sem var vel sótt.

Sýningin verður opin yfir helgina frá kl. 13-17 báða daga.