Leikhópurinn Lotta hefur mætt á Hamingjudaga undanfarin tvö ár og sýnt fyrir mikinn mannfjölda á hátíðinni á Klifstúni - í blíðskaparveðri. Þessu góða samstarfi Hamingjudaga og leikhópsins verður áframhaldið í sumar (í sama góða veðrinu), en þá kemur Lottugengið með nýtt leikrit og sýnir það á Klifstúni kl. 14:00 laugardaginn 29. júní. Leikrit sumarsins heitir Gilitrutt og inn í það blandast ævintýrin Búkolla og Geiturnar þrjár. Það verður því sannkölluð tröllskessustemmning á Klifstúni í sumar! Ókeypis verður inn á sýninguna fyrir alla gesti Hamingjudaga.

Hér er Facebook-síða Leikhópsins Lottu - endilega "lækið" við hana og fylgist með afrekum þeirra í sumar!

Þó að enn séu rúmlega fimm mánuðir í Hamingjudaga er ekkert verið að tvínóna við hlutina. Nú er ljóst að það verður hin frábæra hljómsveit Á móti sól sem mun spila á Hamingjuballinu í sumar, nánar tiltekið laugardagskvöldið 29. júní.

Magni og félagar munu væntanlega mæta eiturhressir á svæðið með pottþétt prógramm sem enginn ætti að verða svikinn af, enda um að ræða eitt allra vinsælasta og þéttasta ballband á Íslandi mörg undanfarin ár. Það er því óhætt að vera miklu meira en spenntur fyrir Hamingjuballinu 2013.

Átján ára aldurstakmark verður á dansleikinn.

Einn stærsti atburðurinn á Hamingjudögum mörg undanfarin ár hefur verið Furðuleikar Sauðfjárseturs á Ströndum, en þar geta ungir sem aldnir mætt í Sævang og spreytt sig á alls konar furðulegum íþróttagreinum sem hafa sumar hverjar orðið landsþekktar í gegnum árin.

Í morgun var staðfest að engin undantekning verður gerð frá þessari frábæru reglu árið 2013 - Sauðfjársetrið mun halda sína frábæru Furðuleika með kaffihlaðborði og tilheyrandi sunnudaginn 30. júní í sumar.

Hamingjuhlaupið sem hefur vaxið og dafnað með hverju ári verður að sjálfsögðu á dagskrá Hamingjudaga árið 2013. Hlaupið verður frá Minja- og handverkshúsinu Kört í Trékyllisvík, alla leið til Hólmavíkur - rúmlega 53 km. leið. Allir geta tekið þátt í hlaupinu og hlaupið mismunandi vegalengdir í takt við eigin getu með því að byrja á fyrirfram ákveðnum áningarstöðum í hlaupinu. Allar upplýsingar liggja nú þegar fyrir, tímatafla, kort og annað á vefsíðu hlaupsins sem sjá má með því að smella hér.

Nú hefur verið tekin endanleg ákvörðun um dagsetningu á Hamingjudögum árið 2013. Hátíðin verður að þessu sinni haldin helgina 28.-30. júní. Hamingjudagar árið 2012 tókust frábærlega og mikil samstaða, kærleikur og hamingja sveif hvarvetna yfir Hólmavík og nágrenni meðan hátíðin stóð yfir. Því er full ástæða til að byrja að hlakka til Hamingjudaga árið 2013 - og fjölmenna síðan á hátíðina!

Nú eru Hamingjudagar á Hólmavík að baki. Hátíðin gekk frábærlega. Blíðviðri var alla helgina og mikill fjöldi fólks heimsótti Strandabyggð í hamingjuleit. Á laugardeginum var fjöldi sölubása í Fiskmarkaðnum, Leikhópurinn Lotta sýndi Stígvélaða köttinn á Klifstúni, fólk gat skoðað listsýningar, skellt sér í gokart, siglingu, á hestbak, til teiknara eða miðils svo fátt eitt sé nefnt....
Meira

Hamingjudagar hófust af fullum þunga í gær, föstudaginn 29. júní. Þá opnuðu tvær frábærar sýningar að viðstöðddu fjölmenni, sýning þeirra Bjarkar Jóhannsdóttur og Jóhönnu Stefánsdóttur í Ráðaleysi og sýning Ingibjargar Valgeirsdóttur í Hnyðju. Furðufataball barna var ágætlega sótt í Bragganum (leikvöllur leikskólans heillaði suma meira) og Ingó töframaður sló eftirminnilega í gegn með ótrúlega töfrasýningu í Félagsheimilinu að viðstöddum 130 manns. Lá við að sumir þyrftu áfallahjálp eftir sýninguna - svo mögnuð var hún!

KK sló síðan lokatón í föstudagsdagskrá Hamingjudaga með geysifjölmennum og vel heppnuðum tónleikum og fjöldasöng á Klifstúni.

Dagskráin heldur áfram í dag, skoðið hana hér! 

Í kvöld kl. 20:00 fer fram í Félagsheimilinu á Hólmavík einn af hápunktum Hamingjudaga 2012. Þá mætir á svæðið Ingó Geirdal töframaður með aldeilis magnaða töfrasýningu fyrir alla fjölskylduna. Ingó er einn allra magnaðasti töframaður heims og hefur sýnt sín ótrúlegu töfrabrögð á fjölda skemmtana og í sjónvarpsþáttum í Evrópu og Asíu. Á sýningunni, sem tekur um eina og hálfa klukkustund, mun Ingó bjóða upp á mögnuð töfrabrögð, hugsanalestur og sjónhverfingar á heimsmælikvarða, í töfrasýningu sem rokkar. Aðgangseyrir er aðeins kr. 1.500 fyrir 6 ára og eldri. Ekki missa af þessu!

Við erum svo heppin að frábærir listamenn sækja Hamingjudaga heim ár eftir ár. Í dag, föstudaginn 29. júní, verða tvær formlegar opnanir á sýningum á Hólmavík. Formleg opnun á myndlistarsýningunni Mæðgur og myndir sem sýnir glæsileg myndlistarverk mæðgnanna Bjarkar Jóhannsdóttur og Jóhönnu Stefánsdóttur er í Ráðaleysi kl. 16:00. Formleg opnun á sýningunni Strandastelpa, frá Yangjiang norður í Trékyllisvík eftir Ingibjörgu Valgeirsdóttur verður í Hnyðju kl. 17:00 í dag.

Allir gestir Hamingjudagar eru hjartanlega velkomnir á opnanir þessara glæsilegu sýninga. 

 

Hamingjugetraunin er komin í hús á Upplýsingamiðstöðinni og Galdrasýningunni á Hólmavík. Hún snýst um að giska á hversu mörg hjörtu eru í krukku sem staðsett er á sýningunni, skrifa giskið niður og skila því í þar til gerðan kjörkassa. Hver einstaklingur má bara giska einu sinni - tvö eða fleiri atkvæði ógilda þátttökuna. Verndarar leiksins eru hinir frábæru starfsmenn Galdrasýningarinnar - þau Sigurður Atlason, Anna Björg Þórarinsdóttir og Liisa Pipponen.

Kíkið á þau, fáið ykkur kynngimagnaðan krækling eða kaffisopa og takið þátt í Hamingjugetrauninni 2012!