Hamingjuhlaupið verður haldið í 11. sinn laugardaginn 29. júní 2019, en þetta hlaup tilheyrir flokki gleðihlaupa. Hlaupararnir halda yfirleitt hópinn og fylgja fyrir fram gerðri tímaáætlun sem svipar mjög til strætisvagnaáætlunar. Hlaupaleiðin er afskaplega breytileg frá ári til árs, en hlaupið er fastur liður í bæjarhátíðinni Hamingjudagar á Hólmavík. Að þessu sinni liggur leiðin úr Trékyllisvík til Hólmavíkur, samtals um 54,0 km. Þeir sem ekki treysta sér til að hlaupa alla leið geta valið sér hentuga búta úr leiðinni eftir "strætisvagnaáætluninni". Þess má geta að þessi sama leið hefur verið hlaupin tvisvar áður, þ.e. árin 2012 og 2013. Frásagnir frá þeim ferðalögum liggja einhvers staðar á internetinu.

Það er Stefán Gíslason, bóndasonur frá Gröf í Bitrufirði og fyrrum sveitarstjóri á Hólmavík, sem er upphafsmaður Hamingjuhlaupsins. Sagan segir að þátttakendur öðlist mikla hamingju að hlaupi loknu. Ekki er þörf á að skrá sig í hlaupið, en snjallt að láta vita af sér með fyrirvara.

Hamingjuhlaupið 2019 hefst kl. 8:00 umræddan laugardagsmorgun við handverkshúsið Kört í Trékyllisvík. Leiðin liggur þaðan yfir Naustvíkurskörð til Reykjarfjarðar, eftir veginum inn Reykjarfjörð til Djúpavíkur, þaðan yfir Trékyllisheiði að Bólstað í Steingrímsfirði og loks þaðan eftir veginum til Hólmavíkur. Gert er ráð fyrir að hlaupararnir verði komnir á leiðarenda þegar Hamingjudagar standa sem hæst, nánar tiltekið kl. 15.45. Nánari tímaáætlun er sem hér segir:

Kort af hlaupaleiðinni ( í grófum dráttum)

Nákvæmara kort með áfangaskiptingu og tímaáætlun