• 1. Skýrsla oddvita.
• 2. Gjaldskrár sveitarfélagsins.
• 3. Fundargerð Landbúnaðar- og dreifbýlisnefndar dags. 18. ág. 2010.
• 4. Fundargerð Félagsmála- og jafnréttisnefndar dags. 19. ág. 2010.
• 5. Fundargerð Umhverfis- og náttúruverndarnefndar dags. 19. ág. 2010.
• 6. Fundargerð Tómstunda- og íþróttanefndar dags. 19. ág. 2010.
• 7. Fundargerð Fræðslunefndar dags. 23. ág. 2010.
• 8. Fundargerð Atvinnumála- og hafnarnefndar dags. 23. ág. 2010.
• 9. Bréf frá Árna Daníelssyni dags. 19. ág. 2010 um stiga með handriði frá Heilbrigðisstofnun á Borgabraut niður í hvamminn fyrir neðan.

Þá var gengið til dagskrár.

1. Skýrsla oddvita.

Í skýrslu oddvita er fjallað um framkvæmdir í sveitarfélaginu og þar kemur m.a. fram að lokið er við uppsetningu á nýrri girðingu neðan við skólavöll. Búið er að skipta um járn á þaki Skólabrautar 18, en ekki verður farið í aðrar framkvæmdir þar alveg á næstunni. Lagað hefur verið til við Kópnesbraut og sett grjót við grasblett við bátarennu. Búið er að teikna upp grunnmynd af neðstu hæð Þróunarseturs á Höfðagötu 3 og röramyndavél kemur í næstu viku til að mynda lagnir þar og í Grunnskóla og e.t.v. víðar. Byrjað er að rífa gömlu útihúsin í Brandskjólum.

 
Þá kemur fram í skýrslu oddvita að boðaður hefur verið fundur forsvarsmanna Orkubús Vestfjarða og sveitarstjórnarmanna á Ströndum og í Reykhólahrepp nk. fimmtudag á Café Riis. Í framhaldi af því hafa oddvitar boðað  sveitarstjórnarmenn á Ströndum til súpufundar sama dag kl. 20:00 til að ræða um samstarf sveitarfélaganna.

Unnið hefur verið að skriflegum samningum tengdum skólastarfi, varðandi Skólaskjól, mötuneyti og skólaakstur í Djúp. Samningagerð vegna mötuneytis er lokið og var samið við Café Riis ehf um skólamáltíðir í grunnskóla og leikskóla og skömmtun þeirra í Grunnskólanum.

2. Gjaldskrár sveitarfélagsins.

Lögð fram til seinni umræðu tillaga að gjaldskrá fyrir afgreiðslu og þjónustu vegna skipulags og byggingarmála og tengigjalds veitna í Strandabyggð. Samþykkt samhljóða.

3. Fundargerð Landbúnaðar- og dreifbýlisnefndar dags. 18. ág. 2010.

Lögð fram til samþykktar fundargerð Landbúnaðar- og dreifbýlisnefndar dags. 18. ág. 2010, ásamt Fjallskilaseðli fyrir árið 2010. Varðandi lið 2b í fundargerðinni er samþykkt að ræða við Kaldrananeshrepp um tilhögun og skipa síðan búfjáreftirlitsnefnd hið fyrsta. Lið 2c um hækkaðan vetrarkvóta á refaveiðum og lið 2g um nýja rétt í Kollafirði er vísað til gerðar fjárhagsáætlunar fyrir árið 2011, en ekki tekin ákvörðun að sinni. Fundargerðin samþykkt að öðru leyti og fjallskilaseðillinn staðfestur.

4. Fundargerð Félagsmála- og jafnréttisnefndar dags. 19. ág. 2010.

Fundargerð Félagsmála- og jafnréttisnefndar dags. 19. ág. 2010 lögð fram til samþykktar. Fundargerðin samþykkt samhljóða.

5. Fundargerð Umhverfis- og náttúruverndarnefndar dags. 19. ág. 2010.

Fundargerð Umhverfis- og náttúruverndarnefndar dags. 19. ág. 2010 lögð fram til samþykktar. Fundargerðin samþykkt samhljóða. Sveitarstjórn fagnar samþykkt Umhverfis- og náttúruverndarnefndar um að Strandabyggð beiti sér fyrir sameiginlegri umhverfisvottun Vestfjarða í heild samkvæmt staðli Earth Check eða öðrum sambærilegum staðli fyrir sjálfbær samfélög. Jafnframt samþykkir sveitarstjórn að leggja fram tillögu í þessa veru á Fjórðungsþingi Vestfirðinga sem haldið verður á Hólmavík í september. Í tillögunni verði tilgreint að stefnt skuli að því að Vestfirðir standist töluleg viðmið Earth Check þegar á vordögum 2011 og að fullnaðarvottun verði náð vorið 2012.

6. Fundargerð Tómstunda- og íþróttanefndar dags. 19. ág. 2010.

Fundargerð Tómstunda- og íþróttanefndar dags. 19. ág. 2010 lögð fram til samþykktar. Sveitarstjórn tekur jákvætt í hugmynd um sérstakan íþrótta- og tómstundafulltrúa og beinir því til nefndarinnar að vinna hugmyndavinnu og tillögu um hugsanleg verkefni og verksvið slíks starfsmanns og er tilbúin að koma að slíkri vinnu ef nefndin óskar. Fundargerðin samþykkt samhljóða.

7. Fundargerð Fræðslunefndar dags. 23. ág. 2010.

Lögð fram til samþykktar fundargerð Fræðslunefndar dags. 23. ág. 2010. Varðandi lið 4b-c tekur sveitarstjórn fram að það viðmið hafi verið í gildi að leikskólabörn sunnan Hólmavíkur fái að nýta laus pláss í skólabílnum og þau sem lengst eigi að sækja gangi fyrir um laus pláss, nema samkomulag verði um annað milli foreldra. Varðandi lið 4b-d er tekið fram að skólaakstur byggist á þörfinni á akstri grunnskólabarna og skoðað verður í samráði við foreldra og skólayfirvöld hvort þörf sé á hádegisferðum sunnan Hólmavíkur alla daga. Varðandi lið 11e kemur fram tillaga um að skipa Rúnu Stínu Ásgrímsdóttur, Ástu Þórisdóttur og Jón Jónsson í vinnuhópinn. Fundargerðin að öðru leyti samþykkt samhljóða.

8. Fundargerð Atvinnumála- og hafnarnefndar dags. 23. ág. 2010.

Lögð fram til samþykktar fundargerð Atvinnumála- og hafnarnefnd dags. 23. ág. 2010. Fundargerðin samþykkt samhljóða.

9. Bréf frá Árna Daníelssyni dags. 19. ág. 2010 um stiga með handriði frá Heilbrigðisstofnun á Borgabraut niður í hvamminn fyrir neðan.

Tekið fyrir bréf frá Árna Daníelssyni dags. 19. ág. 2010. Sveitarstjórn tekur jákvætt í erindið og ákveður samhljóða að athuga með möguleika á þessari framkvæmd.

Fundargerð lesin upp og hún samþykkt samhljóða. Fundi slitið kl. 21:05.

Jón Gísli Jónsson (sign)                    
Bryndís Sveinsdóttir (sign)

Katla Kjartansdóttir (sign)                
Ásta Þórisdóttir (sign)

Jón Jónsson (sign)

1. Skýrsla oddvita.

2. Gjaldskrár sveitarfélagsins.

3. Skýrsla ÍSOR um vatnsvinnslumöguleika við Hólmavík.

4. Boðun á aðalfund Menningarráðs Vestfjarða dags. 3. ág. 2010.

5. Fundargerð Landbúnaðar- og dreifbýlisnefndar Strandabyggðar dags. 13. ág. 2010.

6. Fundargerð Bygginga-, umferðar- og skipulagsnefndar Strandabyggðar dags. 16. ág. 2010.

7. Fyrirspurn frá Sævari Benediktssyni um fyrstu slökkvidæluna á Hólmavík, dags. 11. ágúst 2010.

8. Styrkbeiðni og frekari gögn frá Héraðssambandi Strandamanna.

Þá var gengið til dagskrár.

1. Skýrsla oddvita.

Í skýrslu oddvita dags. 14. ágúst 2010 er yfirlit yfir helstu framkvæmdir sem starfsmenn áhaldahúss hafa unnið að. Lagðar hafa verið túnþökur á reitinn þar sem Hilmir stóð og við bátarennu. Lagfæringum er lokið á leikskólalóð og búið að girða lóðina af. Unnið hefur verið að viðhaldi í grunnskólanum og verið er að setja upp nýja girðingu neðan við skólavöll. Langt er komið að skipta um járn á þaki Skólabrautar 18. Lionsklúbbur Hólmavíkur mun fjarlægja útihús í Brandskjólum. Nokkrar girðingar í landi Skeljavíkur og Víðidalsár hafa verið fjarlægðar og búið er að ræða við viðeigandi aðila um að fjarlægja fleiri slíkar. Sveitarstjórn er sammála um að vinna áfram að því að fjarlægja ónýtar girðingar sem eru gagnslausar og lýti á umhverfinu.

Lóðarleigusamningur hefur verið gerður við Golfklúbb Hólmavíkur til 25 ára um svæði undir golfvöllinn.

Gerðar voru fyrirspurnir um vetrarþjónustu á vegi 68 suður Strandir, þar sem það verkefni var fellt út af útboðslista Vegagerðarinnar. Fram kom í svari að þjónusta á þeirri leið yrði óbreytt og mokað virka daga. Verkið yrði ekki boðið út, en mokstur að Guðlaugsvík yrði í höndum þjónustumiðstöðvar á Hólmavík. Miðað væri við að leiðin milli Hólmavíkur og Broddadalsár væri opin kl. 7:30 að morgni. Í skýrslu oddvita kemur einnig fram að óskað hefur verið eftir fundi með Sigurði Mar Óskarssyni hjá Vegagerðinni til að ræða ýmis mál. Sveitarstjórn ítrekar áhuga sinn á að teknar verði upp áætlunarferðir milli Króksfjarðarness og Hólmavíkur frá næstu áramótum þegar skipulag verður endurskoðað.

Í skýrslu oddvita kemur einnig fram að unnið hefur verið að skriflegum samningum í tengslum við skólastarf, varðandi Skólaskjól, mötuneyti og skólaakstur. Sveitarstjórn ákveður að halda gjaldskrám tengdum skólastarfi óbreyttum út árið. Samþykkt að heimila grunnskóla að auglýsa eftir stuðningsfulltrúa og sveitarstjórn samþykkir að bætt verði við starfsmanni í heimanámið til reynslu, ef þörf er á. Loks beinir sveitarstjórn því til Fræðslunefndar að gera tillögu að reglum um hvernig brugðist skuli við ef þjónustugjöld tengd skólastarfi eru ekki greidd.

Í framhaldi af skýrslu oddvitanna var rætt um starfsmannamál. Guðrún Guðfinnsdóttir leikskólastjóri hefur sagt starfi sínu lausu og auglýsa þarf þá stöðu. Ákveðið að fela sveitarstjóra að vinna að úttekt á kostum þess og göllum að sameina leikskóla, grunnskóla og tónskóla sveitarfélagsins undir eina stjórn. Einnig var ákveðið að auglýsa 50% starf á skrifstofu sveitarfélagsins.

2. Gjaldskrár sveitarfélagsins.

Lögð fram til fyrri umræðu tillaga að gjaldskrá fyrir afgreiðslu og þjónustu vegna skipulags og byggingarmála og tengigjalds veitna í Strandabyggð. Tillögunni vísað samhljóða til seinni umræðu.

3. Skýrsla ÍSOR um vatnsvinnslumöguleika við Hólmavík.

Lögð fram til kynningar skýrsla eftir Þórólf H. Hafstað hjá ÍSOR sem ber yfirskriftina Hólmavík. Vatnsvinnslumöguleikar.

4. Boðun á aðalfund Menningarráðs Vestfjarða dags. 3. ág. 2010.

Lögð fram gögn frá Menningarráði Vestfjarða þar sem aðalfundur er boðaður 4. september 2010 kl. 15:00 á Hólmavík. Ákveðið að Jón Gísli Jónsson oddviti fari með umboð Strandabyggðar á aðalfundinum.

5. Fundargerð Landbúnaðar- og dreifbýlisnefndar Strandabyggðar dags. 13. ág. 2010.

Lögð fram til samþykktar fundargerð Landbúnaðar- og dreifbýlisnefndar Strandabyggðar dags. 13. ágúst 2010. Varðandi lið 4 vísar sveitarstjórn því til gerðar fjárhagsáætlunar fyrir árið 2011 að skoða lausnir varðandi skólabifreið. Einnig samþykkir sveitarstjórn að beina þeirri tillögu til Vegagerðarinnar að þær leiðir sem skólaakstur er á verði opnaðar fyrr á daginn. Ef þjónustutími á veginum suður Strandir væri t.d. færður fram um hálftíma myndi mokstur nýtast skólaakstri mun betur. Fundargerðin samþykkt samhljóða.

6. Fundargerð Bygginga-, umferðar- og skipulagsnefndar Strandabyggðar dags. 16. ág. 2010.

Lögð fram til samþykktar fundargerð Bygginga-, umferðar- og skipulagsnefndar Strandabyggðar dags. 16. ág. 2010. Fundargerðin samþykkt eftir nokkra umræðu.

7. Fyrirspurn frá Sævari Benediktssyni um fyrstu slökkvidæluna á Hólmavík, dags. 11. ágúst 2010.

Lögð fram fyrirspurn frá Sævari Benediktssyni um slökkvidælu. Sveitarstjórn er kunnugt um að sögusagnir um að dælan hafi verið seld eða gefin eiga ekki við rök að styðjast, heldur sé hún í geymslu á Hólmavík.

8. Styrkbeiðni og frekari gögn frá Héraðssambandi Strandamanna.

Lögð fram gögn og styrkbeiðni frá Héraðssambandi Strandamanna dags. 10. ágúst 2010 þar sem farið er fram á styrk frá Strandabyggð. Sveitarstjórn samþykkir einróma að styrkja Héraðssambandið um 150 þúsund, en sveitarfélagið hefur einnig veitt Héraðssambandinu stuðning í formi skrifstofuaðstöðu undanfarin misseri. 

Fundargerð lesin upp og hún samþykkt samhljóða. Fundi slitið kl. 21:22.

Jón Gísli Jónsson (sign)                
Bryndís Sveinsdóttir (sign)

Katla Kjartansdóttir (sign)                          
Ásta Þórisdóttir (sign)

Jón Jónsson (sign)
 

1. Skýrsla oddvita.

2. Ráðning sveitarstjóra.

3. Umræður um gjaldskrár sveitarfélagsins.

4. Umræður um viðhald á fasteignum sveitarfélagsins.

5. Ráðning umsjónarmanns með félagsstarfi aldraðra.

6. Umræður um samstarf sveitarfélaga á Ströndum.

7. Kerfis- og gagnahýsing fyrir Strandabyggð.

8. Fundargerð Menningarmálanefndar Strandabyggðar dags. 14. júlí 2010.

9. Fundargerð Atvinnumála- og hafnarnefndar Strandabyggðar dags. 26. júlí 2010.

Oddviti lagði til að við bættist 10. mál á dagskrá sem er bréf varðandi lausagöngu hunda á Hólmavík og var það samþykkt samhljóða.

Þá var gengið til dagskrár.

1. Skýrsla oddvita.

Lögð fram skýrsla oddvita og varaoddvita um störf þeirra frá síðasta fundi. Þar kemur meðal annars fram að bilun varð í stýribúnaði fyrir vatnsveitu í dæluhúsinu við Ósá og var ekki hægt að tryggja nægilegt vatnsmagn á Hólmavík með öruggum hætti. Keypt var ný stýring og er ætlunin að gera við þá biluðu og hafa til vara. Jafnframt voru settar upp viftur til að halda hita í dæluhúsinu og skápum þar í skefjum. Þórólfur H. Hafstað frá ÍSOR er búinn að gera frekari rannsóknir um vatnsöflun fyrir Hólmavík og mun skila skýrslu um niðurstöður sínar.

Unnið er að því að koma í veg fyrir leka í Íþróttamiðstöð sem hefur verið viðvarandi frá byggingu hússins. Sveitarstjórn fer fram á að lausn verði fundin og verktakar ljúki viðgerð sem fyrst.

Farin var vettvangsferð með Snorra Jónssyni starfsmanni Áhaldahúss og einnig fundað með Sigurði Marinó. Helstu niðurstöður voru þessar: Lögð er áhersla á að gera gámasvæði í Skothúsvík tilbúið sem allra fyrst og verður síðan gámaeigendum boðið að færa gáma sína þangað úr Skothúsvíkinni, af Skeiðinu og víðar. Hugmynd kom fram um geymslusvæði til framtíðar, þar sem sveitarfélagið leigði út pláss, og var ákveðið að athuga með svæði í grennd við Hnitbjörg. Samþykkt að teikning af hugsanlegu geymslusvæði fari til umræðu í Bygginga-, umferðar- og skipulagsnefnd.

Þá kemur fram í skýrslu oddvitanna að ákveðið hafi verið að leggja túnþökur á svæðið þar sem Hilmir stóð og víðar á Hólmavík. Farið var yfir girðingar í landi Skeljavíkur og Víðidalsár sem má fjarlægja. Starfsmenn áhaldahúss hafa unnið að girðingu og lóð Leikskólans Lækjarbrekku síðustu vikur og er stefnt að verklokum áður en skólinn kemur úr sumarfríi.

Fram kemur að framkvæmdir við hús sveitarfélagsins að Skólabraut 18 sem búið er að samþykkja og eru á fjárhagsáætlun eru ekki hafnar. Ákveðið að fara í framkvæmdir sem fyrst.

Eftir skoðunarferð um Grunnskólann á Hólmavík, í fylgd skólastjóra, gera oddvitar tillögu um að mála tvær stofur í skólanum og skipta þar um ljós. Jafnframt að mála stigagang að mötuneyti. Starfsmenn áhaldahúss sjái um þessar framkvæmdir og verði þeim lokið fyrir 15. ágúst. Sveitarstjórn leggur jafnframt til að gerð verði áætlun um uppsetningu á nýrri girðingu neðan við leikvöll við skólann í haust og að gerðar verði tröppur upp frá bankabrekkunni.

Starfsmenn áhaldahúss lögðu jafnframt til á fundinum með oddvitum að samdar verði reglur um snjómokstur í samvinnu sveitarstjórnar og starfsmanna áhaldahúss og tekur sveitarstjórn undir það.

Í skýrslu oddvita kemur fram að haldinn var vinnufundur með Kristínu S. Einarsdóttir starfsmanni Fræðslumiðstöðvar Vestfjarða. Fyrir liggur að teikna upp og skipuleggja 1. hæð Þróunarseturs og gera í framhaldi af því drög að leigusamningi, auk þess að gera kostnaðaráætlun – allt áður en endanleg ákvörðun er tekin. Sveitarstjórn er jákvæð fyrir verkefninu og leggur áherslu á að ná niðurstöðu sem fyrst.

Í framhaldi af umræðu um skýrslu oddvitanna var rætt um að fá Lionsklúbb Hólmavíkur til að fjarlægja gömul útihús í Brandskjólum og rædd staða mála við samningagerð í tengslum við skólastarf.

2. Ráðning sveitarstjóra.

Tekinn var til umræðu ráðningarsamningur við Ingibjörgu Valgeirsdóttur um starf sveitarstjóra í Strandabyggð. Samningurinn var staðfestur samhljóða af sveitarstjórn og Ingibjörg boðin hjartanlega velkomin til starfa hjá Strandabyggð.

3. Umræður um gjaldskrár sveitarfélagsins.

Lögð var fram tillaga um gjaldskrá fyrir byggingarleyfisgjöld og tengigjöld holræsa og vatnsveitu. Samþykkt var að senda tillöguna til byggingafulltrúa til umsagnar og taka hana fyrir aftur á næsta fundi.

4. Umræður um viðhald á fasteignum sveitarfélagsins.

Rætt var um viðhald á fasteignum sveitarfélagsins og voru sveitarstjórnarmenn sammála um að því hefði ekki verið sinnt sem skyldi síðustu ár. Lögð var fram tillaga um að skipaður væri starfshópur heimamanna til að gera yfirlit yfir þörf á viðhaldi á öllum fasteignum í eigu sveitarfélagsins og tillögu um forgangsröð. Tillaga kom fram um Valgeir Örn Kristjánsson, Kristjönu Eysteinsdóttur, Jóhann L. Jónsson, Ingibjörgu Benediktsdóttur og Snorra Jónsson í starfshópinn og var hún samþykkt samhljóða.

5. Ráðning umsjónarmanns með félagsstarfi aldraðra.

Tekin var til umfjöllunar ráðning umsjónarmanns með félagsstarfi aldraðra. Ein umsókn barst frá Ingibjörgu Sigurðardóttur og var samhljóða samþykkt að ráða hana í starfið.

6. Umræður um samstarf sveitarfélaga á Ströndum.

Rætt var um samstarf sveitarfélaga á Ströndum fyrr og nú. Samþykkt var samhljóða tillaga um að bjóða öllum sveitarstjórnarmönnum í Bæjarhreppi, Kaldrananeshreppi og Árneshreppi til fundar til að ræða þessi mál. Rætt var um að æskilegt væri að halda slíkan fund sem allra fyrst og fyrir Fjórðungsþing Vestfirðinga, svo Strandamenn geti um leið rætt helstu áherslur og hagsmunamál svæðisins í vestfirsku samstarfi.

7. Kerfis- og gagnahýsing fyrir Strandabyggð.

Rætt var um kerfisleigu og gagnahýsingu fyrir Strandabyggð. Samþykkt að láta málið ekki dragast frekar og ganga frá kaupum á slíkri þjónustu hið fyrsta. Jóni Jónssyni falið að kanna stöðu mála og gera tillögu.

8. Fundargerð Menningarmálanefndar Strandabyggðar dags. 14. júlí 2010.

Lögð er fram til samþykktar fundargerð Menningarmálanefndar Strandabyggðar sem dagsett er 14. júlí 2010. Sveitarstjórn samþykkir þá dagsetningu sem Menningarmálanefnd gerir tillögu um vegna næstu Hamingjudaga og verður hátíðin samkvæmt því haldin 30. júní – 3. júlí árið 2011. Sveitarstjórn telur hins vegar ekki þörf á að ráða framkvæmdastjóra fyrir næstu áramót vegna Hamingjudaga 2011. Fundargerðin að öðru leyti samþykkt samhljóða. Einnig var samþykkt samhljóða að birta skýrslu framkvæmdastjóra Hamingjudaga á vef Strandabyggðar.

9. Fundargerð Atvinnumála- og hafnarnefndar Strandabyggðar dags. 26. júlí 2010.

Lögð fram til samþykktar fundargerð Atvinnumála- og hafnarnefndar Strandabyggðar frá 26. júlí 2010. Í tengslum við lið 2 í fundargerðinni var rætt um þann vanda sem húsnæðisskortur á staðnum skapar fyrir atvinnulíf og jákvæða byggðaþróun og voru menn sammála um að leita lausna. Fundargerð nefndarinnar var samþykkt samhljóða.

10. Bréf varðandi lausagöngu hunda á Hólmavík

Lagt var fram bréf frá Stefáni Gíslasyni dags. 24. júlí þar sem fjallað er um hundsbit á Hólmavík og lausagöngu hunda. Sveitarstjórn minnir á að í gildi er samþykkt um hundahald í Strandabyggð. Þar og í lögreglusamþykkt kemur skýrt fram að lausaganga hunda er alfarið bönnuð í þéttbýlinu á Hólmavík. Sveitarstjórn hvetur íbúa og gesti Strandabyggðar til að fylgja þessum reglum og telur jafnframt eðlilegt að þeir sem verði fyrir áreitni eða árás hunds tilkynni það í öllum tilvikum til lögreglu. Ennfremur er samþykkt að fara yfir reglugerðina.

Fundargerð lesin upp og hún samþykkt athugasemdalaust. Fundi slitið kl. 20.37.

Jón Gísli Jónsson (sign)
Bryndís Sveinsdóttir (sign)

Viðar Guðmundsson (sign)
Ingibjörg Benediktsdóttir (sign)

Jón Jónsson (sign)

Boðuð dagskrá fundarins er í 12 liðum:

• 1. Skýrsla oddvita.
• 2. Umræða um gjaldskrár sveitarfélagsins
• 3. Samþykktir um kjör í nefndum, ráðum og stjórnum Strandabyggðar
• 4. Erindi frá Fræðslumiðstöð Vestfjarða dags. 8. júlí 2010, þar sem Fræðslumiðstöðin óskar eftir að fá fyrstu hæð Þróunarsetursins á Hólmavík leigða.
• 5. Minnisblað frá skólastjórum Grunnskóla um nauðsynlegar viðhaldsframkvæmdir.
• 6. Umræður um leyfi til silungsveiða í sjó í landi Strandabyggðar.
• 7. Erindi frá Kristínu S. Einarsdóttur framkvæmdastjóra Hamingjudaga þar sem óskað er umsagnar frá sveitarstjórn um hátíðina.
• 8. Fundargerð Menningarmálanefndar Strandabyggðar dags. 24. júní 2010.
• 9. Fundargerð Fræðslunefndar Strandabyggðar dags. 7. júlí 2010.
• 10. Fundargerð Bygginga-, umferðar og skipulagsnefndar, dags. 8. júlí 2010.
• 11. Erindi frá Fjórðungssambandi Vestfirðinga dags. 2. júlí 2010. Boðun 55. Fjórðungsþings Vestfirðinga.
• 12. Styrkbeiðni frá Héraðssambandi Strandamanna.

Þá var gengið til dagskrár.

1. Skýrsla oddvita.

Lögð fram skýrsla oddvita og varaoddvita um störf þeirra frá síðasta fundi. Þar kemur m.a. fram að unnið er að ráðningu sveitarstjóra. 40 umsóknir bárust um starfið og hefur Hagvangur unnið úr umsóknum og tekið viðtöl við umsækjendur. Í næstu viku er ætlunin að taka viðtöl með þátttöku sveitarstjórnarmanna við þá sem helst koma til greina.

Í skýrslunni kemur fram að haldinn var kynningar- og umræðufundur 1. júlí síðastliðinn um flutning á málefnum fatlaðra frá ríki til sveitarfélaga og sátu hann sveitarstjórnarmenn Strandabyggðar og nefndarmenn í Félagsmála- og jafnréttisnefnd. Aðalsteinn Óskarsson framkvæmdastjóri Fjórðungssambands Vestfirðinga og Arnheiður Jónsdóttir verkefnisstjóri sátu fundinn og hafa gögn varðandi verkefnið verið send fundarmönnum eftir hann. Samþykkt er samhljóða að Jóhanna Hreinsdóttir verði fulltrúi Strandabyggðar í verkefnishóp á Vestfjarðavísu um málefnið.

Oddvitar sátu fund með Bjarna Ómari Haraldssyni og Hildi Guðjónsdóttur skólastjórum Grunnskóla. Þar kom m.a. fram að þau telja þörf á að skilgreina heimildir stjórnenda varðandi innkaup á rekstrarvörum og viðgerðir og kaup á áhöldum og tækjum. Samþykkt var um að virkja og hafa stjórnendur stofnana Strandabyggðar með í ráðum við gerð fjárhagsáætlana.

Oddvitar sátu fund með Helgu Óladóttir landfræðinema við HÍ þann 6. júlí, en hún vinnur að hagkvæmisathugun á nýtingu heita vatnsins í Hveravík. Óskuðu oddvitar eftir að fá upplýsingar um niðurstöður þegar þar að kæmi.

Oddvitar héldu vinnufund með Gísla Gunnlaugssyni byggingarfulltrúa 8. júlí þar sem farið var yfir vinnubrögð, leyfisveitingar, lóðaumsóknir og stöðu mála sem að byggingarfulltrúa snúa.

Í skýrslu oddvitanna kemur einnig fram að unnin hefur verið hugmyndavinna um bætt upplýsingaflæði milli íbúa og stjórnsýslu, m.a. fréttabréf, endurskipulagningu og uppfærslu vefsíðu og svokallaðan hugmyndapott fyrir ábendingar íbúa til sveitarstjórnar. Ákveðið að vinna áfram að þessu.

Þá kemur fram í skýrslu oddvita að rætt hefur verið um hvort móta eigi stefnu um að halda ágengum plöntum í sveitarfélaginu í skefjum, einkum í nágrenni Hólmavíkur. Til er samþykkt um að halda lúpínu í skefjum í byggð á Hólmavík og hefur sveitarstjórn áhuga á að kynna hana, miðla upplýsingum og vinna áfram að þessu máli.

2. Umræða um gjaldskrár sveitarfélagsins

Lögð fram og rædd tillaga að gjaldskrá fyrir Félagsheimilið á Hólmavík. Gerðar nokkrar breytingar á tillögunni og hún síðan samþykkt samhljóða. Ákveðið að birta gjaldskrána á vef Strandabyggðar.

Kynnt tillaga um gjaldskrá fyrir áhaldahús, útselda þjónustu starfsmanna þess og akstur. Tillagan samþykkt samhljóða, en ákvörðun um gjald fyrir garðslátt, túnþökur og þökuskurð frestað. Samþykkt að birta verðskrána á vef Strandabyggðar.

3. Samþykktir um kjör í nefndum, ráðum og stjórnum Strandabyggðar

Lögð fram tillaga að Samþykkt um kjör fulltrúa í stjórnum, nefndum og ráðum Strandabyggðar sem gildir frá 15. júní 2010. Samþykktin var samþykkt samhljóða og ákveðið að birta hana á vefsíðu Strandabyggðar.

4. Erindi frá Fræðslumiðstöð Vestfjarða dags. 8. júlí 2010, þar sem Fræðslumiðstöðin óskar eftir að fá fyrstu hæð Þróunarsetursins á Hólmavík leigða.

Lagt var fram erindi frá Fræðslumiðstöð Vestfjarða þar sem óskað er eftir að fá til leigu fyrstu hæð Þróunarsetursins á Hólmavík, eftir að húsnæðið verði komið í viðunandi ástand. Sveitarstjórn tekur jákvætt í erindið og leggur til að viðræður við Fræðslumiðstöð um málið verði hafnar, ásamt því að gerð verði framkvæmda- og kostnaðaráætlun. Jóni Gísla Jónssyni og Kötlu Kjartansdóttur falið að sjá um viðræður og áætlanagerð.

Sveitarstjórn fagnar því jafnframt að starfshlutfall starfsmanns Fræðslumiðstöðvarinnar á Hólmavík sé aukið í 100%.

5. Minnisblað frá skólastjórum Grunnskóla um nauðsynlegar viðhaldsframkvæmdir.

Lagt fram til kynningar minnisblað frá Bjarna Ómari Haraldssyni og Hildi Guðjónsdóttur skólastjórnendum við Grunnskólann á Hólmavík, varðandi viðhald og úrbætur á skólahúsnæðinu. Ákveðið að ganga í minni háttar lagfæringar og oddvita falið að sjá um áætlanagerð varðandi kostnað við stærri aðkallandi viðhaldsverkefni.

6. Umræður um leyfi til silungsveiða í sjó í landi Strandabyggðar.

Fram var haldið umræðum frá síðasta sveitarstjórnarfundi um leyfi til silungsveiða í net í sjó í landi Strandabyggðar. Lögð var fram tillaga um að leyfi til silungsveiða fyrir landi Strandabyggðar verði veitt frá og með 20. júlí og umsækjendur skuldbindi sig til að hlýta lögum og reglum. Ákveðið að tekið verði gjald fyrir slík leyfi frá og með næsta ári og nánari reglur útfærðar. Samþykkt samhljóða.

7. Erindi frá Kristínu S. Einarsdóttur framkvæmdastjóra Hamingjudaga þar sem óskað er umsagnar frá sveitarstjórn um hátíðina.

Lagt er fram erindi frá Kristínu S. Einarsdóttur framkvæmdastjóra Hamingjudaga þar sem óskað er umsagnar frá sveitarstjórn um hátíðina. Sveitarstjórn óskar framkvæmdastjóra, Menningarmálanefnd og íbúum öllum hjartanlega til hamingju með vel heppnaða Hamingjudaga. Jafnframt þakkar sveitarstjórn framkvæmdastjóra fyrir vel unnin störf og hvetur alla sem erindið fengu til að senda umsagnir og svör.

8. Fundargerð Menningarmálanefndar Strandabyggðar dags. 24. júní 2010.

Lögð fram til samþykktar fundargerð Menningarmálanefndar Strandabyggðar frá 24. júní 2010. Fundargerðin er samþykkt samhljóða. Sveitarstjórn Strandabyggðar óskar aðstandendum leiksýningarinnar Grease hjartanlega til hamingju með verðskulduð menningarverðlaun.

9. Fundargerð Fræðslunefndar Strandabyggðar dags. 7. júlí 2010.

Lögð fram til samþykktar fundargerð Fræðslunefndar Strandabyggðar frá 7. júlí 2010. Rætt um einstaka þætti í fundargerðinni, svo sem kennararáðningar, mötuneyti, skólaakstur og baðvörslu í íþróttatímum í Íþróttamiðstöð. Oddvitum falið að vinna að lausn á þessum málum og ganga frá skriflegum samningum þar sem við á. Fundargerðin samþykkt samhljóða.

10. Fundargerð Bygginga-, umferðar og skipulagsnefndar, dags. 8. júlí 2010.

Lögð fram til samþykktar fundargerð Bygginga-, umferðar og skipulagsnefndar frá 8. júlí 2010. Fundargerðin samþykkt samhljóða.

11. Erindi frá Fjórðungssambandi Vestfirðinga dags. 2. júlí 2010. Boðun 55. Fjórðungsþings Vestfirðinga.

Lagt fram til kynningar erindi frá Fjórðungssambandi Vestfirðinga dags. 2. júlí 2010 þar sem boðað er til 55. Fjórðungsþings Vestfirðinga á Hólmavík dagana 3.-4. september næstkomandi.

12. Styrkbeiðni frá Héraðssambandi Strandamanna.

Lagt fram erindi frá Héraðssambandi Strandamanna þar sem leitað er eftir stuðningi sveitarfélagsins. Samþykkt samhljóða að fresta afgreiðslu erindisins og óska eftir frekari upplýsingum frá Héraðssambandinu.

Fundargerð lesin upp og hún samþykkt. Fundi slitið kl. 21:41.

Jón Gísli Jónsson (sign)
Bryndís Sveinsdóttir (sign)

Katla Kjartansdóttir (sign)
Ásta Þórisdóttir (sign)

Jón Jónsson (sign)

Jón Gísli Jónsson kynnti boðaða dagskrá fundarins í 17 liðum, sem var eftirfarandi: 

• 1. Skýrsla oddvita.
• 2. Kosning í nefndir og ráð.
• 3. Samþykktir um stjórn og fundarsköp Strandabyggðar.
• 4. Minnisblað um fund um tilflutning á málefnum fatlaðra frá ríki til sveitarfélaga 21. júní 2010.
• 5. Umsögn um rekstrarleyfi til reksturs gistiskála á vegum Árataks ehf í Broddanesskóla dags. 15. júní 2010.
• 6. Umsögn um rekstrarleyfi vegna reksturs kaffihúss á vegum Katrínar Theodórsdóttur að Hafnarbraut 7 á Hólmavík, dags. 14. maí 2010.
• 7. Erindi frá Kristínu S. Einarsdóttur framkvæmdastjóra Hamingjudaga dags. 21. júní 2010 um að fá veggjalistamenn til að skreyta gamla vatnstankinn.
• 8. Bréf frá Þorsteini Sigfússyni varðandi leyfi til silungsveiða í sjó dags. 24. júní 2010.
• 9. Erindi frá Fiskistofu um rekstrarleyfi til kræklingaræktar á tveim stöðum í Steingrímsfirði, dags. 23. júní 2010.
• 10. Fundargerð stjórnar Byggðasafns Húnvetninga og Strandamanna frá 18. júní 2010.
• 11. Minnisblað Rúnu Stínu Ásgrímsdóttur vegna Steinshúss frá 15. júní 2010.
• 12. Tilboð frá Prentsmiðjunni Odda í endurprentun Hólmavíkurbókar dags. 16. júní 2010.
• 13. Fundargerð Bygginga-, umferðar og skipulagsnefndar, dags. 24. júní 2010.
• 14. Fundargerð Menningarmálanefndar Strandabyggðar dags. 16. júní 2010.
• 15. Fundargerð Menningarmálanefndar Strandabyggðar dags. 24. júní 2010.
• 16. Fundargerð 78. fundar Heilbrigðisnefndar Vestfjarðasvæðis frá 4. júní 2010.
• 17. Fundargerð 119. fundar í Skólanefnd Menntaskólans á Ísafirði 7. júní 2010.

Þá var gengið til dagskrár.

1. Skýrsla oddvita.

Lögð fram skýrsla oddvita og varaoddvita um störf þeirra frá síðasta fundi. Þar kemur m.a. fram að auglýst hefur verið eftir sveitarstjóra í samvinnu við Hagvang og er frestur til að sækja um til 4. júlí.

Sagt var frá fundi oddvitanna með Sigurði Marinó Þorvaldssyni og Snorra Jónssyni, starfsmönnum áhaldahúss, um framkvæmdir á vegum sveitarfélagsins. Þar var m.a. ákveðið að ganga sem fyrst frá gámasvæði í Skothúsvík og keyra efni í það, kanna valkosti með geymslusvæði til viðbótar, mála vegmerkingar á götur Hólmavíkur þar sem því verður við komið, fjarlægja girðingu við Hafnarbraut neðan vitans, setja þunnt malarlag á ómalbikaðar götur og fleira. Á fundinum kom einnig fram að starfsmenn áhaldahúss telja þörf á viðbótar bíl yfir sumarið þegar starfskraftar eru fleiri. Samþykkt að taka ákvörðun um bílamál í tengslum við gerð fjárhagsáætlunar fyrir næsta ár.

Þá kemur fram í skýrslunni að stefnt er að framkvæmdum í haust við steinkant við götuna við Borgabraut 4, en eftir er að gera kostnaðar- og framkvæmdaáætlun sem þarf að liggja fyrir áður. Rætt hefur verið við ÍSOR um frekari könnun nú í júní á vatnsöflun fyrir sveitarfélagið.

Sex sjálfboðaliðar frá Seeds eru komnir til Hólmavíkur og verða í tvær vikur að störfum fyrir Strandabyggð. Þeir dvelja í Björgunarsveitarhúsinu og vinna að Hamingjudögum og tengdum verkefnum í fyrri vikunni, en að umhverfisverkefnum í seinni vikunni.

Rætt var um kjör sveitarstjórnar og nefnda og lagði oddviti fram tillögu þar um, sem var samþykkt samhljóða. Þá var lagt til að gerðar yrðu sérstakar samþykktir um kjör fulltrúa í stjórnum, ráðum og nefndum Strandabyggðar þar sem nákvæmlega væri kveðið á um kjör og réttindi, greiðslur vegna aksturs og fleira slíkt. Var oddvitum falið að leggja fram tillögu að slíkum samþykktum á næsta sveitarstjórnarfundi.

Einnig var gefið yfirlit um nokkur fyrirliggjandi verkefni í skýrslu oddvitanna.

2. Kosning í nefndir og ráð.

Lögð var fram tillaga um að eftirtaldir væru kosnir eða skipaðir í eftirtaldar nefndir og embætti:

Umhverfis- og náttúruverndarnefnd:

Ásta Þórisdóttir

Lýður Jónsson

Ingibjörg Benediktsdóttir

Sigurður Atlason

Viðar Guðmundsson

Til vara:

Valgeir Örn Kristjánsson

Ingibjörg Sigurðardóttir

Sverrir Guðbrandsson

Eysteinn Gunnarsson

Kristín S. Einarsdóttir

Atvinnumála- og hafnarnefnd:

Jón Eðvald Halldórsson

Jón Vilhjálmur Sigurðsson

Elfa Björk Bragadóttir

Matthías S. Lýðsson

Kristín S. Einarsdóttir

Til vara:

Victor Örn Victorsson

Sverrir Guðbrandsson

Bryndís Sveinsdóttir

Arnar S. Jónsson

Guðrún Guðfinnsdóttir

Menningarmálanefnd:

Rúna Stína Ásgrímsdóttir

Lýður Jónsson

Salbjörg Engilbertsdóttir

Ester Sigfúsdóttir

Steinunn J. Þorsteinsdóttir

Til vara:

Einar Indriðason

Jón Alfreðsson

Lára Guðrún Agnarsdóttir

Kristinn Schram

Guðrún Guðfinnsdóttir

Íþrótta- og tómstundanefnd:

Vala Friðriksdóttir

Kristján Sigurðsson

Aðalbjörg Guðbrandsdóttir

Kristjana Eysteinsdóttir

Hildur Guðjónsdóttir

Til vara:

Jón T. Guðlaugsson

Ingibjörg Benediktsdóttir

Ragnheiður B. Guðmundsdóttir

Rósmundur Númason

Arnar S. Jónsson

Félagsmála- og jafnréttisnefnd:

Hrafnhildur Guðbjörnsdóttir

Sverrir Guðmundsson

Bryndís Sveinsdóttir

Jóhanna Guðbrandsdóttir

Rósmundur Númason

Til vara:

Jóhann L. Jónsson

Sigurrós Þórðardóttir

Sólveig Halldórsdóttir

Jensína Pálsdóttir

Arnar S. Jónsson

Endurskoðandi

Kristján Jónasson hjá KPMG

Skoðunarmenn reikninga

Jóhann Björn Arngrímsson

Signý Ólafsdóttir

Til vara:

Jón Alfreðsson

Elfa Björk Bragadóttir

Héraðsnefnd Strandasýslu

Jón Gísli Jónsson

Jón Jónsson

Til vara:

Ásta Þórisdóttir

Katla Kjartansdóttir

Tillagan samþykkt samhljóða.

3. Samþykktir um stjórn og fundarsköp Strandabyggðar.

Lögð fram tillaga varaoddvita að samþykktum um stjórn og fundarsköp Strandabyggðar. Samþykktar samhljóða. Ákveðið að birta samþykktirnar á vef sveitarfélagsins.

4. Minnisblað um fund um tilflutning á málefnum fatlaðra frá ríki til sveitarfélaga 21. júní 2010.

Fundargerð starfshóps Fjórðungssambands Vestfirðinga um tilflutning á málefnum fatlaðra frá ríki til sveitarfélaga 21. júní 2010 lögð fram til kynningar. Einnig var minnisblað Jóns Jónssonar frá sama fundi lagt fram til kynningar. Skipa þarf nýjan fulltrúa í starfshópinn fyrir hönd Strandabyggðar í stað Ásdísar Leifsdóttur og var Kötlu Kjartansdóttir falið að vinna í málinu.

Kynningarfundur fyrir sveitarstjórnir á Ströndum vegna flutnings málefna fatlaðra frá ríki til sveitarfélaga verður haldinn í Félagsheimilinu á Hólmavík fimmtudaginn 1. júlí kl. 13:00. Samþykkt að boða Félagsmálanefnd á fundinn, auk sveitarstjórnar.

5. Umsögn um rekstrarleyfi til reksturs gistiskála á vegum Árataks ehf í Broddanesskóla dags. 15. júní 2010.

Lögð fram beiðni um umsögn um rekstrarleyfi til reksturs gistiskála á vegum Árataks ehf í Broddanesskóla. Um er að ræða viðbót við áður útgefið rekstrarleyfi. Sveitarstjórn samþykkir fyrir sitt leyti að rekstrarleyfi verði veitt.

6. Umsögn um rekstrarleyfi vegna reksturs kaffihúss á vegum Katrínar Theodórsdóttur að Hafnarbraut 7 á Hólmavík, dags. 14. maí 2010.

Lögð fram beiðni um umsögn um rekstrarleyfi fyrir kaffihús á vegum Katrínar Theodórsdóttur að Hafnarbraut 7 á Hólmavík. Sótt er um tímabundið rekstrarleyfi frá 1. júní - 31. ágúst 2010. Sveitarstjórn samþykkir fyrir sitt leyti að tímabundið rekstrarleyfi verði veitt, en vakin er athygli á að breyta þarf aðalskipulagi ef um áframhaldandi rekstur verður að ræða í húsinu.

7. Erindi frá Kristínu S. Einarsdóttur framkvæmdastjóra Hamingjudaga dags. 21. júní 2010 um að fá veggjalistamenn til að skreyta gamla vatnstankinn.

Lögð fram hugmynd frá Kristínu S. Einarsdóttir dags. 21. júní 2010 um að fá veggjalistamenn til að skreyta gamla vatnstankinn á Hólmavík. Skiptar skoðanir eru um hugmyndina í sveitarstjórn, en rætt um að upplýsingar um útlit og kostnað vanti til að hægt sé að taka endanlega afstöðu til málsins. Ákveðið að afla frekari gagna áður en lengra er haldið, ásamt því kanna viðhorf íbúa til verkefnisins á vefsíðu Strandabyggðar.  

8. Bréf frá Þorsteini Sigfússyni varðandi leyfi til silungsveiða í sjó dags. 24. júní 2010.

Lagt fram bréf frá Þorsteini Sigfússyni varðandi leyfi til silungsveiði í sjó, þar sem hann óskar eftir því við sveitarstjórn að hún heimili ekki netalagnir til silungsveiða fyrir landi Hólmavíkur (Strandabyggðar). Sveitarstjórn vill taka sér tíma til næsta fundar til að skoða málin betur og mun ekki veita ný leyfi fyrir netalögnum í landi Strandabyggðar þangað til. Jafnframt er minnt á að í gildi eru Lög um lax og silungsveiði nr. 61/2006 þar sem m.a. kemur fram í 15.gr. að ekki má leggja net nær ósi straumvatns en 1500 eða 2000 metra eftir vatnsmagni árinnar, en gangi lax í straumvatn má aldrei leggja net nær en 2000 metra. Eru íbúar Strandabyggðar hvattir til að fara eftir lögunum.

9. Erindi frá Fiskistofu um rekstrarleyfi til kræklingaræktar á tveim stöðum í Steingrímsfirði, dags. 23. júní 2010.

Lagt fram erindi frá Fiskistofu um rekstrarleyfi til kræklingaræktar á vegum ST2 ehf, á tveim stöðum í Steingrímsfirði, dags. 23. júní 2010. Óskað er eftir umsögn Strandabyggðar eða athugasemdum við rekstrarleyfið innan 10 daga. Sveitarstjórn fagnar þeirri nýsköpunar- og þróunarvinnu sem ST2 ehf standa fyrir í kræklingarækt í Steingrímsfirði og samþykkir að gera ekki athugasemdir við leyfisveitinguna.

10. Fundargerð stjórnar Byggðasafns Húnvetninga og Strandamanna frá 18. júní 2010.

Lögð fram til kynningar fundargerð stjórnar Byggðasafns Húnvetninga og Strandamanna frá 18. júní 2010.

11. Minnisblað Rúnu Stínu Ásgrímsdóttur vegna Steinshúss frá 15. júní 2010. 

Lagt fram til kynningar minnisblað Rúnu Stínu Ásgrímsdóttur vegna Steinshúss frá 15. júní 2010. 

12. Tilboð frá Prentsmiðjunni Odda í endurprentun Hólmavíkurbókar dags. 16. júní 2010.

Tekið fyrir tilboð frá Prentsmiðjunni Odda í endurprentun Hólmavíkurbókar dags. 16. júní 2010. Ákveðið að hafna tilboðinu að svo stöddu, en ræða við höfund Hólmavíkurbókar um framhaldið.

13. Fundargerð Bygginga-, umferðar og skipulagsnefndar, dags. 24. júní 2010.

Lögð fram til samþykktar fundargerð Bygginga-, umferðar og skipulagsnefndar frá 24. júní 2010. Fundargerðin samþykkt samhljóða. Fram kom að fyrirhugaður er fundur í næstu viku með byggingarfulltrúa, Bygginga-, umferðar- og skipulagsnefnd og fulltrúum úr sveitarstjórn þar sem skipst verður á upplýsingum og rætt um starfshætti.

14. Fundargerð Menningarmálanefndar Strandabyggðar dags. 16. júní 2010.

Lögð fram til samþykktar fundargerð Menningarmálanefndar Strandabyggðar frá 16. júní 2010. Varðandi lið 1 er samþykkt að boði á vinabæjarmót í Tanum verði tekið. Að hámarki verði þrír studdir til ferðarinnar, en á mótinu verður m.a. unnið að stefnumótun til framtíðar um vinabæjarsamstarfið. Fundargerð Menningarmálanefndar samþykkt samhljóða.

15. Fundargerð Menningarmálanefndar Strandabyggðar dags. 24. júní 2010.

Frestað er að taka fyrir fundargerð Menningarmálanefndar frá 24. júní 2010.

16. Fundargerð 78. fundar Heilbrigðisnefndar Vestfjarðasvæðis frá 4. júní 2010.

Lögð fram til kynningar fundargerð 78. fundar Heilbrigðisnefndar Vestfjarðasvæðis frá 4. júní 2010.

17. Fundargerð 119. fundar í Skólanefnd Menntaskólans á Ísafirði 7. júní 2010.

Lögð fram til kynningar fundargerð 119. fundar í Skólanefnd Menntaskólans á Ísafirði frá 7. júní 2010.

Fundargerð lesin upp og hún samþykkt. Fundi slitið kl. 21:46.

Jón Gísli Jónsson (sign)                     Bryndís Sveinsdóttir (sign)

Katla Kjartansdóttir (sign)                 Ásta Þórisdóttir (sign)

Jón Jónsson (sign)
 

Jón Gísli Jónsson kynnti boðaða dagskrá fundarins í 9 liðum, sem var eftirfarandi:

• 1.    Kosning oddvita og varaoddvita.
• 2.    Kosning í nefndir og ráð.
• 3.    Samþykktir um stjórn og fundarsköp.
• 4.    Beiðni frá eigendum Borgabrautar 4 um lagfæringu á steinkanti við lóðarmörk hússins.
• 5.    Framlög til stjórnmálasamtaka frá sveitarfélögum.
• 6.    Erindi frá Sambandi íslenskra sveitarfélaga um kjör fulltrúa á landsþing sambandsins.
• 7.    Skýrsla frá Ísor vegna prófunar á ferskvatnsholu.
• 8.    Fundargerð Skólanefndar Grunn- og Tónskólans á Hólmavík dags. 2. júní 2010.
• 9.    Fundargerð Menningarmálanefndar Strandabyggðar dags. 2. júní 2010.

Þá var gengið til dagskrár.

1. Kosning oddvita og varaoddvita.

Nýkjörin sveitarstjórn leggur fram svohljóðandi yfirlýsingu um samstarf J-lista og V-lista við stjórn sveitarfélagsins Strandabyggðar og baráttu fyrir hagsmunamálum íbúanna:

"Yfirlýsing um samstarf J-lista og V-lista í Strandabyggð

Í nýliðnum sveitarstjórnarkosningum voru tveir listar í kjöri í Strandabyggð, J-listi sem fékk 129 atkvæði og 3 fulltrúa kjörna og V-listi sem fékk 125 atkvæði og 2 fulltrúa kjörna. Listarnir hafa nú við upphaf kjörtímabilsins ákveðið að taka höndum saman við stjórn sveitarfélagsins og leggja saman krafta sína í baráttunni fyrir hagsmunamálum íbúa Strandabyggðar. Framboðslistarnir munu þó að sjálfsögðu starfa áfram hvor í sínu lagi,  en ekki verður um hefðbundinn meirihluta og minnihluta að ræða í sveitarstjórn.

Framboðslistarnir eru sammála um að leggja áherslu á að hafa fagleg vinnubrögð í heiðri og sýna ábyrgð við fjármálastjórn sveitarfélagsins. Listarnir eru samtaka um að efla stjórnsýslu sveitarfélagsins og finna leiðir til að gera hana skilvirkari, auk þess sem ætlunin er að bæta upplýsingaflæði til íbúa. Hlúð verður að atvinnulífi, menningu og mannlífi í sveitarfélaginu, mennta- og umhverfismálum. Áhersla verður lögð á að þrýsta á stjórnvöld og stofnanir á landsvísu um margvísleg málefni sem snúa að jafnræði íbúa Strandabyggðar og annarra íbúa landsins.

Þrátt fyrir samstarf listanna í sveitarstjórninni verða lýðræðisleg vinnubrögð í heiðri höfð og einstaka sveitarstjórnarmenn eða listana sjálfa getur auðvitað greint á um einstök mál. Sveitarstjórnarmenn munu þó kappkosta að láta slík mál ekki trufla samvinnu á öðrum sviðum."

Lagt var til að Jón Gísli Jónsson verði oddviti sveitarstjórnar og Jón Jónsson varaoddviti. Var sú tillaga samþykkt samhljóða.

Ákveðið er að auglýsa eftir umsóknum um starf sveitarstjóra og samþykkt að fela oddvita og varaoddvita að koma því ferli af stað í samvinnu við ráðningarskrifstofu.

2. Kosning í nefndir og ráð

Lagðar voru fram tillögur um fulltrúa í eftirtaldar nefndir og ráð:

Í kjörstjórn voru skipuð:

Bryndís Sigurðardóttir

Guðmundur Björgvin Magnússon

Hrafnhildur Guðbjörnsdóttir

Til vara:

Signý Ólafsdóttir

Jón Kristinsson

Birna Richardsdóttir

Landbúnaðar- og dreifbýlisnefnd:

Jón Stefánsson

Marta Sigvaldadóttir

Magnús Sveinsson

Viðar Guðmundsson

Dagrún Magnúsdóttir

Varamenn:

Reynir Björnsson

Bryndís Sveinsdóttir

Haraldur V.A. Jónsson

Matthías Lýðsson

Svanhildur Jónsdóttir

Fræðslunefnd

(sameinuð Leikskólanefnd og Skólanefnd Grunnskóla og Tónskóla):

Salbjörg Engilbertsdóttir

Snorri Jónsson

Ingibjörg Sigurðardóttir

Steinunn Þorsteinsdóttir

Jón Jónsson

Varamenn:

Ingibjörg Benediktsdóttir

Jóhann L. Jónsson

Aðalbjörg Guðbrandsdóttir

Katla Kjartansdóttir

Ragnar Bragason

Byggingar-, umferðar- og skipulagsnefnd:

Valgeir Örn Kristjánsson

Sigurður Marinó Þorvaldsson

Ingibjörg Emilsdóttir

Þorsteinn Newton

Hafdís Sturlaugsdóttir

Varamenn:

Ingimundur Jóhannsson

Jóhann L. Jónsson

Ingibjörg Sigurðardóttir

Rósmundur Númason

Dagrún Magnúsdóttir

Kosning í aðrar nefndir, ráð og embætti, verður tekin fyrir á næsta fundi sveitarstjórnar.

3. Samþykkt um stjórn og fundarsköp.

Fyrirliggjandi er að yfirfara samþykkt um stjórn og fundarsköp sveitarfélagsins. Ákveðið einróma að fela varaoddvita að fara yfir samþykktina og að hún verði lögð fyrir næsta fund til samþykktar.

Jón Jónsson og Katla Kjartansdóttir vilja láta bóka í þessu sambandi: „Í 17. grein samþykkta sveitarfélagsins kemur fram að sveitarstjórnarfundir skulu haldnir í húsnæði sem fullnægir ákvæðum laga og reglugerða um aðgang fatlaðs fólks. Nauðsynlegt er að finna framtíðarlausn varðandi skrifstofu og fundarsal sveitarstjórnar til að tryggja aðgengi."

4. Beiðni frá eigendum Borgabrautar 4 um lagfæringu á steinkanti við lóðarmörk hússins.

Tekið fyrir erindi dags. 31. maí 2010 frá eigendum Borgabrautar 4 um lagfæringu á steinkanti við lóðarmörk. Fundarmenn eru sammála um að lagfæringar séu nauðsynlegar og oddvita falið að afla frekari gagna um framkvæmdina, kostnað og heppilegan framkvæmdatíma.

5. Framlög til stjórnmálasamtaka frá sveitarfélögum.

Kynnt er minnisblað um stuðning sveitarfélaga við stjórnmálasamtök. Sveitarfélögum með fleiri en 500 íbúa er skylt lögum samkvæmt að veita stjórnmálasamtökum sem fá menn kjörna í næstliðnum sveitarstjórnarkosningum fjárframlag til starfsemi sinnar. Lagt fram til kynningar. Samþykkt að taka málið fyrir við endurskoðun fjárhagsáætlunar.

6. Erindi frá Sambandi íslenskra sveitarfélaga um kjör fulltrúa á landsþing sambandsins.

Lagt fram bréf frá Sambandi íslenskra sveitarfélaga dags. 2. júní 2010 um kjör fulltrúa á landsþingsSambandsins. Samþykkt samhljóða að skipa Jón Gísla Jónsson oddvita sem landsþingsfulltrúa og Jón Jónsson varaoddvita sem varamann.

7. Skýrsla frá Ísor vegna prófunar á ferskvatnsholu.

Lögð fram til kynningar skýrsla frá Ísor (Íslenskum orkurannsóknum), dags. 28. maí 2010, eftir Þórólf H. Hafstað með titilinn Hólmavík. Prófun á ferskvatnsholu. Í henni kemur fram að neysluvatnsvinnsluhola sem boruð var síðla árs 2008 sé ónothæf í því ástandi sem hún er nú. Lagt er til í skýrslunni að frekari athuganir verði gerðar nú í júní og metnir fleiri valkostir við vatnsöflun. Samþykkt samhljóða að leita eftir samvinnu við Ísor um frekari athuganir og oddvita falið að vinna í málinu.

8. Fundargerð Skólanefndar Grunn- og Tónskólans á Hólmavík dags. 2. júní 2010.

Lögð fram fundargerð Skólanefndar Grunn- og Tónskólans á Hólmavík frá 2. júní 2010. Varðandi grein 6b er tekið vel í að gefa nýskipaðari fræðslunefnd færi á að fara á námskeið um störf slíkra nefnda, þegar færi gefst. Jafnframt samþykkir sveitarstjórn að skipuleggja félagsmálanámskeið sem opið verði öllum nefndarmönnum sveitarfélagsins, eftir að sumarfríum lýkur.

Þá vill sveitarstjórn taka undir hamingjuóskir skólanefndar til Grunnskólans á Hólmavík í grein 6d í fundargerðinni. Það er sérstakt ánægjuefni og til fyrirmyndar að Grænfánanum sé flaggað við skólann á Hólmavík og sveitarstjórn hvetur nemendur og starfsmenn skólans til dáða við að halda þessu metnaðarfulla umhverfisverkefni áfram.

Fundargerð Skólanefndar samþykkt einróma.

9. Fundargerð Menningarmálanefndar Strandabyggðar dags. 2. júní 2010.

Lögð fram fundargerð Menningarmálanefndar Strandabyggðar dags. 2. júní 2010. Varðandi lið 2E er tekið fram að tilboði RUV hefur þegar verið hafnað. Varðandi lið 2O er rétt að taka fram að mál varðandi sjálfboðaliða Seeds eru komin í farveg. Fundargerðin samþykkt samhljóða.

Fundargerð lesin upp og hún samþykkt. Fundi slitið kl. 19:50.
 

Þetta var gert: Oddviti kynnti dagskrá fundarins í 6 töluliðum, sem var eftirfarandi:

• 1. Skýrsla sveitarstjóra.
• 2. Ársreikningur Strandabyggðar árið 2009, seinni umræða.
• 3. Erindi frá stjórn Byggðasafns Húnvetninga og Strandamanna.
• 4. Beiðni frá íbúum Hafnarbrautar 18 og 20 um að Fiskislóð verði lokuð fyrir umferð.
• 5. Fundargerð Byggingar-, umferðar- og skipulagsnefndar Strandabyggðar dags. 27. maí 2010.
• 6. Erindi frá Sjávarútvegs- og Landbúnaðarráðuneytinu vegna byggðakvóta Strandabyggðar fiskveiðiárið 2009/2010.

Þá var gengið til dagskrár.

• 1. Skýrsla sveitarstjóra. a) Borist hefur minnisblað vegna launasamninga skólastjóra og aðstoðarskólastjóra þar sem fram eru settar hugmyndir um launakröfur nýrra stjórnenda skólans. Samþykkt er að ganga til samninga við skólastjórnendur en bjóða einum launaflokk minna en farið er fram á. b) Borist hefur meðfylgjandi svar frá Óla E. Björnssyni vegna endurútgáfu á Hólmavíkurbókinni. Í samtali við undirritaða kom fram að búið er að leggja niður Ísafoldarprentsmiðju fyrir allmörgum árum og týndust þá 500 prentuð eintök sem ekki var búið að binda inn. Samþykkt er að endurútgefa bókina verði kostnaður viðráðanlegur. c) Eigendur Hafnarbrautar 17 gera gagntilboð við tilboði sveitarstjórnar vegna kaupa á eignarlóð þeirra að Hafnarbraut 17 og samþykkt samhljóða að gera gagntilboð í samræmi við umræður.
• 2. Ársreikningur Strandabyggðar árið 2009, seinni umræða. Eftir nokkrar umræður þar sem farið var yfir helstu kennitölur lagði oddviti reikninginn til samþykktar og var hann samþykktur samhljóða.
• 3. Erindi frá stjórn Byggðasafns Húnvetninga og Strandamanna. Borist hefur erindi frá stjórn Byggðasafns Húnvetninga og Strandamanna dags. 17. maí 2010 þar sem lagðar eru fram af stjórn safnsins nokkrar tillögur um framtíðarskipulag safnsins. Samþykkt er samhljóða að halda fyrri samþykkt sveitarstjórnar um að segja sig frá rekstri safnsins og tekur hún því ekki afstöðu til tillagna stjórnarinnar.
• 4. Beiðni frá íbúum Hafnarbrautar 18 og 20 um að Fiskislóð verði lokuð fyrir umferð. Borist hefur erindi frá íbúum Hafnarbrautar 18 og 20 þar sem farið er þess á leit að Fiskislóð verði lokuð fyrir umferð vegna rykmengunnar. Samþykkt er samhljóða að hafna erindinu en leita frekar leiða til að rykbinda betur göturnar og þau svæði sem að þeim liggja með salti.
• 5. Fundargerð Byggingar-, umferðar- og skipulagsnefndar Strandabyggðar dags. 27. maí 2010. Lögð er fram til samþykktar fundargerð Byggingar-, umferðar- og skipulagsnefndar Strandabyggðar frá 27. maí 2010. Sveitarstjórn vill láta bóka eftirfarandi: „Fyrir fundinum lá greinargerð, umhverfisskýrsla, sveitarfélagsuppdráttur og þéttbýlisuppdráttur Aðalskipulags Strandabyggðar 2010 - 2022. Einnig lá fyrir fundinum fundargerð byggingar-, umferðar- og skipulagsnefndar frá 27. maí 2010. Byggingar-, umferðar- og skipulagsnefnd leggur til að auglýst verði tillaga að aðalskipulagi sveitarfélagsins fyrir 2010-2022, sbr. 18. gr. skipulagslaga nr. 73/1997. Sveitarstjórn ræddi fyrirliggjandi gögn og samþykkti að auglýsa skipulagið." Fundargerðin er samþykkt með eftirfarandi breytingum: Að lið 5 um umsókn um lóð í landi Stóru-Grundar verði breytt og gerður verði lóðarsamningur við umsækjanda, að lið b) undir liðnum önnur mál verði breytt á þann veg að samþykkja að heimila bil milli gáma í u.þ.b. 60 cm. og að lið nr. f undir liðnum önnur mál verði hafnað.
• 6. Erindi frá Sjávarútvegs- og Landbúnaðarráðuneytinu vegna byggðakvóta Strandabyggðar fiskveiðiárið 2009/2010. Borist hefur bréf frá Sjávarútvegs- og Landbúnaðarráðuneytinu dags. 28. maí 2010 vegna byggðakvóta Strandabyggðar fiskveiðiárið 2009/2010 þar sem farið er þess á leit við sveitarstjórn að hún sendi inn nýjar tillögur um úthlutunarreglur fyrir byggðakvóta fiskveiðiársins 2009/2010 þar sem skipting kvótans verði 50% jöfn skipti milli hæfra umsækjenda og 50% eftir lönduðum afla. Már Ólafsson og Jón Stefánsson véku af fundi við afgreiðslu málsins. Samþykkt var samhljóða að verða við erindi ráðuneytisins og senda inn nýja tillögu til ráðuneytisins.

Oddviti þakkar sveitarstjórn gott og skemmtilegt samstarf á liðnum árum og óskar nýrri sveitarstjórn velfarnaðar á næsta kjörtímabili. Tóku allir fundarmenn undir þakkirnar. Fleira ekki tekið fyrir, fundargerð lesin upp og samþykkt. Fundi slitið kl. 18:10.
 

Þetta var gert:  Oddviti kynnti dagskrá fundarins í  7 töluliðum, sem var eftirfarandi:

• 1. Ársreikningur Strandabyggðar árið 2009, fyrri umræða.
• 2. Erindi frá skólastjóra og aðstoðarskólastjóra vegna hugmynda um nýtt hljóðkerfi.
• 3. Beiðni frá forstöðumanni Íþróttamiðstöðvar um kaup á töskuskápum.
• 4. Beiðni frá Stofnun Árna Magnússonar í íslenskum fræðum um fjárstuðning við úgáfu bókar um 100 örnefni vítt og breitt um landið.
• 5. Tillaga um kaup á eignarlóð að Hafnarbraut 17.
• 6. Fundargerð Menningarmálanefndar Strandabyggðar dags. 10. maí 2010.
• 7. Fundargerð Skólanefndar Grunn- og Tónskólans á Hólmavík dags. 18. maí 2010.

Þá var gengið til dagskrár.

• 1. Ársreikningur Strandabyggðar árið 2009, fyrri umræða. Kristján Jónasson endurskoðandi mætti á fundinn og fór yfir ársreikning Strandabyggðar. Farið var yfir rekstrarreikning sveitarfélagsins en rekstrartekjur námu tæpum 327 milljónum kr. og rekstrargjöld rétt rúmum 303 milljónum króna fyrir afskriftir í A-hluta en afskriftir námu tæpum 14 milljónum króna og því hagnaður af rekstri fyrir fjármunatekjur og fjármunagjöld tæpar 10 milljónir. Rekstrarniðustaðan eftir fjármunagjöld er neikvæð um rúmar 24 milljónir kr. Samkvæmt efnahagsreikningi nema eignir A-hluta rúmum 609 milljónir króna, þar af nema fastafjármunir tæpum 393 milljónum kr. en eigið fé nam tæpum 320 millj. kr. og langtímaskuldir tæpum 239 millj. kr. en ekki hefur verið tekið nýtt lán frá árinu 2005. Oddviti lagði til að vísa reikningum sveitarfélagsins til annarar umræðu og var það samþykkt samhljóða.
• 2. Erindi frá skólastjóra og aðstoðarskólastjóra vegna hugmynda um nýtt hljóðkerfi. Borist hefur erindi frá skólastjóra og aðstoðarskólastjóra þar sem greint er frá því að hljóðkerfi í eigu sveitarfélagsins sé orðið barns síns tíma og þörf á að nýrra og betra hljóðkerfi verði keypt. Er bent á að fjölmargir viðburðir eru ár hvert á vegum skólans sem og annarra aðila. Samþykkt var með fjórum greiddum atkvæðum að kaupa hljóðkerfi og taka lægra tilboði náist að fá kerfið afhent fyrir Hamingjudaga, en einn sat hjá.
• 3. Beiðni frá forstöðumanni Íþróttamiðstöðvar um kaup á töskuskápum. Borist hefur erindi frá forstöðumanni Íþróttamiðstöðvar um nauðsyn þess að settir verði upp fleiri töskuskápar í búningsklefum. Samþykkt er samhljóða að verða við erindinu.
• 4. Beiðni frá Stofnun Árna Magnússonar í íslenskum fræðum um fjárstuðning við úgáfu bókar um 100 örnefni vítt og breitt um landið. Borist hefur erindi frá Stofnun Árna Magnússonar í íslenskum fræðum þar sem leitað er eftir fjárstuðningi við úgáfu bókar um 100 örnefni vítt og breitt um landið. Samþykkt er samhljóða að hafna erindinu.
• 5. Tillaga um kaup á eignarlóð að Hafnarbraut 17. Gerð er tillaga um að keypt verði eignarlóðin að Hafnarbraut 17 og eigendum gert tilboð upp á 600.000 kr. Sveitarstjórn samþykkir tillöguna samhljóða.
• 6. Fundargerð Menningarmálanefndar Strandabyggðar dags. 10. maí 2010. Lögð er fram til samþykktar fundargerð Menningarmálanefndar Strandabyggðar frá 10. maí 2010. Fundargerðin er samþykkt samhljóða.
• 7. Fundargerð Skólanefndar Grunn- og Tónskólans á Hólmavík dags. 18. maí 2010. Lögð er fram til samþykktar fundargerð Skólanefndar Grunn- og Tónskólans á Hólmavík frá 18. maí 2010. Jón Gísli Jónsson vék af fundi. Fundargerðin er samþykkt samhljóða. Jón Gísli Jónsson kom inn á fundinn.

Fleira ekki tekið fyrir, fundargerð lesin upp og samþykkt.  Fundi slitið kl. 19:50.

Þetta var gert:  Oddviti leitaði afbrigða við boðaða dagskrá um að 12.  liðurinn yrði tekinn inn á dagskrá og var það samþykkt.  Oddviti kynnti þá dagskrá fundarins í  12 töluliðum, sem var eftirfarandi:

• 1. Erindi frá The Nauteyri project um kaup á jörðinni.
• 2. Tilkynning frá Skipulagsstofnun um töf á afgreiðslu á aðalskipulagi Strandabyggðar.
• 3. Erindi frá Safnaráði Íslands vegna byggðasafns Húnvetninga og Strandamanna að Reykjum.
• 4. Boð um þátttöku í stofnun Ólafsdalsfélagsins.
• 5. Beiðni um umsögn frá Sjávarútvegs- og Landbúnaðarráðuneytinu vegna takmarkana veiða með dragnót.
• 6. Beiðni um styrk til Golfklúbbs Hólmavíkur.
• 7. Beiðni frá SÁÁ um kaup á 100 álfum til styrktar ungu fólki.
• 8. Fundargerð Byggingar-, umferðar- og skipulagsnefndar dags. 14. apríl 2010 3. maí 2010 [ath. vefstjóra: hér á vefnum er leiðrétt villa í samþykktri fundargerð].
• 9. Fundargerð Leikskólanefndar Strandabyggðar dags. 4. maí 2010.
• 10. Fundargerð Skólanefndar Grunn- og Tónskólans á Hólmavík dags. 3. maí 2010.
• 11. Fundargerð Skólanefndar Grunn- og Tónskólans á Hólmavík dags. 6. maí 2010.
• 12. Erindi frá Ingibjörgu Sigurðardóttur dags. 6. maí 2010 um að fá á leigu jarðhæðina að Höfðagötu 3.

Þá var gengið til dagskrár.

• 1. Erindi frá The Nauteyri project um kaup á jörðinni. Borist hefur erindi frá The Nauteyri project þar sem lýst er yfir áhuga á að kaupa jörðina Nauteyri takist að fjármagna kaupin en tilboðið hljóðar upp á 30 milljónir kr. Er ætlunin að reka vistvæna ferðaþjónustu með náttúruvernd að leiðarljósi. Samþykkt er að fresta afgreiðslu málsins að svo stöddu.
  
• 2. Tilkynning frá Skipulagsstofnun um töf á afgreiðslu á Aðalskipulagi Strandabyggðar. Borist hefur tilkynning frá Skipulagsstofnun dags. 23. apríl 2010 þar sem tilkynnt er að tafir verði á afgreiðslu stofnunarinnar á Aðalskipulagi Strandabyggðar vegna mikils verkefnisálags. Lagt fram til kynningar.
  
• 3. Erindi frá Safnaráði Íslands vegna byggðasafns Húnvetninga og Strandamanna að Reykjum. Borist hefur erindi frá Safnaráði Íslands dags. 21. apríl 2010 þar sem hvatt er til að faglega verði staðið að öllum breytingum á eignarhaldi og rekstri Byggðasafns Húnvetninga og Strandamanna og haft samráð við Þjóðminjasafnið og Safnaráð, ætli sveitarfélagið að segja sig frá rekstrinum. Lagt fram til kynningar.
  
• 4. Boð um þátttöku í stofnun Ólafsdalsfélagsins. Borist hefur erindi frá Ólafsdalsfélaginu dags. 28. apríl 2010 þar sem Strandabyggð er boðið að gerast stofnaðili í sjálfseignarstofnuninni Ólafsdalsfélagið og greiði stofnfé kr. 100.000 en félagið var stofnað um uppbyggingu og varðveislu Ólafsdals í Dölum. Sveitarstjórn þakkar gott boð en samþykkt var samhljóða að hafna erindinu.
  
• 5. Beiðni um umsögn frá Sjávarútvegs- og Landbúnaðarráðuneytinu vegna takmarkana veiða með dragnót. Borist hefur erindi frá Sjávarútvegs- og Landbúnaðarráðuneytinu þar sem leitað er eftir umsögn sveitarfélagsins vegna fyrirhugaðra takmarkana veiða með dragnót. Oddviti greindi frá bréfi er honum barst frá Friðgeiri Höskuldssyni þar sem hann hvetur sveitarstjórn til að mótmæla fyrirhuguðum lokunum. Einnig greindi hann frá grein um hugsanlega skaðsemi dragnótaveiða sem birt var á vef Hafrannsóknarstofnunar en samkvæmt þeirri grein er ekki talin mikil skaðsemi af dragnótaveiðum. Samþykkt er samhljóða að gera ekki athugasemdir við lokun svæðisins fyrir dragnótaveiðum.
  
• 6. Beiðni um styrk til Golfklúbbs Hólmavíkur. Borist hefur beiðni frá Golfklúbbi Hólmavíkur um styrk vegna fjárfrekra framkvæmda sem fyrirhugað er að fara í nú í sumar en eftir er frágangur að innan í golfhúsinu og kaupa þarf sérstaka sláttuvél til að slá flatirnar. Samþykkt er samhljóða að veita styrk að fjárhæð kr. 100.000.
  
• 7. Beiðni frá SÁÁ um kaup á 100 álfum til styrktar ungu fólki. Borist hefur beiðni frá SÁÁ dags. 29. apríl 2010 þar sem farið er þess á leit að sveitarfélagið styrki ungt fólk í meðferð með kaupum á 100 álfum sem kosta 100.000 kr. Samþykkt var samhljóða að hafna erindinu.
  
• 8. Fundargerð Byggingar-, umferðar- og skipulagsnefndar dags. 14. apríl 2010 3. maí 2010 [ath. vefstjóra: hér á vefnum er leiðrétt villa í samþykktri fundargerð]. Lögð er fram til samþykktar fundargerð Byggingar-, umferðar- og skipulagsnefndar frá 14. apríl 2010 3. maí 2010 [ath. vefstjóra: hér á vefnum er leiðrétt villa í samþykktri fundargerð]. Fundargerðin er samþykkt samhljóða.
  
• 9. Fundargerð Leikskólanefndar Strandabyggðar dags. 4. maí 2010. Lögð er fram til samþykktar fundargerð Leikskólanefndar Strandabyggðar frá 4. maí 2010. Sveitarstjórn vill árétta að gætt sé þess að fyrirhuguð girðing verði samkvæmt samþykktum stöðlum. Fundargerðin er samþykkt samhljóða.
  
• 10. Fundargerð Skólanefndar Grunn- og Tónskólans á Hólmavík dags. 3. maí 2010. Lögð er fram til samþykktar fundargerð Skólanefndar Grunn- og Tónskólans á Hólmavík frá 3. maí 2010. Fundargerðin er samþykkt samhljóða.
  
• 11. Fundargerð Skólanefndar Grunn- og Tónskólans á Hólmavík dags. 6. maí 2010. Lögð er fram til samþykktar
  fundargerð Skólanefndar Grunn- og Tónskólans á Hólmavík frá 6. maí 2010. Varaoddviti, Rúna Stína Ásgrímsdóttir vill láta bóka eftirfarandi við afgreiðslu fundargerðar: „Ég vil fagna því sérstaklega að tveir mjög hæfir einstaklingar, sem báðir hafa aflað sér menntunar og starfsréttinda meðfram störfum sínum við Grunnskóla Hólmavíkur, hafa sótt um stöðu skólastjóra við skólann. Valið er erfitt en í ljósi afgerandi niðurstöðu skólanefndar greiði ég atkvæði með þessari fundargerð og niðurstöðu hennar." Fundargerðin er samþykkt samhljóða.
  
• 12. Erindi frá Ingibjörgu Sigurðardóttur dags. 6. maí 2010 um að fá á leigu jarðhæðina að Höfðagötu 3. Borist hefur erindi frá Ingibjörgu Sigurðardóttur frá 6. maí 2010 þar sem hún óskar að taka á leigu jarðhæðina að Höfðagötu 3 undir keramikverslun og verkstæði. Samþykkt var samhljóða að verða við erindinu.

Fleira ekki tekið fyrir, fundargerð lesin upp og samþykkt.  Fundi slitið kl. 18:20.

Þetta var gert:  Oddviti leitaði afbrigða við boðaða dagskrá um að 12. og 13. liðurinn yrðu teknir inn á dagskrá og var það samþykkt.  Oddviti kynnti þá dagskrá fundarins í  13 töluliðum, sem var eftirfarandi:

• 1. Skýrsla sveitarstjóra.
• 2. Erindi frá Victori Erni Victorssyni.
• 3. Beiðni frá Sýslumanninum á Hólmavík um umsögn um umsókn um rekstrarleyfi.
• 4. Erindi frá Sævari Benediktssyni og Elísabetu Pálsdóttur vegna uppsagnar á leigulóð í landi Strandabyggðar.
• 5. Erindi frá Magnúsi Gústafssyni og Röfn Friðriksdóttur vegna lóðarinnar að Hafnarbraut 17.
• 6. Fundargerð Menningarmálanefndar dags. 7. apríl 2010.
• 7. Fundargerð Skólanefndar Grunn- og Tónskólans á Hólmavík dags. 15. apríl 2010.
• 8. Fundargerð Byggingar-, umferðar- og skipulagsnefndar dags. 14. apríl 2010.
• 9. Fundargerð Menningarmálanefndar dags. 21. apríl 2010.
• 10. Fundargerð heilbrigðisnefndar Heilbrigðiseftirlits Vestfjarða dags. 16. apríl 2010.
• 11. Erindi frá stjórn Þróunarsetursins á Hólmavík dags. 21. apríl 2010.
• 12. Erindi frá Fjórðungssambandi Vestfjarða dags. 23. apríl 2010 um tillögur starfshóps vegna tilflutnings á málefnum fatlaðra frá ríki til sveitarfélaga.
• 13. Erindi frá Fjórðungssambandi Vestfjarða dags. 23. apríl 2010 um menningarsamning ríkis og sveitarfélaga fyrir árið 2010.

Þá var gengið til dagskrár.

• 1. Skýrsla sveitarstjóra. a) Greint er frá því í skýrslu sveitarstjóra að borist hefur tilboð frá Þjóðfræðistofu varðandi hugsanlega bók um skólahald á Hólmavík vegna 100 ára afmælis Grunnskólans. Hljóðar tilboðið upp á 5.066.445 kr. og er þá gert ráð fyrir gagnaöflun, úrvinnslu og skrif ásamt því að leggja til alla skrifstofuaðstöðu og tækja- og tölvubúnað. Sveitarstjórn telur ekki tímabært að fara í útgáfu bókarinnar sem stendur. b) Þá er greint frá því að Bjarni Ómar hefur verið að leita eftir tilboðum í hljóðkerfi þar sem núverandi kerfi er orðið afar lélegt og ræður ekki við stærri verkefni eins og berlega kom í ljós við uppsetningu á Grease. Þá hefur sveitarfélagið þurft að leigja hljóðkerfi þegar stærri viðburðir eru s.s. eins og Hamingjudagar og kostar slík leiga ásamt manni 350 þús. kr. í það minnsta. Lagði hann fram tvö tilboð í hljóðkerfi, það ódýrara getur sinnt þeim verkefnum s.s. bæjarhátíðinni ofl. en hann telur dýrara kerfið þó enn betri kost sem geti þar að auki skapað tekjur fyrir sveitarfélagið yrði það leigt út með manni. Sveitarstjórn vill athuga málið betur. c) Þá er sagt frá því að búið er að funda með forstöðumanni Íþróttamiðstöðvar um að sett verði upp sýningin "Stefnumót á Ströndum" í íþróttasalnum. Er áætlað að opna sýninguna 17. júní og hún standi fram yfir miðjan ágúst. Bannað verður að fara inn á skóm en þeir sem erfitt eiga, vegna aldurs eða veikinda, að verða við því geta fengið skóhlífar sem verða til staðar. Þá mun Upplýsingamiðstöðin verða flutt í Íþróttamiðstöðina þetta árið og hún samrekin að einhverju leyti með miðstöðinni en með umsjónarmanni. d) Þá er sagt frá því að sveitarstjóri fór í kynningarferð um Norðurland Vestra, Dalvík og Akureyri til að fræðast um hvernig þessi sveitarfélög hafa leyst sín á milli verkefni um málefni fatlaðra en stefnt er að því að sveitarfélög taki þann málaflokk alfarið að sér næstu áramót. Hafa Akureyri annars vegar og sveitarfélög í Skagafirði og Húnavatnssýslum hins vegar verið með samning við ríkið um rekstur þessa málaflokks í meira en tíu ár og því reynsla komin á ýmsar leiðir varðandi samvinnu. Húnvetningar og Skagfirðingar hafa t.d. leyst málin sín á milli með byggðasamlagi með dreifðri þjónustu sem hefur gefið mjög góða raun og góð samstaða og samvinna á milli þeirra sveitarfélaga sem að samlaginu standa. Hins vegar er þjónustan keypt af Akureyrarbæ og finnst minni sveitarfélögum það í lagi en Dalvík t.d. sem rekur félagsþjónustu finnst þetta fyrirkomulag afar slæmt og hefur ákveðið að sækja um að komast í byggðasamlag Skagfirðinga og Húnvetninga. Eftir að hafa kynnt sér málin telur undirrituð að farsælast sé það fyrirkomulag að rekið sé byggðasamlag með dreifðri þjónustu líkt og hjá Húnvetningum og Skagfirðingum og býður það upp á þann möguleika að byggja upp félagsþjónustu og skólaskrifstofu hér á svæðinu náist samvinna við nágrannasveitarfélögin um verkefnið. e) Að endingu er greint frá fundi sveitarstjóra með Kristjáni Haraldssyni og Sölva Sólbergssyni til að ræða við þá um Hveravíkina og möguleika á hitaveitu hér á Hólmavík. Var málið rætt vítt og breytt en fram kom í máli þeirra að eftir að hafa skoðað dæmið taldi Orkubúið að ekki væri arðsamt að koma slíkri veitu á fót þar sem ljóst væri að kostnaðurinn fyrir neytandann yrði síst minni en hann nú er en stefna þeirra er að taka þátt í svona framkvæmdum sé það hagstæðara fyrir neytandann. Sagðist Kristján vera tilbúinn að skoða málið með sveitarstjórn en þá þyrfti að byrja á því að láta óháða verkfræðistofu fara yfir málið og skoða kostnað frá upphafi til enda. Myndi Orkubúið greiða þá helmings þess kostnaðar og sveitarfélagið helming. Þá taldi Kristján að sá kostnaður við að koma lögninni um Hólmavík væri mun meiri en fram kemur í skýrslunni þar sem um er að ræða klappir og grýttan jarðveg sem og fá hús við hverja götu. Þá voru málefni Nauteyrar og Þiðriksvalla rædd lauslega og stefnt á að halda fund með landeigendum með m.a. hugsanlega virkjunarmöguleika í huga. Verða mál áfram skoðuð og haft samband við Ísor til að fá viðbóta upplýsingar varðandi hugsanlega hitaveitu.
• 2. Erindi frá Victori Erni Victorssyni. Borist hefur bréf frá Victori Erni Victorssyni dags. 6. apríl 2010 þar sem hann segir upp stöðu sinni sem skólastjóri við Grunn- og Tónskólann á Hólmavík. Þakkar hann öllum sem að skólastarfinu koma fyrir gott og ánægjulegt samstarf á starfstíma sínum. Sveitarstjórn þakkar Victori Erni Victorssyni fyrir vel unnin störf og gott samstarf á liðnum árum og óskar honum alls hins besta á nýjum starfsvettvangi.
• 3. Beiðni frá Sýslumanninum á Hólmavík um umsögn um umsókn um rekstrarleyfi. Borist hefur beiðni frá Sýslumanninum á Hólmavík dags. 17. mars 2010 um umsögn um umsókn um rekstrarleyfi vegna reksturs gististaðar að Snartartungu. Sveitarstjórn samþykkir fyrir sitt leyti umsóknina og hefur ekkert við hana að athuga.
• 4. Erindi frá Sævari Benediktssyni og Elísabetu Pálsdóttur vegna uppsagnar á leigulóð í landi Strandabyggðar. Borist hefur erindi frá Sævarai Benediktssyni og Elísabetu Pálsdóttur dags. 8. apríl 2010 vegna uppsagnar á leigulóð í landi Strandabyggðar. Fara þau þess á leit að fá skriflega útskýringu á ástæðu uppsagnarinnar og jafnframt óska þess að uppsögnin verði dregin til baka. Samþykkt var samhljóða að fela sveitarstjóra að svara erindinu.
• 5. Erindi frá Magnúsi Gústafssyni og Röfn Friðriksdóttur vegna lóðarinnar að Hafnarbraut 17. Borist hefur erindi frá Magnúsi Gústafssyni og Röfn Friðriksdóttur dags. 19. apríl 2010 þar sem þau fara þess á leit að sveitarfélagið kaupi eignarlóð þeirra að Hafnarbraut 17 semjist um verð. Sveitarstjórn samþykkir samhljóða að taka jákvætt í erindið og að byrjað verði að kanna verðmat lóðarinnar.
• 6. Fundargerð Menningarmálanefndar dags. 7. apríl 2010. Lögð er fram til samþykktar fundargerð Menningarmálanefndar frá 7. apríl 2010. Fundargerðin er samþykkt samhljóða.
• 7. Fundargerð Skólanefndar Grunn- og Tónskólans á Hólmavík dags. 15. apríl 2010. Lögð er fram til samþykktar fundargerð Skólanefndar Grunn- og Tónskólans á Hólmavík frá 15. apríl 2010. Fundargerðin er samþykkt samhljóða og aðstandendum sýningarinnar Grease óskað innilega til hamingju með sýninguna.
• 8. Fundargerð Byggingar-, umferðar- og skipulagsnefndar dags. 14. apríl 2010. Lögð er fram til samþykktar fundargerð Byggingar-, umferðar- og skipulagsnefndar dags. 14. apríl 2010. Fundargerðin er samþykkt samhljóða með fyrirvara um að þriðji liður verði skoðaður nánar.
• 9. Fundargerð Menningarmálanefndar dags. 21. apríl 2010. Lögð er fram til samþykktar fundargerð Menningarmálanefndar frá 21. apríl 2010. Fundargerðin er samþykkt samhljóða.
• 10. Fundargerð heilbrigðisnefndar Heilbrigðiseftirlits Vestfjarða dags. 16. apríl 2010. Borist hefur fundargerð heilbrigðisnefndar Heilbrigðiseftirlits Vestfjarða frá 16. apríl 2010. Lagt fram til kynningar.
• 11. Erindi frá stjórn Þróunarsetursins á Hólmavík dags. 21. apríl 2010. Borist hefur erindi frá stjórn Þróunarsetursins á Hólmavík frá 21. apríl 2010 þar sem lagt er til að efnt verði til sérstaks verkefnis yfir sumarmánuðina 2010 um að námsmenn og aðrir sem eru að vinna við náms- eða nýsköpunarverkefni, þróunar- eða rannsóknarverkefni, geti fengið endurgjaldslausa aðstöðu í Þróunarsetrinu. Er lagt til að Námsverið sem og lausar skrifstofur verði nýttar undir slíka starfsemi. Samþykkt var samhljóða að verða við erindinu.
• 12. Erindi frá Fjórðungssambandi Vestfjarða dags. 23. apríl 2010 um tillögur starfshóps vegna tilflutnings á málefnum fatlaðra frá ríki til sveitarfélaga. Borist hefur erindi frá Fjórðungssambandi Vestfjarða dags. 23. apríl 2010 um tillögur starfshóps vegna tilflutnings á málefnum fatlaðra frá ríki til sveitarfélaga. Lagt er til af starfshópi að unnið verði að því að byggja upp byggðasamlag með dreifðri þjónustu og samþykkir sveitarstjórn samhljóða tillögu starfshópsins.
• 13. Erindi frá Fjórðungssambandi Vestfjarða dags. 23. apríl 2010 um menningarsamning ríkis og sveitarfélaga fyrir árið 2010. Lagður er fram nýr menningarsamningur milli ríkis og sveitarfélaga á Vestfjörðum fyrir árið 2010. Helstu breytingar frá fyrra samningi eru þær að samningurinn gildir einungis í eitt ár, fjárframlög ríkis og sveitarfélaga lækka um 20% milli ára og fækkað er um tvo fulltrúa í menningarráði sem telur þá fimm fulltrúa í stað sjö. Samningurinn er samþykktur samhljóða.

Fleira ekki tekið fyrir, fundargerð lesin upp og samþykkt.  Fundi slitið kl. 18:45.