A A A

Valmynd

Fréttir

Skólastarf

Skólanámskrá Tónskólans á Hólmavík

Námsframboð og kennsluhættir

 

Yfirlit yfir námsframboð skólans.

 

Hljóðfæri í boði og aldurstakmark:

Fiðla – 4 ára

Blokkflauta – 4 ára

Píanó – 6 ára

Rytmískt píanó – 8 ára

Gítar – 7 ára

Rytmískur gítar - 7 ára

Ukulele – 7 ára

Rafbassi – 10 ára

Einsöngur – 8 ára

Klarinett – 8 ára

Þverflauta – 8 ára

Saxófónn – 10 ára

 

Tónfræðagreinar í boði:

Það er ætlast til að allir hljóðfæra- og söngnemendur á grunnskólaaldri sem eru í 4. bekk og eldri mæti vikulega í sérstaka tónfræðitíma. Yngri nemendur (4.-6. bekkur) mæta saman í 40 mínútna tónfræðitíma á viku og eldri nemendur (8.-10.bekkur) mæta saman í 40 mínútna tónfræðitíma á viku. Tónfræðikennarar haga tímunum þannig að nemendur af blandaðri tónfræðigetu geti nýtt tímana saman, þannig að ekki þurfi sérstaka tíma til dæmis fyrir þá nemendur sem eru að vinna í 2. Ópusbók). Tónheyrnarkennsla fer fram í sömu tímum.

Eðlileg framvinda náms gerir ráð fyrir því að að þremur árum liðnum geti nemandi þreytt grunnpróf í tónfræði og að grunnþekking til miðprófs í tónfræði taki þrjú ár til viðbótar. Þó er hægt að ljúka náminu hraðar.

Tímasetning fastra vikulegra tónfræðitíma er kynnt að hausti hvert ár.

Þessir vikulegu hóptónfræðitímar eru foreldrum og nemendum að kostnaðarlausu fyrir utan kostnað við bækur.

 

Hópstarf í boði:
Hópstarf í leikskóla, sameiginleg æfing allra tónskólanemenda í leikskóla í 20 mínútur vikulega.

Barnakór (2. til 6. bekkur), æfing einu sinni í viku í 45 mínútur í senn.

 

Yngra samspil (1. til 4. bekkur), æfing einu sinni í viku í 40 mínútur í senn.

 

Eldra samspil - Rokkband (7. til 10. bekkur), æfing einu sinni í viku í 35 mínútur í senn.

 

Óformlegt samspil nemenda, til dæmis fyrir sérstök verkefni og tónleika, ekki fastar vikulegar æfingar.

 

Skipulag og kennsluhættir

Skólagjöld fyrir nám við Tónskólann eru innheimt af skrifstofu Strandabyggðar skv. gildandi verðskrá sveitarfélagins. 

Starfsmenn Tónskólans á Hólmavík starfsárið 2020-2021:
Hrafnhildur Guðbjörnsdóttir, skólastjóri. 

Bragi Þór Valsson, aðstoðartónlistarskólastjóri (kennsla á klarinett, saxófón, þverflautu, söng, trommur, píanó, rytmískt píanó, gítar, rafbassa, samspil, barnakór, rokkband, tónfræði og tónheyrn).

Vera Ósk Steinsen, tónlistarkennari (kennsla á fiðlu, blokkflautu, söng, píanó, gítar, ukulele, samspil, tónfræði, tónlistarsaga og hljóðfærakennsla í leikskóla).


Umsóknarferli:

  • Að hausti er auglýst á vef skólans hvaða hljóðfæri og tónfræðagreinar verða í boði þann veturinn og einnig er auglýstur hlekkur á rafræna skráningarsíðu og umsóknarfrestur tiltekinn.  Skólinn áskilur sér rétt til að auglýsa strax að vori og árétta svo auglýsinguna um haustið, því loka þarf umsóknum á allra fyrstu dögum haustannar svo hægt sé að smíða stundatöflur.
  • Þegar farið er yfir umsóknir fá þeir forgang sem eru að sækja um áframhaldandi nám frá fyrri vetri en þó fá þeir eingöngu forgang sem sóttu um áður en auglýstur umsóknarfrestur rann út.
  • Ekki þarf sérstaklega að sækja um til að fá að taka þátt í hópastarfi skólans eins og barnakór og rokkbandi.
  • Hægt er að biðja um að hefja hljóðfæra- eða söngnám á öðrum tíma en í upphafi haustannar, að því tilskyldu að tónlistarkennararnir séu ekki þegar fullbókaðir.
  • Um sum hljóðfæri gildir aldurstakmark, til dæmis á blásturshljóðfæri sem erfitt er að spila á þegar barnið er eingöngu með barnatennur. Þetta aldurstakmark er tekið fram þegar umsóknarferlið er auglýst.
  • Hjá elsta árgangi leikskólabarna er yfirleitt boðið upp á nám á blokkflautu. Hvert leikskólabarn fær svo einn 20 mínútna einkatíma á viku og einn 20 mínútna hóptíma með hinum börnunum sem hafa valið sama hljóðfæri.
  • Börn í 1. og 2. bekk grunnskóla sem sækja um fullt nám fá tvo 20 mínútna einkatíma á viku.
  • Börn í 3. bekk grunnskóla og eldri og eins fullorðnir nemendur sem sækja um fullt nám fá samtals kennslu í eina klukkustund á viku, yfirleitt skipt í tvær hálftímakennslustundir.

 

Kennsla fer að mestu fram í húsnæði Tónskólans að Skólabraut 20-22. Leikskólabörn fá þó sína kennslu í húsnæði Leikskólans Lækjarbrekku. Allir nemendur í 3. bekk og eldri, sem skráðir eru í fullt nám, fá tvær 30 mínútna kennslustundir á viku.  Lengra komnir geta þó sótt einn 60 mínútna kennslutíma á viku ef kennari telur það henta betur.

Þegar nemendur komast ekki til skóla vegna veðurs eða annarra aðkallandi aðstæðna reyna kennarar að bjóða upp á fjarkennslu í staðinn í gegnum tölvu og þá getur nemandinn sótt sinn hefðbunda kennslutíma að heiman. Þó skal tekið fram að ekki er hægt að kenna hljóðfæraleik á sama hátt í fjar- og í staðkennslu.

 

Tónleikahald

Formlegir tónleikar eru haldnir í jólamánuðinum og að vori. Ef mjög margir nemendur eru skráðir til náms gæti Tónskólinn ákveðið að skipta hópnum niður á nokkra styttri tónleika í stað einna langra. 

Allir tónleikar eru auglýstir á vefsíðu skólans og eftir atvikum í öðrum miðlum.

 

Aðrar óformlegar framkomur, til dæmis á dvalarheimilinu eða með gestalistamönnum, eru haldnar öðru hvoru. Stefnt er á að allir nemendur komi fram á tvennum tónleikum á ári en ef nemandi treystir sér alls ekki til að leika á tónleikum er í samráði við foreldra eða forráðamenn hægt að ákveða að nemandinn fái sleppa því en hann undirbýr engu að síður tónleikalag eða tónleikaverk sem ætlast er til að sé tilbúið á sama tíma aðrir nemendur eru tilbúnir fyrir tónleika.


Starfstími skólans

Starfstími Tónskólans er hinn sami og starfstími Grunnskólans og fer eftir sama skóladagatali. Þó hefst kennsla í Tónskólanum nokkrum dögum síðar að hausti vegna þess aukatíma sem fer í að sníða til stundatöflur tónlistarnemenda.

Vorpróf, stigspróf og áfangapróf

Allir nemendur skólans gangast undir innra próf að vori (eigi síðar en í lok maí). Sjá nánari útlistun hér að neðan.

Þeim nemendum sem eftir því sækjast stendur til boða að taka formleg áfangapróf (grunnpróf, miðpróf, framhaldspróf) sem skilgreind eru í aðalnámskrá fyrir tónlistarskóla frá Menntamálaráðuneytinu. Vegna smæðar Tónskólans á Hólmavík koma gætu nemendur þurft að ferðast til Reykjavíkur eða annarra sveitarfélaga til að þreyta þessi áfangapróf. Til eru sérstakar námskrár fyrir hvert hljóðfæri og er það tónlistarkennarans að undirbúa nemanda fyrir þessi áfangapróf eftir nákvæmum skilgreiningum í viðkomandi námskrám.

Athugið að Prófanefnd tónlistarskóla leggur á gjald fyrir grunnpróf, miðpróf og framhaldspróf í hljóðfæraleik og söng og eins fyrir miðpróf í tónfræði. Tónskólinn á Hólmavík tekur ekki þátt í þessum kostnaði og fellur hann því á nemandann. Skv. verðskrá Prófanefndar árið 2021 er gjaldið kr. 10.300 fyrir grunnpróf, kr. 15.300 fyrir miðpróf og kr. 19.900 fyrir framhaldspróf. Verðið fyrir miðpróf í tónfræði eru kr. 5.700.

Stjórn skólans

Aðstoðarskólastjóri Tónskólans ber ábyrgð á daglegri stjórn skólans í umboði skólastjóra. Stefnumótun er í höndum aðstoðarskólastjóra, skólastjóra og fræðslunefndar Strandabyggðar.

 

Próf og námsmat

Tónskólinn er aðili að Prófanefnd tónlistarskóla og nemendum stendur til boða að taka samræmd áfangapróf, þ.e. grunnpróf, miðpróf og framhaldspróf. Einnig leggur skólinn sterklega til að flestir nemendur þreyti stigspróf á milli samræmdu prófanna. Þau próf eru haldin innan skólans seint á vorönn.

 

Áður en nemendur fara í grunnpróf ljúka þeir 1. og 2. stigi í skólanum. Fyrir miðpróf bjóðum við upp á að nemendur ljúki 4. stigs prófi og fyrir framhaldspróf að þeir taki 6. stigs próf. Til þess að mega fara í stigs- eða áfangapróf þurfa nemendur að hafa lokið tónfræðinni sem tilheyrir næsta stigi á undan og til þess að fá fullgild próf þurfa þeir að hafa lokið tónfræðinni sem samsvarar því stigi sem þau taka.

 

Auk stigs- og áfangaprófa fá nemendur skriflega umsögn frá hljóðfæra- og söngkennurum sínum að vori. Nemendur fá einnig einkunnir í tónfræðagreinum. Ekki er skráð námsmat í forskóla, en nemendur í honum fá viðurkenningu að vori fyrir að hafa lokið forskólanum.

 

Athugið að það er ákvörðun tónlistarkennara hvort nemandi telst tilbúinn í stigspróf því allir nemendur læra á mismunandi hátt og ekki allir nemendur ná sömu færni á sama hraða. Ef kennari ákveður að nemandi ætti að fara í stigspróf hafa foreldrar eða forráðafólk þó rétt á því að biðja um að viðkomandi nemandi þreyti ekki prófið.

 

Allir nemendur skólans gangast undir innra próf að vori (eigi síðar en í lok maí) þar sem leiknir eru tónstigar, tækniæfingar og lög eða tónverk auk prófs í tónheyrn. Miðað er að mestu við stigakerfi Associated Board of the Royal Schools of Music (ABRSM) og bækur frá þeim notaðar fyrir viðmið í tónstigum og tækniæfingum. Nemendur á trommusett leika lög úr stigsbókum Trinity Rock & Pop kerfisins.

 

Einkunn er gefin af 100 mögulegum stigum ásamt umsögn og hvorutveggja afhent á skjali til nemenda/forráðamanna.

Að vori fá nemendur skriflega umsögn frá kennara sínum þar sem tekið er fram hver verkefni vetrarins voru og hvernig ástundun og tónlistarlegar framfarir nemandans voru. Hér koma einnig einkunnir úr vorprófi fram.

Aðrar upplýsingar

Aðbúnaður og aðstaða í skólanum: Tónskólinn hefur aðstöðu í tveimur kennsluherbergjum í kjallara húsnæðis Grunnskólans og hljóðfærakostur skólans er ágætur. Kennsla fer þar að jafnaði fram mánudaga til miðvikudaga sömu vikur og starf fer fram í Grunnskólanum en ábyrgir og vinnusamir nemendur geta samið um við aðstoðartónlistarskólastjóra að fá aðgang að herbergjunum til að æfa sig utan kennslutíma.

 

Skrifstofutími: Tónskólinn hefur engan auglýstan skrifstofutíma en hægt er að ná í kennara skólans og skólastjóra í tölvupósti og eftir atvikum í síma.

 

Leiga á hljóðfærum: Nemendum sem læra á hljóðfæri við Tónskólann á Hólmavík býðst að leigja hljóðfæri til að taka með sér heim til æfinga. Hljóðfærin eru leigð út eina önn í senn og verðið fylgir gjaldskrá Strandabyggðar. 
Foreldrar eða forráðafólk bera ábyrgð á hljóðfærinu og skuldbinda sig til að greiða Tónskólanum viðgerðarkostnað eða andvirði nýs hljóðfæris ef hljóðfærið skemmist eða eyðileggst í þeirra umsjón eða umsjón barns þeirra.

 

Ástundun: Þau börn sem eru í námi í Tónskólanum og eiga heimili á þjónustusvæði Grunnskólans koma gjarnan í tónlistartíma á hefðbundnum skólatíma og því er óhjákvæmilegt að þau börn missi eitthvað af kennslustundum í Grunnskólanum.  Vakin er athygli á því að ætlast er til að viðkomandi börn séu sjálf nógu skipulögð til að vinna upp þá vinnu sem tapaðist við að missa af þessum kennslustundum og foreldrar aðstoði þau við það.

 

Samskipti við heimili: Kennarar tónskólans eru í samskiptum við foreldra og forráðafólk nemenda (og í tilfellum fullorðinna nemenda við nemendurna sjálfa) eftir ýmsum boðleiðum – símtölum og ýmsum rafrænum aðferðum. 
Foreldrar eru hvattir til hafa samband við tónlistarkennarana í tölvupósti til að spyrjast fyrir um námsframvindu, ráðgjöf fyrir heimaæfingar og annað sem viðkemur náminu.

 

Samvinna í skólastarfi: Tónskólinn vinnur að ýmsum verkefnum í samstarfi við Grunnskólann, leikskólann, gestakennara, aðra tónlistarskóla og Leikfélag Hólmavíkur.

 

Sérstök viðfangsefni: Tónskólinn á Hólmavík býr við þá sérstöðu að starfa innan sameinaðs skóla Strandabyggðar og er þar af leiðandi aðili að ýmiskonar samstarfi milli skólanna þriggja. Það er stefna sameinaðs skóla að leggja áherslu á góð samskipti og samstarf milli stjórnenda og að hagur nemenda sé ávallt hafður að leiðarljósi.

 

Skólareglur: Almennar skólareglur Grunnskólans gilda í Tónskólanum.  Auk þess skulu nemendur ganga um hljóðfæri og annan búnað Tónskólans af virðingu og hlýða fyrirmælum tónlistarkennara varðandi umgengni í kringum hljóðfærin og í húsnæði Tónskólans almennt.


Mars 2021

 

Könnun

Facebook

Atburđadagatal

« Mars 2021 »
S M Ţ M F F L
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Nćstu atburđir

Vefumsjón