Menningarmálanefnd Strandabyggðar hefur ákveðið að efna til lagasamkeppni vegna Hamingjudaga á Hólmavík 2010. Slík keppni var haldin fyrstu árin sem Hamingjudagar voru haldnir en féll niður í fyrra. Að þessu sinni er frestur til að skila inn lagi í keppnina til 3. maí næstkomandi og skal skila texta lagsins í síðasta lagi mánudaginn 3. maí., á skrifstofu Strandabyggðar eða í pósti, utanáskriftin er:
Hamingjudagar á Hólmavík-lagasamkeppni
Hafnarbraut 19
510 Hólmavík.
Að þessu sinni er heimilt að flytja lagið með eigin undirleik á úrslitakeppninni, svo ekki er nauðsynlegt að skila inn Demo eða lokaútgáfu lagsins.
Merkja skal texta með nafni lags og nafni og símanúmeri þess sem flytur lagið í úrslitakeppninni. Flytjandinn verður tengiliður höfundar varðandi undirbúning og flutning lagsins í lokakeppninni. Nafn höfundar ásamt heimilisfangi og símanúmeri skal fylgja með í lokuðu umslagi merkt með nafni lags og dulnefni höfundar.
Höfundur lagsins skuldbindur sig til að koma lokaútgáfu lagsins í þann búning sem hentar til spilunar í útvarpi fyrir 31. maí 2010.
Nánari upplýsingar gefur Kristín Sigurrós Einarsdóttir í síma 8673164 eða gegnum netfangið hamingjudagar@holmavik.is.

Fyrsti fundur Menningarmálanefndar Strandabyggðar með framkvæmdastjóra Hamingjudaga 2010 verður haldinn í dag kl 17. Í nefndinni sitja þau Jóhanna Ása Einarsdóttir, Rúna Stína Ásgrímsdóttir, Jón Halldórsson, Kristín Sigurrós Einarsdóttir og Salbjörg Engilbertsdóttir, sem kemur inn í nefndina eftir að Arnar S. Jónsson sagði sig nýverið úr henni vegna mikilla anna. Þá tekur Guðrún Guðfinnsdóttir sæti Kristínar í nefndinni, meðan hún gegnir stöðu framkvæmdastjóra Hamingjudaga í ár. Sem kunnugt er verða sveitarstjórnarkosningar í vor, en ákveðið var í vetur að nefndin starfaði engu að síður þar til framkvæmd og frágangi Hamingjudaga væri lokið.
Á fundinum í dag á meðal annars að velja nefndinni nýjan formann, ræða um hvort lagasamkeppni verði haldin í ár, ræða um hugsanlega aðkomu SEEDS sjálfboðaliðahóps að Hamingjudögum, tímasetja íbúafund vegna Hamingjudaga, ræða fyrstu dagskrárdrög, það er að segja hugmyndir sem fram hafa komið og viðra fleiri hugmyndir. Fundargerðir menningarmálanefndar eru birtar hér á vef Strandabyggðar um leið og þær hafa verið samþykktar af sveitarstjórn.

Laust fyrir páska var gengið frá ráðningu Kristínar S. Einarsdóttur sem framkvæmdastjóra Hamingjudaga árið 2010. Kristín gegndi starfinu einnig í fyrrasumar og hefur setið í Menningarmálanefnd Strandabyggðar frá upphafi. Hún hefur þegar hafið störf og mun eiga sinn fyrsta fund með Menningarmálanefnd á morgun, miðvikudag. Búið er að setja upp nýjan facebook aðgang fyrir Hamingjudaga og þar er óskað eftir hugmyndum að hljómsveitum og skemmtiatriðum fyrir börn.

Allt fór vel fram á fyrsta degi Hamingjudaga á Hólmavík sem hófust formlega í gærkvöldi. Meðal dagskrárliða í gær var fjölmennt mótorkrossmót í Skeljavíkurbraut, diskótek fyrir 12-16 þar sem DJ Danni hélt uppi stuðinu og varðeldur. Þá sá galdramaður Strandagaldurs um að setja hátíðina formlega. Þá voru stórtónleikar með Gunnari Þórðarsyni, sem er hólmvíkingur að uppruna  og kom nú í fyrsta skipti fram á Hamingjudögum. Þá léku þeir Bjarni Ómar og Stefán Jónsson fyrir dansi á Café Riis. Talið er að á fimmta hundrað manns hafi verið við varðeld og brekkusöng þar sem presthjónin Sigga og Gulli héldu upp fjörinu ásamt Gunnari Þórðarsyni. Að sögn Björgunarsveitarmanna var allt með friði og spekt á tjaldsvæðinu í nótt. Búast má við að gestum Hamingjudaga fjölgi jafnt og þétt í dag, en mikil skemmtidagskrá er framundan sem líkur með Hamingjudansleik í kvöld með hljómsveitinni Von. Á morgun verða síðan furðuleikar í Sauðfjársetri á Ströndum en þeir eru jafnan einn af hápunktum Hamingjudaga.

Hamingjuhlaup Stefáns Gíslasonar umhverfisfræðings og fyrrum sveitarstjóra á Hólmavík er ein af skemmtilegum nýjungum á hamingjudögum í ár. Stefán hefur undirbúið hlaupið vel og nú hefur hann fengið í lið með sér fimm aðra hlaupara sem ætla með honum alla leið frá Drangsnesi, en síðan er öllum velkomið að slást í för alla leið eða hluta út leiðinni. Lagt verður upp frá Drangsnesi kl 10:08 í fyrramálið. Nánari upplýsingar um tímaáætlun er að finna á þessari slóð.
...
Meira

Dagskrá Hamignjudaga hefur verið uppfærð hér á vefnum og verða veggspjöld með henni hengd upp á helstu viðkomustöðum og öðrum áberandi stöðum í bænum í dag. Í dagskránni er einnig að finna upplýsingar um fjölbreytta afþreyingu í boði á Hamingjudögum, opnunartíma þjónustufyrirtækja á staðnum, sýningar sem eru opnar yfir Hamingjudaga, ásamt vefslóðum með nánari upplýsingum um Strandabyggð og Hamingjudaga.

Það hefur verið venja að bjóða upp á sérstakan Hamingjudisk á Cafe Riis  um Hamingjudaga. Þessi girnilegi diskur inniheldur úrval gómsætra smárétta úr eldhúsi snilldarkokksins Báru á Riis. Menningarmálanefnd Strandabyggðar, sem stendur að baki Hamingjudögum, tók smá forskot á sæluna  nú í vikunni. Síðasti fundur nefndarinnar ásamt fulltrúa  frá áhaldahúsi og skrifstofu og framkvæmdastjóra Hamingjudaga, var haldinn á Café Riis og gæddu fundarmenn sér á Hamingjudisk í blíðskaparveðri á pallinum fyrir utan Café Riis.

Á laugardaginn kl 15 hefst draugadagur á Galdrasýningunni á Hólmavík. Galdramaðurinn góðkunni mun án efa kveða niður draug eins og honum einum er lagið. Þessi sami Galdramaður mun bjóða gesti Hamingjudaga velkomna á sérstakri setningarathöfn hamingjudaga sem hefst kl 23:15 á föstudagskvld við Galdrasýninguna.
Gestir Hamingjudaga eru hvattir til að sækja Galdrasýninguna heim um helgina, en þar verður meðal annars hægt að taka þátt í ratleik sem berst víðs vegar um Hólmavík. Á Kaffi galdri sem nýlega var opnað í veitingatjaldi við Galdrasýninguna er boðið upp á gómsætar veitingar, þar á meðal kraftmikla kjötsúpu sem enginn verður svikinn af.

Tónleikunum "Hver á sér fegra föðurland" sem fram fóru í Hólmavíkurkirkju fyrr í kvöld var gríðarlega vel tekið. Á tónleikunum komu fram Svavar Knútur, Helgi Valur og hljómsveitin Árstíðir. Voru þessir tónleikar hluti af ferð þeirra um landið og þeirra áttundu tónleikar á sjö dögum. Þeir fimmtíu gestir sem komu í kirkjuna fögnuðu ákaft í lok tónleika, enda sérlega einlægir tónlistarmenn þarna á ferð og flutningur þeirra vandaður. Myndir frá tónleikunum eru í myndasafni hér á vef Hamingjudaga.

Fyrsta keppnisgreinin í Vestfjarðavíkingnum fór fram í sundlauginni á Hólmavík í dag. Fjöldi fólks lagði leið sína þangað til að fylgjast með átökum kraftajötnanna sem fengu það verkefni að flytja tunnur með 120 lítrum af vatna úr miðri sundlauginni og koma þeim upp á bakkann. Ellefu keppendur taka þátt í þessari kraftakeppni í ár og héldu þeir ásamt fylgdarliði og sjónvarpsfólki áfram för sinni í Heydal strax eftir að keppni lauk á Hólmavík í dag. Blíðskaparveður var á Hólmavík í allan dag, eins og sjá má á myndum frá Vestfjarðavíkingnum sem er að finna í myndaalbúmi hér á vef Hamingjudaga.