Byggðasamlag Vestfjarða um málefni fatlaðs fólks vekur athygli á rétti fólks til að sækja um styrki skv. 27. grein laga nr. 59/1992 um málefni fatlaðs fólks, með síðari breytingum. Byggðasamlaginu er heimilt að veita styrk til greiðslu námskostnaðar sem ekki er greiddur samkvæmt ákvæðum annarra laga, enda telst námið hafa gildi sem hæfing eða endurhæfing.

Einnig er heimilt að veita þeim sem eru 18 ára og eldri styrk til verkfæra og tækjakaupa í sambandi við heimavinnu eða sjálfstæða starfssemi, enda teljist starfsemin hafa gildi sem félagsleg hæfing eða endurhæfing sem miði að því að auðvelda fötluðum að skapa sér atvinnu.

Umsóknarfrestur er til 20. nóvember 2012. Umsóknir á Ströndum skulu berast til félagsþjónustu Stranda og Reykhóla. Umsóknareyðublöð má nálgast hjá félagsþjónustunni, en með því að smella hér má sjá reglur um styrkina.

Fræðslukvöld um barnsmissi verður haldið í Hólmavíkurkirkju í kvöld, fimmtudagskvöldið 8. nóvember kl. 20:00. Kvöldinu hefur áður verið frestað tvisvar sinnum. Um er að ræða fræðslu og spjall í notalegu umhverfi, ætlað fagfólki, foreldrum og öðrum aðstandendum. Hildur Jakobína Gísladóttir félagsmálastjóri Stranda og Reykhóla og stofnandi samtakanna Litlir englar flytur erindi og síðan gefst færi á að spjalla, deila reynslu sinni eða fá svör við fyrirspurnum. Að sögn Hildar er kvöldið ekki bara fyrir þá sem hafa upplifað barnsmissi, heldur alla sem upplifað hafa einhvers konar missi eða gengið í gegnum sorgarferli. Við hvetjum fólk til að mæta á þennan fróðlega og gefandi viðburð. 

Kynningarfundur um skátastarf verður haldinn í Hnyðju á Hólmavík í dag, miðvikudaginn 7. nóvmeber, kl 18:00. Á fundinn koma fulltrúar frá Bandalagi íslenskra skáta og skátafélaginu Stíganda í Dölunum og kynna skátastarf og skipulag þess. Ef áhugi reynist fyrir því hjá fundarmönnum, verður stofnun skátafélags á Hólmavík tekin fyrir í lok fundar.

Fundurinn er opinn öllum áhugasömum, bæði börnum og fullorðnum. Á fundinum verður börnum boðið að taka þátt í skemmtilegum leik - allir að mæta!

Ákveðið hefur verið að hafa Kolaportið í Félagsheimilinu á Hólmavík einnig opið mánudagskvöldið 5. nóvember kl. 18:00-21:00. Frábærlega tókst til í dag, fjöldi manns lét sjá sig, söluaðilar hafa sennilega aldrei verið fleiri og varningurinn var fjölbreyttur og nóg að bíta og brenna.

Það er Félagsmiðstöðin Ozon sem stendur fyrir Kolaportinu að þessu sinni. Þetta kom fram á strandir.is.

Kolaport verður haldið á morgun í Félagsheimilinu á Hólmavík, sunnudaginn 4. nóvember milli kl. 12:00-16:00. Það eru öflugir krakkar í Félagsmiðstöðinni Ozon sem standa fyrir viðburðinum sem er liður í fjáröflun fyrir starf miðstöðvarinnar í vetur. Í Kolaportinu verður líf og fjör. Það stefnir í að söluvarningar á boðstólum verði meiri en nokkru sinni fyrr, en meira en 20 aðilar hafa pantað pláss kolaportinu. Líklegt er því að söluaðilar dreifist því um allt hús.

Þeir sem vilja selja varning geta enn haft samband við Arnar Snæberg Jónsson í s. 894-1941 eða í netfangið tomstundafulltrui@strandabyggd.is. Eitt borð kostar kr. 1.000.- Söluaðilar geta mætt kl. 11:00 um morguninn til að stilla upp.