Fimmtudaginn 4. maí 2010 var haldinn fundur í leikskólanefnd Strandabyggðar. Fundurinn var haldinn á skrifstofu sveitarfélagsins og hófst hann kl 16:30.  Mætt voru Sigurður Marinó Þorvaldsson, María Mjöll Guðmundsdóttir, Sigurrós Þórðardóttir fulltrúi foreldra, Kristín Sigurrós Einarsdóttir, Hlíf Hrólfsdóttir fulltrúi starfsmanna og Guðrún Guðfinnsdóttir leikskólastjóri. Einnig sat fundinn Ásdís Leifsdóttir sveitarstjóri sem ritaði fundargerð.  Sigurður setti fundinn og stjórnaði honum en fyrir lá eftirfarandi dagskrá:

1. Erindi frá leikskólastjóra varðandi framkvæmdir á lóð.
2. Önnur mál.

Þá var gengið til dagskrár.

• 1. Erindi frá leikskólastjóra varðandi framkvæmdir á lóð. Guðrún Guðfinnsdóttir leikskólastjóri greindi frá innsendu erindi sínu varðandi ástand lóðarinnar kringum leikskólann. Að sögn Guðrúnar gerir tíðarfarið undanfarna vetur það að verkum að ástand lóðarinnar er óvenju slæmt, ekki síst brekkan. Rætt var um að girða brekkuna af til bráðabirgða meðan gróðurinn jafnar sig, en ljóst er að það þarf að sá í eða þökuleggja þau svæði sem verst eru farin. Sigurður Marinó greindi frá því að hann og Snorri Jónsson hefðu skoða girðinguna kringum leikskólann og telur Sigurður að með því að nota núverandi staura og girða tvær hliðar með vírneti yrði kostnaðurinn kringum 150-200 þúsund. Núverandi girðing er orðin fúin og léleg. Ítrekað hefur verið bent á slæmt ástand girðingarinnar í úttekt BSI í aðalskoðun leiksvæða. Hlíf minnti á að áfram þyrfti að vera opnanlegur hleri á girðingunni til að koma þar inn tækjum. Rætt var um að slétta yfir kartöflugarð í leikskólanum en að leikskólinn gæti i staðinn nýtt sér t.d. skólagarða við grunnskólann eða í kartöflugarð í Skeljavík.

•2.      Önnur mál. 

• a. Innheimtumál voru til umræðu á síðasta fundi og í framhaldi af því greindi Guðrún frá uppfærslu á foreldrahandbók þar sem kveðið er á um eftirfarandi: „Leikskólagjöld eru á gjalddaga 1. hvers mánaðar fyrir líðandi mánuð og eindagi í lok mánaðar. Dragist greiðsla í tvo mánuði fá foreldrar viðvörun um að missa pláss frá og með næstu mánaðarmótum berist ekki greiðsla eða um hana hafi verið samið á skrifstofu Strandabyggðar."
• b. Brögð eru að því að fólk vilji breyta vistunartíma með litlum fyrirvara þrátt fyrir að kveðið hafi verið á um að það sé aðeins leyfilegt kringum áramót og strax eftir sumarfrí. Því hafa verið útbúin eyðublöð þar sem sækja þarf skriflega um breyttan vistunartíma með hálfsmánaðarfyrirvara, og einnig er settur sá fyrirvari að bið getur skapast eftir lengdum vistunartíma ef ekki er nægilegt starfsfólk til staðar. Þetta verður kynnt í nýrri útgáfu foreldrahandbókar.
• c. Einnig var rætt um að mikið væri um að börn komi í leikskólann löngu eftir að vistunartími þeirra hefst á morgnana. Þetta veldur óþægindum, til að mynda varðandi matartíma og vettvangsferðir, og verður því tilkynnt til foreldra að sé barnið ekki komið klukkutíma eftir að vistunartími þess hefst sé ekki gert ráð fyrir því þann dag, t.d. er ekki beðið með gönguferðir eða hægt að treysta á að nægur matur sé til staðar. Verður bent á þetta í foreldrahandbók.
• d. Þá má geta þess að ákvæði barnaverndarlaga um tilkynningaskyldu hefur verið sett inn í foreldrahandbókina.
• e. Ásdís nefndi að ólíklegt væri að af yrði þeirri breytingu sem nefnd hefur verið að færa elstu leikskólabörnin upp í grunnskóla, það er að segja 5 ára börn, enda væri það öfugþróun miðað við það sem væri að gerast í öðrum sveitarfélögum.
• f. Nú eru fjögur leikskólabörn væntanleg í aðlögun í leikskólanum fram að sumarfríi og síðan fjögur fljótlega eftir sumarfrí. Þar með verður búið að taka inn öll börn sem eiga umsóknir og eru þetta einkum yngri börn en einnig börn sem eru að flytja á staðinn.

Fundargerð lesin upp og hún samþykkt.  Fleira ekki gert, fundi slitið kl. 17:20.

Guðrún Guðfinnsdóttir (sign)                         Kristín Sigurrós Einarsdóttir (sign)
María Mjöll Guðmundsdóttir (sign)                  Sigurrós Þórðardóttir  (sign)  

Hlíf Hrólfsdóttir (sign)                                   Sigurður Marinó Þorvaldsson (sign)

Ásdís Leifsdóttir (sign)

Fimmtudaginn 25. febrúar 2010 var haldinn fundur í leikskólanefnd Strandabyggðar. Fundurinn var haldinn á skrifstofu sveitarfélagsins og hófst hann kl 16:00.  Mætt voru Sigurður Marinó Þorvaldsson, Sigurrós Þórðardóttir fulltrúi foreldra, Hrafnhildur Þorsteinsdóttir varamaður, Hlíf Hrólfsdóttir fulltrúi starfsmanna og Guðrún Guðfinnsdóttir leikskólastjóri. Einnig sat fundinn Ásdís Leifsdóttir sveitarstjóri sem ritaði fundargerð.  Sigurður setti fundinn og stjórnaði honum en fyrir lá eftirfarandi dagskrá:

1. Starfsmannamál.
2. Önnur mál.

Þá var gengið til dagskrár.

• 1. Starfsmannamál. Guðrún ræddi um að nú stefnir í að það myndist biðlisti eftir leikskólaplássi en þegar eru komin tvö börn á lista og a.m.k. 6 til viðbótar sem eru orðin eins árs eða verða það á árinu. Gera þarf breytingar á deildunum til að geta tekið inn öll börnin og setja yngri börnin inn á deild þar sem þau eldri eru nú og öfugt. Telur leikskólastjóri það gerlegt að framkvæma þetta með aðstoð starfsmanna áhaldahúss og er stefnt að því að gera þessar breytingar eftir fjórar vikur og þarf að loka skólanum í þrjá daga vegna þeirra. Þá þarf að auglýsa lausar stöður á leikskólanum þar sem matráður leikskólans hættir nú um miðjan apríl sem og tveir starfsmenn í byrjun maí.
• 2. Önnur mál. Þar sem biðlisti er nú þarf að ítreka það við þá foreldra, sem taka lengra sumarfrí fyrir börn sín og greiða ekki fyrir þann tíma, þá fara þau börn að öllum líkindum á biðlista eftir sumarfrí. Þá þarf að gera foreldrum grein fyrir innheimtustefnu sveitarfélagsins og verða þær reglur settar inn í foreldrahandbók.

Fundargerð lesin upp og hún samþykkt.  Fleira ekki gert, fundi slitið kl. 17:20.

Guðrún Guðfinnsdóttir (sign)                         Hrafnhildur Þorsteinsdóttir (sign)
Hlíf Hrólfsdóttir (sign)                                   Sigurður Marinó Þorvaldsson (sign)

Sigurrós Þórðardóttir  (sign)                           Ásdís Leifsdóttir (sign)

Miðvikudaginn 5. ágúst 2009 var haldinn fundur í leikskólanefnd Strandabyggðar. Fundurinn var haldinn á skrifstofu sveitarfélagsins og hófst hann kl 16:00.  Mætt voru Sigurður Marinó Þorvaldsson, Hrafnhildur Þorsteinsdóttir varamaður, Hlíf Hrólfsdóttir fulltrúi starfsmanna og Guðrún Guðfinnsdóttir leikskólastjóri. Einnig sat fundinn Ásdís Leifsdóttir sveitarstjóri sem ritaði fundargerð.  Sigurður setti fundinn og stjórnaði honum.

1. Starfsmannamál.
2. Önnur mál.

Þá var gengið til dagskrár.

• 1. Starfsmannamál. Guðrún ræddi um hvaða stefna réði varðandi forgangsröðun á inntöku barna í leikskólann komi upp sú staða að ekki sé hægt að tæma biðlista. Voru fundarmenn sammála um að aldur barns ætti að vera ráðandi þáttur, þ.e. elstu börnin hefðu forgang. Séu börn jafn gömul þá ræður umsókn um leikskólapláss og er þá elsta umsóknin sem nýtur forgang. Þá var rætt um að enn vantaði a.m.k. starfsmann í heila stöðu miðað við barnagildi, jafnvel í eina og hálfa stöðu. Ræddi Guðrún um að þrjár umsóknir um starf hafi borist inn á hennar borð svo ekki verði erfitt að manna leikskólann í vetur.
• 2. Önnur mál. Borist hafa tvær umsóknir um leikskólapláss þar sem farið er þess á leit að fá vistun tvo eða þrjá daga í viku. Nefndin telur það ómögulegt að verða við þeirri beiðni þar sem það veldur erfiðleikum með mannaráðningar sem og að erfitt yrði fyrir börnin að aðlagast skólastarfinu. Að endingu lagði Guðrún fram drög að ársskipulagi fyrir starfsemi skólans og kynnti breytingu á matar- og kaffitímum.

Fundargerð lesin upp og hún samþykkt.  Fleira ekki gert, fundi slitið kl. 16:55.

Guðrún Guðfinnsdóttir (sign)                         Hrafnhildur Þorsteinsdóttir (sign)
Hlíf Hrólfsdóttir (sign)                                   Sigurður Marinó Þorvaldsson (sign)

Ásdís Leifsdóttir (sign)                                  

1. Erindi frá Viðari Guðmundssyni varðandi vistun.
2. Kynning á úttekt á leiktækjum leikskóla.
3. Önnur mál.

Þá var gengið til dagskrár.

1. Erindi frá Viðari Guðmundssyni varðandi vistun.
Viðar óskar eftir rökum fyrir því að ekki sé hægt að hafa vistunartíma barna í leikskólanum breytilegan eftir vikudögum. Sú ákvörðun var tekin í samhengi við einsetningu leikskólans á sínum tíma (í lok síðasta kjörtímabils) og voru helstu rök þau að mikill breytileiki í vistunartíma skapaði ringulreið fyrir leikskólastarfið og börnin sjálf. Einnig að þetta skapaði óhagræði varðandi nýtingu starfsmanna á ákveðnum tímum dagsins.

Ræddir voru kostir og gallar þess að bjóða upp á mismunandi vistunartíma eftir vikudögum. Kostirnir þykja m.a. þeir að bæta þjónustu við foreldra og að börnin fái ef til vill meiri tíma með foreldrum, þá daga sem fólk hefur verið að kaupa meiri vistunartíma en þörf er á vegna vinnu foreldranna. Þær Kolbrún og Hlíf telja þó mögulegt að hagræða þannig í skipulagningu á starfi leikskólans að þetta geti gengið upp. Verður þessi möguleiki þá í boði fyrir alla, en hingað til hafa verið gerðar undantekningar fyrir þau börn sem eiga um lengstan veg að fara.

Því leggur leikskólanefnd til að boðið verði upp á vistunartíma frá kl 8 eða 9 á morgnana til kl 12, 13, 14, 15 eða 16 á daginn (við bætist kl 13 og 15). Einnig að vistunartími geti verið breytilegur eftir vikudögum, en sá vistunartími sem kosinn er gildi að öllu jöfnu í heila önn, það er frá því að sumarfríi lýkur og til áramóta eða frá áramótum til upphafs sumarfrís. Hins vegar er áfram mjög mikilvægt að fólk haldi sig við þann vistunartíma sem greitt er fyrir hverju sinni.

2. Kynning á úttekt á leiktækjum leikskóla.
Kolbrún lagði fram gögn frá BSI á Íslandi, vegna úttektar á leikskólalóðinni sem gerð var 8. ágúst sl. Búið er að lagfæra flest af því sem var gefinn þriggja mánaða frestur til að laga. 

3. Önnur mál.
a. Rætt var um reynsluna af skólamáltíðum, sem hafa verið keyptar af Café Riis og er almenn ánægja með það fyrirkomulag.

b. Samkeppni um merki leikskólans er lokið og bárust þrjár tillögur eftir tvo höfunda í keppnina. Dómnefnd hefur hist og valið merki. Bréf hefur verið sent til vinningshafa sem hlýtur 70 þúsund króna verðlaun. Stefnt er að því að prenta merkið á skilti, sem verður afhjúpað á afmæli leikskólans 30. október.

Fundargerð lesin upp og hún samþykkt. Fleira ekki gert, fundi slitið kl. 17:58.

Hlíf Hrólfsdóttir (sign)                                 
Ingibjörg Emilsdóttir (sign)
Kristín Sigurrós Einarsdóttir (sign)              
Sigurður Marinó Þorvaldsson (sign)
Kolbrún Þorsteinsdóttir (sign)                                 

1. Hugmyndasamkeppni um merki Leikskólans Lækjarbrekku.
2. Önnur mál.

Þá var gengið til dagskrár.

1. Hugmyndasamkeppni um merki Leikskólans Lækjarbrekku.
Kolbrún greindi frá viðræðum sínum við sveitarstjóra um að hrinda af stað hugmyndasamkeppni um merki leikskólans, í tilefni af 20 ára afmæli hans þann 30. október. Lagði hún til að keppninni yrði þegar hrint í framkvæmd svo hægt væri að afhjúpa nýtt skilti á afmælinu. Rætt var um hvort merkið þyrfti að innihalda nafn leikskólans og ef til vill einkunnarorð leikskólans. Þá var rætt um hvort gera ætti kröfur um skil í tölvutæku formi, en það er talið geta dregið úr þátttöku. Nefndin var sammála um að koma þessu þegar í framkvæmd og leggur til að eftirfarandi verði skipaðir í dómnefnd um val á merkinu: Kolbrún Þorsteinsdóttir, Hafþór Ragnar Þórhallsson, Vala Friðriksdóttir, Sigríður Óladóttir og Viðar Guðmundsson.

Einnig er lagt til að veitt verði 50-100 þúsund króna verðlaun fyrir það merki sem valið verður. Kolbrúnu var falið að semja reglur og auglýsa keppnina í samráði við sveitarstjóra. Einnig komu upp hugmyndir um að láta prenta merkið t.d. á húfur, boli eða barmmerki og sveitarfélagið gæti t.d. gefið öllum leikskólabörnum húfur.

2. Önnur mál.
a. Kristín minnti á námsleið fyrir aðstoðarfólk á leikskólum sem VA bíður upp á. Einnig verður námskeiðið „Ráð við reiði" fyrir leik- og grunnskólakennara, sem Endurmenntun Háskóla Íslands bíður í fjarfundi en er á virkum degi frá 9-16, þann 16. október. Kristín ætlar að athuga hvort mögulegt sé að fá þetta námskeið hingað á laugardegi eða tvo eftirmiðdaga. Einnig óskaði hún eftir ábendingum frá starfsfólki leikskólans um áhugaverð námskeið sem Fræðslumiðstöðin gæti þá komið í kring. Fram kom að fimm af átta núverandi starfsmönnum leikskólans eru í fjarnámi af einhverju tagi.

b. Fram kom fyrirspurn um hvort útivera barna sem eru í leikskólanum til kl 14 hefði minnkað. Daglega er útivera þessara barna einu sinni fyrir hádegi og síðan er útivera í vali. Einnig er farið í vettvangsferð í þriðja hvert sinn í hópastarfi (hópastarf er tvisvar í viku). Þannig getur útiveran verið allt að þrisvar á dag. Börnin sem eru til fjögur fara alltaf út a.m.k. tvisvar á dag.

c. Rætt var um hvort það teldist ekki ósanngjarnt að börn búsett utan Hólmavíkur hefðu kost á að leikskólaplássi til kl 13 (og greiða til kl 13) en eftir einsetninguna verður að velja um pláss til kl 12, 14 eða 16 fyrir börn búsett á Hólmavík, og greiða samkvæmt því. Fram kom að þessar reglur voru settar á sínum tíma til að skapa festu í starfinu, en síðan gerð þessi undantekning vegna barna sem nýta skólaaksturinn. Leggur nefndin til að þetta verði skoðað og samræmt.

d. Einnig kom fram að Café Riis mun sjá um hádegismat fyrir leikskólann, en starfsmaður eldhúss mun sjá morgunmat og nónhressingu og að bera fram hádegismat, en starfa inn á deild þess á milli.

Fundargerð lesin upp og hún samþykkt.  Fleira ekki gert, fundi slitið kl. 18:18.

Vala Friðriksdóttir (sign)                              
María Mjöll Guðmundsdóttir (sign)
Kristín Sigurrós Einarsdóttir (sign)              
Sigurður Marinó Þorvaldsson (sign)
Kolbrún Þorsteinsdóttir (sign)                                 

1. Leikskólalóðin.
2. Önnur mál.

Þá var gengið til dagskrár.

1. Leikskólalóðin.
Kolbrún lagði fram nýja teikningu af leikskólalóðinni, sem hún ásamt Jóhanni L. Jónssyni og Sigurði Marinó Þorvaldssyni, hafði farið yfir. Þar er lagt til að sá hluti lóðarinnar sem nú er möl, verði steyptur, með gúmmímottum undir leiktækjum og graskantur verði breikkaður miðað við það sem nú er. Um er að ræða 185 fermetra svæði sem yrði steypt. Heildarkostnaður er gróflega áætlaður um tvær milljónir með allri vinnu. Ljóst er að nauðsynlegt er að steypa eða helluleggja kringum núverandi gúmmímottur.

Leikskólanefnd leggur til að farið verða í að finna mannskap í verkið og lögð verða áhersla á vandaða steypuvinnu. Fram kom uppástunga um að leggja rör fyrir heitt vatn undir steypuna, þannig að þau væru til staðar ef heitt vatn finnst á svæðinu.

2. Önnur mál.
Fram kom ábending um að skoðun á slökkvitækjum hefði ekki farið fram lengi. Kolbrún hefur komið beiðni um skoðun og kennslu á tækin til slökkviliðsstjóra.

Fundargerð lesin upp og hún samþykkt. Fleira ekki gert, fundi slitið kl. 16:35.

Vala Friðriksdóttir (sign)                              
Ásdís Leifsdóttir (sign)
María Mjöll Guðmundsdóttir (sign)             
Kristín Sigurrós Einarsdóttir (sign)
Kolbrún Þorsteinsdóttir (sign)                                  
Guðrún Guðfinnsdóttir (sign)
Sigurður Marinó Þorvaldsson (sign)

1. Tillaga að breytingu á skipulagsdögum.
2. Símenntunaráætlun.
3. Önnur mál.

Þá var gengið til dagskrár.

1. Fyrir liggur erindi frá leikskólastjóra dags. 6. febrúar, með tillögu að breytingum á starfsdögum og er lagt til að  tveir skipulagsdagar verði teknir strax eftir sumarlokun. Nefndin tekur vel í þessa skipulagsbreytingu og samþykkir hana.

2. Fyrir liggur erindi frá leikstjórastjóra dags. 1. febrúar 2008 þar sem lagt er til að öllum starfsmönnum sé gefinn kostur á að sækja tvö námskeið á ári, með það að markmiði að auka hæfni og ánægju starfsfólks. Nefndin tekur jákvætt í erindið og töluvert var rætt um hvort hægt væri að auka framboð námskeiða hér á staðnum og gegnum fjarfundabúnað. Einnig að ástæða væri til að gefa fólki kost á að sækja námskeið annars staðar á landinu, og hitta annað fólk í stéttinni. Stefnt er að því að auka námskeiðsþátttöku starfsmanna og skoða skal námskeiðsþátttöku hverju sinni. Einnig kom fram í umræðum að full ástæða er til að samræma vinnureglur um greiðslur dagpeninga og aksturskostnaðar milli stofnana sveitarfélagsins. Er sveitarstjórn hvött til að skoða þessi mál.

3. Önnur mál.
Hlíf spurðist fyrir um hlutverk leikskólanefndar, hvaða málefni hún ætti að taka fyrir o.sfrv. Ásdís sagði að ekki hefði verið gert skipunarbréf fyrir nefndina í upphafi núverandi kjörtímabils. Töluverð umræða spannst um þetta mál og fram kom að nefndarmönnum þótti ástæða til að funda oftar og hafa meira samstarf milli nefndarinnar og leikskólans um stefnumótun. Leikskólastjóri vill gjarnan hefja það starf hið fyrsta og mun afla upplýsinga.

Einnig spannst töluverð umræða um hversu mikil starfsmannaveltan væri í leikskólanum og hvað væri til ráða í þeim efnum. Víða er erfitt að fá leikskólakennara til starfa, ekki síst á Vestfjörðum. Fram kom að enginn trúnaðarmaður er í leíkskólanum. Verið er að auglýsa eftir starfsfólki í tvö störf og einnig þarf að ráða inn afleysingamanneskju. Eitt barn á biðlista eins og staðan er í dag. Loks var umræða um áframhaldandi vinnu við leikskólalóðina. Þetta verður skoðað á næstu vikum með áhaldahúsmönnum.

Fundargerð lesin upp og hún samþykkt.  Fleira ekki gert, fundi slitið kl. 18:50.

Vala Friðriksdóttir (sign)                           
Ásdís Leifsdóttir (sign)
María Mjöll Guðmundsdóttir (sign)             
Kristín Sigurrós Einarsdóttir (sign)
Kolbrún Þorsteinsdóttir (sign)                           
Hlíf Hrólfsdóttir (sign)
Sigurður Marinó Þorvaldsson (sign)