Árið 2011 voru alls 366 fréttir birtar á vef Strandabyggðar eða að meðaltali 1 frétt á dag alla daga ársins. Er það fyrir utan fréttir á vef Grunn- og Tónskólans og leikskólans Lækjarbrekku þar sem fréttir birtast reglulga af starfsemi skólanna. Töluverð aukning var á fréttaflutningi á vef Strandabyggðar frá árinu áður en þá voru alls 69 fréttir birtar. Er þetta liður í þeirri stefnu sveitarfélagsins að auka upplýsingaflæði til íbúa og ljóst að sífellt má gera betur í þeim efnum.

Salti var landað á hafskipabryggjunni í Hólmavíkurhöfn í dag fyrir rækjuvinnsluna Hólmadrang. Verið er að endurnýja stálþil á bryggjunni en hún hefur verið lokuð frá því í september vegna framvkæmdanna sem eru í fullum gangi. Verktakinn Ísar ehf. undirbjó bryggjuna fyrir löndunina ásamt starfsmönnum hafnarinnar en Hólmadrangur greiðir kostnað vegna þessa. Að sögn Sigurðar Marinó Þorvaldssonar hafnarvarðar gekk löndunin mjög vel og er afar gott að geta orðið við þessari beiðni Hólmadrangs. Endurbætur á bryggjunni eru nauðsynlegar og til mikilla bóta fyrir alla hagsmunaaðila þar sem ástand hennar var orðið slæmt. Áætluð verklok vegna endurbyggingar stálþilsins eru 1. mars 2012 og verður farið í útboð á þekjunni í framhaldi af því.

Menntaþing verður haldið í Félagsheimilinu á Hólmavík fimmtudaginn 12. janúar 2012. Þingið hefst kl. 16:30, en þar verður fjallað um mikilvægi þroska og menntunar fólks á öllum aldursstigum. Þingið er liður í 100 ára afmæli skólahalds á Hólmavík. Afmælinu hefur m.a. verið fagnað með glæsilegri leiksýningu Grunn- og Tónskólans á Hólmavík þar sem nemendur og kennarar rifjuðu upp 100 ára sögu skólahaldsins í leikgerð Arnars S. Jónssonar tómstundafulltrúa Strandabyggðar. Þá hélt sveitarfélagið veglega afmælishátíð s.l. vor þar sem öllum íbúum og nágrannasveitarfélögum var boðið í afmælisfögnuð í Félagsheimilinu á Hólmavík. Á Menntaþingi verður horft til framtíðar og hvert er stefnt í skólahaldi á Ströndum.

Dagskrá Menntaþings á Ströndum 2012...
Meira

Í augum margra Árneshreppsbúa er 6. janúar ein óvinsælasta dagsetningin. Ástæðan er sú að nú er komið að þeim hluta ársins að vegurinn þangað verður ekki ruddur fyrr en vora tekur samkvæmt almanakinu. Nánar tiltekið 20. mars eða í 75 daga samfleytt. Ástæðan er sú að Árneshreppur fellur undir G-reglu um snjómokstur og er eina sjálfstæða sveitarfélag landsins sem þarf að lúta þeirri reglu. Þetta er afleitt, enda er aðeins ein akleið til og frá hreppnum. Undanfarin ár hefur ítrekað verið þrýst á að þessi leið verði færð á sama þjónustustig og í öðrum sveitarfélögum, en ekki hefur orðið af því enn að Árneshreppsbúar hafi verið losaðir úr klóm G-reglunnar.

Greinarhöfundur: Elísa Ösp Valgeirsdóttir

Fundur verður haldinn í Umhverfis- og skipulagsnefnd miðvikudaginn 11. janúar kl. 18:15. Vinsamlegast sendið erindi á fundinn til byggingarfulltrúa Gísla Gunnlaugssonar í netfangið gisli@tvest.is eða á skrifstofu Strandabyggðar að Höfðagötu 3, 510 Hólmavík. Erindi sem áður heyrðu undir byggingarnefnd heyra nú beint undir byggingarfulltrúa sem gefur frekari upplýsingar í síma 892 3952.