Innskráning

Náttúrubarnahátíð á Ströndum helgina 11.-13. júlí

Það verður líf og fjör á Sauðfjársetrinu í Sævangi helgina 11.-13. júlí en þá verður Náttúrubarnahátíð á Ströndum haldin í níunda sinn. Hátíðin er fjölskylduhátíð sem fer að mestu fram utandyra og einkennist dagskráin af fjölbreyttri útivist, náttúrutúlkun, tónlist, listasmiðjum, fróðleik og fjöri fyrir náttúrubörn á öllum aldri.

Líkt og undanfarin ár er ókeypis að taka þátt í hátíðinni og öllum viðburðum hennar. Það er einnig frítt fyrir hátíðargesti að gista í tjaldi hjá gistihúsinu Kirkjubóli sem er rétt hjá Sævangi. Þar er þó ekki eiginlegt tjaldstæði og ekki aðgangur að rafmagni. Það er hins vegar frábært tjaldsvæði á Hólmavík þar sem er rafmagn og líka ýmsir gististaðir í nágrenninu.
Veitingasala er á Sauðfjársetrinu (Kaffi Kind) alla helgina og er þar nóg úrval af allskonar réttum bæði fyrir grænkera og aðra.

Dagskrána má sjá hér fyrir neðan:

Föstudagur 11. júlí
17:30 Fjölskyldu gönguferð í fjörunni
18:30 Setning hátíðarinnar og veðurgaldur
18:30 Hægt að kaupa súpu, grillaðar pylsur (grænmetis og ekki) og ís í Sævangi
19:00 Brúðubíllinn snýr aftur og sýnir stórskemmtilega sýningu
20:00 Æsispennandi Náttúrubarnakviss

Laugardagur 12. júlí
12:00 Náttúrujóga
13:00 Furðufuglaskoðun í fjörunni – tröllvaxinn flamingó fugl heimsækir Strandir
13:30 Náttúrufjör: Bogfimi, Strandahestar, kajakar, tilraunastofan, náttúrubingó, útieldun, heimur handritanna skoðaður með Árnastofnun, grillaðar pylsur og fleira
15:00 Náttúruóróasmiðja með Þykjó
16:30 Skemmtilegir útileikir á vellinum
18:00 Fuglafjör: Trítlað um teistuvarpið
18:00 Hægt að kaupa grillaðar pylsur og súpu
20:00 Fjölskyldutónleikar með Gunna og Felix
21:00 Drauga- og tröllasögur í Sagnahúsinu

Sunnudagur 13. júlí
11:00 Núvitundarævintýri
12:00 Elsa í Frozen heimsækir Náttúrubarnahátíðina
13:30 Hægt að kaupa grillaðar pylsur, súpu og ís
13:00 Skapandi náttúrusmiðja
15:00 Fjölskylduplokk

Hátíðin er styrkt af Uppbyggingasjóði Vestfjarða, Barnamenningarsjóði og Orkubúi Vestfjarða. Í ár er hún einnig haldin í góðu samstarfi við Árnastofnun, Fine Foods og Ferðaþjónustuna Kirkjuból.

Nánari upplýsingar má finna á Facebook viðburðinum, einnig er hægt að hafa samband við Dagrúnu Ósk á natturubarnaskoli@gmail.com eða í síma 661-2213.

Auglýst hafa verið nokkrar stöður við Grunnskólann á Hólmavík, í fríustund og við félagsmiðstöðina Ozon.
Umsóknarfrestur er til og með 13. júlí og ef smellt er á þessa slóð má sjá nánari upplýsingar. Vinsamlegast fyllið út formið sem er gefið upp neðst í auglýsingunni.

Kæru íbúar Strandabyggðar,  

Það er komið sumar og margt ber þess merki á Hólmavík þessa dagana. 

Í gær lauk rúmlega 600 km Vestfjarðagöngu Kristjáns Atla Sævarssonar, við félagsheimilið hér á Hólmavík.  Nokkur fjöldi fólks fagnaði þessu frábæra afreki með honum og eftir léttar veitingar, ræður og gott spjall, fór Kristján Atli og fjölskylda í súpu á Galdrasafninu, í boði Strandabyggðar.  Hér er hægt að lesa nánar um þetta frækilega afrek Kristjáns Atla í frétt RÚV.  Annar göngugarpur, Reynir Pétur, sem þekktur er m.a. fyrir sína göngu um Ísland fyrir um 40 árum, var einnig með til að fagna þessum áfanga.  

Það er vert að þakka kvennfélagskonum kærlega fyrir að taka að sér að setja niður blóm í blómakörin. Þau lífga sannarlega uppá bæinn.

Þá er komið frábært listaverk á vegg gengt Galdrasafninu eftir krakka sem voru á myndlistarnámskeiði nýlega hjá þeim Andra Frey og Einari! Frábært og vert að skoða.

Og að lokum má nefna og gleðjast yfir því að framkvæmdir við leikskólalóðina ganga vel!

Hér fylgja nokkrar myndir síðustu daga.

Áfram Strandabyggð!

Fótbolti, frjálsar, leikir, badminton, fimleikar við erum opin fyrir öllu.

 

Ungmennafélagið Geislinn leitar að þjálfara/þjálfurum til þess að sjá um íþróttaæfingar á vegum félagsins veturinn 2025 - 2026

 

Æskilegt er að æfingar séu á eftirfarandi tímum:

 Yngri hópur 13:45 – 14:30 Eldri hópur 14:45 – 15:45

 Þó erum við opin fyrir öðrum æfingatímum eins og kl. 16:00

Svæðisskipulagsnefnd Vestfjarða samþykkti fyrir hönd allra sveitarfélaga á Vestfjörðum, þann 26. maí 2025 vinnslutillögu Svæðisskipulags Vestfjarða 2026-2050.

 

Vinnslutillagan byggir á lýsingu svæðisskipulagsins sem kynnt var á samráðsfundum með íbúum á Vestfjörðum vorið 2024. Á grundvelli samráðsins vann svæðisskipulagsnefnd í samvinnu við sveitarfélögin, frumdrög svæðisskipulagsins og birtu þau undir lok sama árs. Í frumdrögum er kynnt sú framtíðarmynd að íbúum á Vestfjörðum fjölgi og verði að lágmarki 11.000 manns árið 2050.  

Í vinnslutillögu svæðisskipulagsins er sett fram framtíðarsýn og sameiginleg stefna sveitarfélaga á Vestfjörðum til ársins 2050, með tillögu að leiðarljósum og markmiðum á fimm málefnasviðum; náttúru og auðlindir, grunnkerfi, samfélagsauð, atvinnu og nýsköpun og menningarauð.  Óskað er umsagnar um þessar tillögur og annað efni vinnslutillögunar, til að móta endanlega svæðisskipulagstillögu sem áætlað er að verði sett fram í upphafi árs 2026.

Með vinnslutillögunni fylgja einnig drög að stöðumati tilögunnar þar sem tilgreind eru helstu forsendur skipulagstillögunnar.

Tillagan verður opin til umsagnar í Skipulagsgátt frá 6. júní til og með 20. ágúst  2025.    https://skipulagsgatt.is/issues/2024/603   

 

Nánari upplýsingar um birtingu tillögunnar má einnig finna á heimasíðu Vestfjarðastofu, www.vestfirdir.is

 

Svæðisskipulagsnefnd Vestfjarða.

Menningarverðlaun Strandabyggðar og heiðursverðlaun Strandabyggðar voru veitt við hátíðlega athöfn 17 júní við Íþróttamiðstöðina á Hólmavík. 

Heiðursverðlaun Strandabyggðar hlaut Aðalbjörg Þóra Þorsteinsdóttir fyrir margra ára óeigingjarnt starf í menningarsetrinu Strandakúnst. Aðalbjörg var ein af stofnendum handverksfélagsins Strandakúnst og hefur hún starfað hjá félaginu á hverju sumri í yfir 30 ár. Aðalbjörg var einnig formaður handverksfélagsins í 8 ár. Aðalbjörg er frumkvöðull, dugleg og með mikla ástríðu fyrir handverksfélaginu Strandakúnst. 

Menningarverðlaun Strandabyggðar hlaut Leikfélag Hólmavíkur fyrir metnaðarfullt menningarstarf í sveitarfélaginu og fyrir öflugt starf við uppsetningu og framsetningu á leiksýningunni 39 þrep. Leikfélag Hólmavíkur setti upp stóra og tilkomumikla leiksýningu sem var sýnd í Bragganum á Hólmavík fimm sinnum í vetur. Mikil vinna var sett í leikmynd, leikmuni, búninga og aðra umgjörð í kringum leiksýninguna. Þessi metnaðarfulla vinna leikfélagsins varð til þess að leiksýningin 39 þrep var valin áhugaverðasta áhugaleiksýning ársins af Þjóðleikhúsinu. Leikfélag Hólmavíkur sýndi því 39 þrep á stóra sviðinu í Þjóðleikhúsinu í lok maí. 

Bestu hamingjuóskir til verðlaunahafa.