Hamingjuhlauparar nálgast endamarkið árið 2011 - ljósm. Gunnlaugur Júlíusson

Stefán Gíslason hlaupagikkur, bóndasonur og umhverfisfræðingur í Borgarnesi er upphafsmaður Hamingjuhlaupsins. Hlaupið er afar viðeigandi á hátíðinni, því góð hreyfing er í sterkum tengslum við andlega og líkamlega heill og hamingju þeirra sem hana stunda. Hamingjuhlaupið er skemmtihlaup og því eru allir sigurvegarar sem taka þátt í hlaupinu. Ekki þarf að skrá þátttöku í hlaupið, og kjörið er fyrir þá sem treysta sér ekki alla leið að hlaupa hluta af leiðinni. 

Árið 2012 verður hlaupið frá Árnesi í Trékyllisvík til Hólmavíkur. Hlaupið hefst við Minja- og handverkshúsið Kört við Árnes í Trékyllisvík, öðrum þræði til heiðurs sveitarstjóra Strandabyggðar, Ingibjörgu Valgeirsdóttur, sem er frá Árnesi.

Hlaupið í heild sinni er um 53 km og gæti tekið rúmar 7 klukkustundir að sögn Stefáns. Þeir sem ekki treysta sér í jafn langt hlaup og þetta geta vitaskuld byrjað á fyrirfram ákveðnum áningarstöðum í hlaupinu. Stefán hefur sett upp fyrstu drög að tímatöflu hlaupsins, en nákvæmari tafla verður gefin út þegar nær dregur hlaupi:

1. Lagt upp frá Árnesi 2 (Kört) 

2. Naustvíkurskörð frá Árnesi í Reykjarfjörð, um 5 km. (Gæti tekið um 50 mín)
3. Eftir veginum inn Reykjarfjörð að Djúpavík, um 10,5 km. (Gæti tekið allt að 1:10 klst)
4. Trékyllisheiði frá Djúpavík að Bólstað í Steingrímsfirði, um 21,5 km. (Gæti tekið um 3:30 klst)
5. Frá Bólstað til Hólmavíkur, um 16 km. (Gæti tekið um 1:40 klst)

++++

Árið 2011 var lagt upp frá Gröf í Bitrufirði, hlaupið norður yfir Bitruháls, þaðan yfir Deildarskarð og síðan frá Heydalsá að hátíðarsvæðinu á Hólmavík þar sem mikill mannfjöldi tók á móti hlaupurum. Aldrei hafa fleiri tekið þátt í hlaupinu, en alls voru þátttakendur 16 talsins. Lengd hlaupsins var um 35,5 km.
Hér má lesa frásögn Stefáns Gíslasonar um Hamingjuhlaupið 2011.
Hér má lesa frásögn Gunnlaugs Júlíussonar um Hamingjuhlaupið 2011.


Árið 2010 var hlaupið frá vegamótum í Reykhólasveit, þar sem beygt er upp á hinn nýja veg um Þröskulda. Vegalengd þess hlaups var um 31 kílómetri. 
Hér má lesa frásögn Stefáns Gíslasonar um Hamingjuhlaupið 2010.


Árið 2009 hljóp Stefán ásamt öðrum hlaupagörpum frá Drangsnesi, alls um 34,5 km.
Hér er lýsing Stefáns Gíslasonar á fyrsta Hamingjuhlaupinu sem fór fram árið 2009.