Lokaáfangi að hefjast á neðstu hæðinni
Framkvæmdir á neðstu hæðinni í Þróunarsetrinu á Hólmavík eru langt komnar en áætlað er að opna hæðina í mars. Ákveðið hefur verið að fullklára verkið og setja m.a. gólfefni strax í stað þess að bíða með það eins og til stóð í upphafi. Rýmið verður sem fyrr segir notað sem móttaka sveitarfélagsins Strandabyggðar, fundaraðstaða, fræðsluaðstaða auk þess sem það verður nýtt sem sýningar- og viðburðarými. Þá er fyrirhugað að framhaldsdeild á Hólmavík geti hafið starfsemi sína á neðstu hæðinni en sveitarstjórn samþykkti í kjölfar fundar með fulltrúa Mennta- og menningarmálaráðuneytisins nú í febrúar að sækja um til ráðuneytisins að framhaldsdeild verði opnuð á Hólmavík haustið 2013.
Þróunarsetrið á Hólmavík og Fræðslumiðstöð Vestfjarða koma að enduruppbyggingu neðstu hæðarinnar með sveitarfélaginu Strandabyggð auk þess sem sótt er um styrki í verkefnið.