Framundan eru spennandi og erilsamir tímar hjá fjárbændum en formlegar fjárleitir hefjast í Strandabyggð föstudaginn 11. september og  munu standa yfir með reglulegu millibili fram í október. Mikið er um að vera og mörg handtökin sem þarf að vinna en um leið er alltaf gaman að heimta fé af fjalli og sjá afrakstur sumarsins koma í ljós.

Leitar- og réttardagar eru skemmtilegir samkomudagar í sveitunum okkar þar sem saman kemur fjöldi fólks, jafnt heimamenn og gestir. Börnum jafnt sem fullorðnum þykir spennandi að mæta í réttir til að fylgjast með og hjálpa til. Gott er að allir hafi það í huga að spenningur er mikill hjá öllum, jafnt ungum sem öldnum og vönum sem óvönum og því mikilvægt að við tökum tillit til hvers annars. Það er í okkar eigin höndum að skapa góða stemningu og góðar minningar.

Þeir sem eru áhugasamir um að komast í smalamannskur geta haft samband við leitarstjóra/fjallkóng og boðið fram aðstoð sína, sjá upplýsingar í Fjallskilaseðli Strandabyggðar um leitarsvæði, leitarstjóra og tíma.

Réttað verður í Strandabyggð sem hér segir:

• Skeljavíkurrétt laugardaginn 12. september kl. 16:00
• Staðarrétt sunnudaginn 13. september kl. 14:00
• Krikjubólsrétt sunnudaginn 20. september kl. 14:00
• Réttað er í Broddanesi sunnudaginn 20. september kl. 16:00

Allar frekari upplýsingar um leitir er að finna í Fjallskilaseðli fyrir árið 2015.