Rætt var um að ákveðið hefur verið að sameina Íþrótta- og tómstundanefnd og Menningarmálanefnd í einu og sömu nefndina og því er þetta síðasti fundur Íþrótta- og tómstundanefndar í þeirri mynd sem hún hefur verið.  Íþrótta- og tómstundanefnd styður þessa ákvörðun og telur að starf Menningar- og tómstundanefndar geti orðið hagstætt, árangursríkt og farsælt fyrir Strandabyggð. Skipað verður í nýja nefnd á sveitarstjórnarfundi þann 18. janúar n.k. Nefndarmenn þakka hvor öðrum samstarfið.

Rætt var um ráðningu tómstundafulltrúa í Strandabyggð í 70% starf. Nefndin fagnar ráðningunni og lýsir ánægju með þau fjölbreyttu og áhugaverðu verkefni sem hann mun sinna sem tengjast menningarmálum, tómstunda- og íþróttastarfi í sveitarfélaginu og hafa yfirumsjón með þeim málaflokkum. Nefndin hvetur íbúa til að snúa sér til tómstundafulltrúans með hugmyndir sem þeir kunna að hafa og vilja koma í framkvæmd.

1. Staðardagskrá 21 fyrir Strandabyggð - Útivist og lífstíll.

Nefndarmenn hafa kynnt sér Staðardagskrá 21 frá árinu 2007 og koma hér með ýmsar viðbætur. Okkur reyndist afar erfitt að afmarka viðfangsefnið Lífstíll og setjum því niður allt það sem var rætt þó að við gerum okkur grein fyrir að eitthvað tilheyri kannski öðrum málaflokkum.

Staðan:

Félag eldri borgara í Strandabyggð er virkur og góður félagsskapur. Handverk og föndur hefur verið ómissandi þáttur í þeirra starfi og eru þau með virkan gönguhóp sem gengur sér til heilsubótar. Á sumrin hafa svo eldri borgarar fjölmennt í ferðir á vegum félagsins og tekið þátt í Hamingjudögum með ýmsum hætti.

Leikvellir á Hólmavík hafa verið í lélegu ástandi og hefur lítið sem ekkert verið gert til þess að bæta úr því. Við Grunnskólann er gervigrasvöllur og hellur voru lagðar upp við skólann og hefur umhverfi skólans verið nýtt frekar mikið til útiiðkunar og býður upp á ýmsa möguleika. Hugmyndir hafa verið ræddar um útivistarsvæði eða útikennslustofu fyrir ofan skólann og farið var af stað með matjurtagarð ofan við skólann en starfið var ekki nógu árangursríkt þar sem ekki var neinn til að sjá um það.

Þátttaka fullorðinna í skipulögðum íþróttum er einhver en hefur farið minnkandi á undanförnum árum. Má helst nefna badminton, fótbolta og skíði. Nokkuð er um að menn stundi skokk og heilsubótargöngur. Gönguhópurinn Gunna fótalausa er virkur þar sem allir íbúar Strandabyggðar eru hvattir til að slást í för um umhverfi Strandabyggðar í hádeginu á þriðjudögum.

Geislinn hefur boðið upp á íþróttaæfingar í fótbolta, körfubolta, badminton og boðið upp á kynningu á ýmsum íþróttagreinum fyrir ungmenni á aldrinum 6-16 ára.

Skíðafélag Strandamanna hefur haldið skíðaæfingar á gönguskíðum yfir háveturinn.

Á Hólmavík er starfræktur golfklúbbur og er starfið þar blómlegt og vaxandi. Reistur var glæsilegur golfskáli í sjálfboðavinnu og hafa félagsmenn boðið upp á golfkynningu og leiðsögn í íþróttinni sem nýtist bæði ungum sem öldnum.

Heilsuklúbbar hafa verið starfandi þar sem fólk vinnur að bættu mataræði og aukinni hreyfingu. Hjúkrunarfræðingur Heilbrigðisstofnunarinnar hefur boðið upp á ráðgjöf og eftirfylgni.

Hestamennska stundið og reiðnámskeið hafa verið haldin hjá Strandahestum við Víðidalsá fyrir alla aldurshópa.

Skautasvell var útbúið og viðhaldið við Galdrasýninguna í sjálfboðavinnu einn veturinn. Einnig hefur Galdrasýningin boðið upp á bíósýningar fyrir yngri kynslóðina.

Leiklistarnámskeið hafa verið haldin á vegum Leikfélags Hólmavíkur fyrir unga sem aldna.

Ýmsir menningar- lista- og tómstundatengdir viðburðir eru haldnir í Grímeyjarhúsi, sem nú er kallað Skelin, í tengslum við fræði- og listamannadvöl í húsinu á vegum Þjóðfræðistofu á Ströndum. Þjóðfræðistofa hefur einnig staðið fyrir árlegu húmorsþingi sem hefur verið vel sótt af heimamönnum.

Grunnskólinn á Hólmavík flaggaði nú Grænfánanum í fyrsta sinn í vor. Grænfáninn er afhentur í tvö ár í senn en sú viðurkenning fæst endurnýjuð ef skólarnir halda áfram góðu starfi. Grænfáninn er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum. Skólinn vann ákveðin verkefni sem efla vitund nemenda, kennara og annarra starfsmanna skólans um umhverfismál. Verkefnin eru bæði til kennslu í bekk og til að bæta daglegan rekstur skóla. Þau auka þekkingu nemenda og skólafólks og styrkja grunn að því að tekin sé ábyrg afstaða og innleiddar raunhæfar aðgerðir í umhverfismálum skóla.

Grunnskólinn á Hólmavík tók þátt í verkefninu Göngum í skólann sem var átak í eina viku þar sem nemendur og starfsfólk gekk, hjólaði eða skokkaði á virkan til og frá skóla í eina viku. Endað var sameiginlegri gönguferð og heilbrigðum skemmtilegheitum.

Strandabyggð tók þátt í Vistvernd í verki sem er alþjóðlegt samfélagsverkefni sem leiðbeinir þátttakendum í leit þeirra að sjálfbærum lífsstíl og samfélagi. Boðið var upp á námskeiði Vistverndar í verki og þátttaka í visthópi sem er afar árangursrík leið til að taka upp vistvænni lífsstíl. Lögð er áhersla á einfaldar breytingar á lífsstíl og að þátttakendur velji aðgerðir og breytingar sem þeim finnst áhugaverðar. Þegar talað er um að verkefnið snúist um sjálfbæran lífsstíl er meðal annars vísað til þess að unnið er að betri nýtingu auðlinda og minni mengun en einnig til þess að, á sama tíma er horft til fjármála heimilisins, heilsu, vellíðan og virkri þátttöku í samfélaginu.

Í Sævangi og í nágrenni hans hefur farið fram margvíslegt starf sem kemur að útivist og lífstíl. Þar er stór íþróttavöllur og hefur HSS haldið sín héraðsmót þar. Einnig hefur Sauðfjársetur á Ströndum haldið hina ýmsu viðburði eins og gönguferðir, hreiðurgöngu um Orrustutanga þar sem merkt voru æðarhreiður og lífríki fjörunnar skoðað og fjörudag í samstarfi við ferðaþjónustuna á Kirkjubóli. Einnig má nefna furðuleikana sem er íþróttahátíð fyrir alla fjölskylduna þar sem keppt er í ýmsum furðugreinum, dráttavélahátíð og töðugjöld og Íslandsmeistaramót í hrútadómum.

Boðið hefur verið uppá bátsferðir og sjóstöng og einhverjir hafa stundað sjósund.

Þökur voru lagðar á völlinn í Brandskjólum.

Útbúinn var göngustígur út á Grundir.

Útbúið var kort af svæðinu, bæði sett á stórt skilti við komu inn í bæinn og á kort fyrir ferðamenn (dreifildi).

Haldið var námskeið fyrir starfsmenn stofnana og fyrirtækja um umhverfisvænni starfshætti.

Strandamenn fóru að flokka rusl og skila til endurvinnslu Sorpsamlagsins á Skeiði og kemur nú ruslabíll til að taka heimilissorp á hálfs mánaðar fresti í stað vikulega. Gefinn var út bæklingur til að upplýsa íbúa um endurvinnslu og leiðir við hana.

Stefna:

Íbúar og gestir séu hvattir til að nýta fallegt umhverfi í sveitarfélaginu til útivistar, sér til ánægju og heilsubótar. Sveitarfélagið verði þekkt fyrir góða aðstöðu til útivistar og heilbrigðan lífstíl íbúanna.

Verkefni:

Halda áfram framkvæmdum við Brandskjól.

Leikvellir sveitarfélagsins verði endurbættir, þannig að öryggi barna sé tryggt.

Göngustígar og gönguleiðir verði byggðar upp og haldið við og hugað sé að góðri lýsingu á þeim.

Merkja gönguleiðir vel og koma fyrir söguskiltum um leiðirnar og ýmis kennileiti.

Unnið sé markvisst í því að útbúa og skipuleggja útivistarsvæði fyrir ofan Grunnskólann.

Hugmynd um að merki sem vísar á gönguleiðina að minnismerki um Stefán frá Hvítadal, verði sett upp hjá söluskála.

Boðið verði upp á fjölbreyttari íþróttir og líkamsrækt fyrir alla aldurshópa t.d. leikjanámskeið, krakkasprikl, skauta, línuskauta, hjólabretti, hokkí og að farið verði í átaksverkefni sem stuðlar að því að fólk nýti betur þá frábæru aðstöðu sem við höfum með sundlaug og Íþróttamiðstöð.

Átak verði gert í að fá fólk til að drepa á bílum milli ferða.

Leggja okkur fram um að skoða möguleika á að að bæta gæði og þjónustu stranda og smábátahafna og stuðla að verndun umhverfis. Skoða verkefni í kringum Bláfánann en það er alþjóðlegt umhverfismerki sem hefur þann tilgang að stuðla að verndun umhverfis hafna og baðstranda. Bláfánann hljóta þeir einir sem leggja sig fram um Bláfáninn er tákn um að umhverfismál, öryggismál og umhverfisfræðslumál eru í hávegum höfð hjá handhöfum fánans.

Hvatt verði til þess að fólk gangi meira milli staða, t.d. börnin séu ekki keyrð í skólann ef veður er þokkalegt.

Hvatt verði til almennrar, daglegrar hreyfingar barna og íbúar sameinist í að kenna börnum útileiki.

Tekin verði upp vistvæn innkaup á vegum sveitarfélagsins.

Styðja við þáttöku Grunnskólans í Grænfánanum og stefna að því að Leikskólinn Lækjarbrekka taki þátt einnig þátt í Grænfánanum.

Unnið verði markvisst í því að fegra ásýnd bæjarins.

Tekið sé til á og við Skeiði þar sem komið er inn í bæinn.

Búið verði til þökulagt torg á svæðinu við Galdrasýninguna sem getur verið nokkurs konar hjarta bæjarins með fallegum blómum, bekkjum og t.d. útilistaverki Einars Hákonarsonar eða afsteypu af risaskjaldbökunni sem veiddist í Steingrímsfirði.

Að nýttar séu þær náttúruauðlindir sem Strandabyggð hefur upp á að bjóða.

Fegra og skipuleggja gámasvæði við smábátahöfn.

Fleira var ekki tekið fyrir. Fundi slitið kl. 18.45.

Vala Friðriksdóttir (sign)
Jón Trausti Guðlaugsson (sign)
Kristjana Eysteinsdóttir (sign)
Hildur Guðjónsdóttir (sign)

ATH: Fundargerðin var tekin fyrir á fundi sveitarstjórnar 18. janúar 2011

Eftirfarandi dagskrá lá fyrir fundinum:

1. Umræða um starf Íþrótta- og tómstundafulltrúa.

2. Staðardagskrá 21, liður Útivist og lífstíll.

3. Önnur mál.

1. Umræða um starf Íþrótta- og tómstundafulltrúa.

Á síðasta fundi var nefndin sammála um að til að bæta tómstunda-, íþrótta- og menningarstarf í Strandabyggð þyrfti að ráða fulltrúa sem heldur utan um slíkt starf fyrir allra aldurshópa. Nefndin skoraði á sveitarstjórn að ráða slíkan fulltrúa sem allra fyrst því að mati nefndarinnar yrði það lyftistöng fyrir allt tómstunda-, íþrótta og menningarstarf í bænum. Sveitarstjórn tók jákvætt í hugmynd um slíkan fulltrúa og beindi því til nefndarinnar að vinna hugmyndavinnu og tillögu um hugsanleg verkefni og verksvið slíks starfsmanns.

Síðan við funduðum síðast hefur Bjarni Ómar sagt starfi forstöðumanns félagsmiðstöðvarinnar Ozon lausu frá og með áramótum. Það starf var um 50 yfirvinnutímar á mánuði eða um 30-40% starf. Með það í huga finnst okkur afar mikilvægt að hraða ráðningarferli fulltrúans því það er okkur öllum, án efa, hjartans mál að starfsemi félagsmiðstöðvarinnar Ozon verði ekki skert heldur frekar elft til muna á sem fjölbreyttastan hátt.

Ekki þarf að fjölyrða um mikilvægi slíks fulltrúa fyrir sveitarfélagið ekki síst á þeim tímamótum sem þjóðfélagið okkar stendur frammi fyrir á krepputímum. Áður var þörf nú er nauðsyn. Við verðum að sinna íbúum Strandabyggðar vel, hlúa að félagsmálum, íþrótta- og tómstundastarfi og tryggja þessum málaflokki örugga stöðu í samfélaginu. Til þess þurfum við starfsmann í fulla stöðu sem fer með málin fyrir okkar hönd, leiðbeinir og leiðir starfið, hlustar á hugmyndir allra aldurshópa og ekki síst ber ábyrgð á koma hugmyndavinnu ýmissa nefnda sveitarfélagsins í framkvæmd t.d. íþrótta- og tómstundanefndar og menningarmálanefndar.

Hugmyndavinna okkar skilaði eftirtöldum hugmyndum um starf fulltrúans:

• Yfirumsjón með rekstri og framkvæmdum málaflokks 06 (sem er um 7-18% af rekstrargjöldum sveitafélaga).
• Yfirumsjón innrastarfs íþróttamannvirkja sveitafélagsins s.s. það sem fer fram innan íþróttahúss, sundlaugar og íþróttavalla.
• Yfirumsjón æskulýðsmannvirkja sveitafélagsins s.s. félagsmiðstöðva unga fólksins og eldri borgara og /eða félagsheimilisins.
• Yfirumsjón með vinnuskóla, skólagarða og sumarstarfs ungs fólks í sveitafélaginu.
• Skipulag og gerð samstarfs eða rekstrarsamninga við skóla, íþróttafélaga, deildir eða félög sem starfa á vettfangi frítímans, s.s. íþrótta- og leikjakólar/námskeið.
• Forstöðumaður félagsmiðstöðvarinnar Ozon.
• Framkvæmdastjórn hjá HSS og Geislanum.
• Unnið náið með félagsþjónustu sveitarfélagsins, en eins og kunnugt er færast málefni fatlaðra heim í hérað nú um áramótin.
• Skipulag og verkefnastjórnun í ýmsum málum sem til falla t.d. forvarnarmál, átaksverkefni, hátíðir og erlend samskipti svo sitthvað sé nefnt.
• Ráðgefandi við félög og félagasamtök sem nú þegar eru starfrækt í sveitarfélaginu s.s. Kvennakórinn, Félag eldri borgara, Golfklúbbinn, Lions og þess háttar.
• Einnig hefur verið nefnt að þessi fulltrúi gæti haldið utan um framkvæmd Hamingjudaga og einstakra menningarviðburða í sveitafélaginu ásamt því að vera tengiliður okkar út á við til að sækja um styrki og annað sem nýtist í starfi sveitafélagsins.

2. Umræðum um Staðardagskrá 21, Útivist og lífstíll frestað til næsta fundar.

Formaður sendir nefndarmönnum dagskrána í tölvupósti þannig að nefnarmenn geti undirbúið þá umræðu vel.

3. Ekki voru tekin fyrir fleiri mál.

Fundargerð lesin upp og samþykkt. Fundi slitið kl. 18.38.

Rósmundur Númason (sign)

Aðalbjörg Guðbrandsdóttir (sign)

Jón Trausti Guðlaugsson (sign)

Hildur Guðjónsdóttir (sign)

ATH: Fundargerðin var tekin fyrir á fundi sveitarstjórnar 02. nóvember 2010.

Eftirfarandi dagskrá lá fyrir fundinum:

• 1. Kosning formanns, varaformanns og ritara
• 2. Umræður um störf nefndarinnar
• 3. Önnur mál.

1. Kosning formanns, varaformanns og ritara.

Fram kom tillaga um að Hildur Guðjónsdóttir verði formaður, Kristjana Eysteinsdóttir varaformaður og Kristján Sigurðsson ritari. Það var samþykkt. Formaður tók við stjórn fundarins.

2. Umræður um störf nefndarinnar.

Síðasta Íþrótta- og tómstundanefnd samdi starfslýsingu nefndarinnar og var hún borin undir sveitarstjórn og samþykkt þar. Sú starfslýsing verður send nefndarmönnum um leið og hún finnst í gögnum sveitarstjórnar og verður rædd í nefndinni á næsta fundi.

Nokkrar umræður urðu um íþrótta- og tómstundastarf í bænum, sem að mörgu leyti er gott, en ávallt er þó hægt að bæta það. Sérstaklega þarf að huga að því auka fjölbreytni í tómstundum eldri borgara óháð kyni og líkamlegri getu. Í því sambandi er nauðsynlegt að auka starfshlutfall umsjónarmanns félagsstarfs aldraðra sem einungis er 15% nú. Nefndin er sammála um að til að bæta tómstundastarfið þurfi að ráða íþrótta- og tómstundafulltrúa sem heldur utan um tómstundastarf allra aldurshópa.  Þetta væri hlutastarf sem t.d. gæti hentað með umsjón félagsmiðstöðvarinnar OZON eða sem hluti af félagsþjónustu sveitarfélaga, en eins og kunnugt er færast málefni fatlaðra heim í hérað nú um áramótin. Nefndin skorar á sveitarstjórn að ráða íþrótta- og tómstundafulltrúa sem allra fyrst því að mati nefndarinnar yrði það lyftistöng fyrir allt tómstundastarf í bænum. Íþrótta- og tómstundafulltrúi gæti einnig komið að starfi með UMF Geislanum, HSS, kirkjunni og fleira mætti nefna.

3. Önnur mál.

Nokkrar umræður urðu um aðstöðu fyrir ýmsa starfsemi s.s. eins og braut fyrir línuskauta og aðstöðu fyrir skólahreysti. Einnig mætti bjóða upp á markvissa danskennslu, skátastarf og íþróttaskóla fyrir börn til að nefna nokkur dæmi. Nefndin er sammála um það að það þurfi að bjóða upp á fjölbreyttari afþreyingu fyrir íbúa Strandabyggðar og nýta enn betur þá frábæru aðstöðu sem t.a.m. er til staðar í Félagsheimili Hólmavíkur og Íþróttamiðstöðinni.

Ekki voru tekin fyrir fleiri mál. Fundargerð lesin upp og samþykkt. Fundi slitið kl. 21:20.

Vala Friðriksdóttir (sign)

Kristján Sigurðsson (sign)

Aðalbjörg Guðbrandsdóttir (sign)

Kristjana Eysteinsdóttir (sign)

Hildur Guðjónsdóttir (sign)

Fimmtudaginn 19. nóvember var haldinn fundur í íþrótta- og tómstundanefnd Strandabyggðar. Fundurinn var haldinn á skrifstofu sveitarfélagsins og hófst hann kl 20:00.  Mætt voru Kristján Sigurðsson, Ingibjörg Sigurðardóttir, Jóhann Áskell Gunnarsson og Ingibjörg Emilsdóttir sem einnig ritaði fundargerð.   Formaður setti fundinn og stjórnaði honum en fyrir lá eftirfarandi dagskrá: 

Fundarefni:       1.       Yfirlit ársins 2009.

• 2. Félagsstörf í Strandabyggð.
• 3. Önnur mál.

Þá var gengið til dagskrár.

1. Nefndin þakkar Val Hentze fyrir vel unnin störf en farið var m.a. á Unglingalandsmótið og smábæjarleikana á Blönduósi. Þá spilaði meistaraflokkur karla leiki í Reykjaskóla og Búðardal.  Þrír menn tóku þátt í Vasa göngunni á árinu en fleiri þátttakendur verða á næsta ári og er þeim öllum óskað góðs gengis.  Þá mun meistarflokkur Geislans í körfubolta taka þátt í Íslandsmóti í 2. deild í fyrsta sinn.
2. Félagsaðstaða hefur verið opnuð fyrir Félag eldri borgara og óskar nefndin öllum til hamingju með það.  Huga þarf að markvissara starfi fyrir þá sem eiga erfitt með að komast í þetta starf.  Þá er Bjarna Ómari þakkað fyrir vel unnin störf í þágu Félagsmiðstöðvar og Strandabyggð einnig fyrir að hlúa vel að starfinu á krepputímum.
3. Jóhann Áskell er fulltrúi Strandabyggðar í vali íþróttamanns ársins sem Lögreglan á Hólmavík stendur fyrir.  Þá er nánast búið að ganga frá þjálfunarmálum Geislans frá næstu áramótum.  Kristján mun tala við Ómar Pálsson vegna hliðarkarfa í íþróttahúsinu.  Þá vil nefndin árétta að Félag eldri borgara á þakkir skildar fyrir danskennslu unglinga í Grunnskólanum á Hólmavík.  Að endingu skorar íþrótta- og tómstundanefnd á Strandabyggð að draga ekki úr fjárframlögum í félagsstarf sem aldrei er nauðsynlegra en á þessum erfiðu tímum.  Strandabyggð á þakkir skildar fyrir góðan stuðning við þennan málaflokk á undanförnum árum.

Fleira ekki fyrirtekið.  Fundi slitið kl. 20:45

Kristján Sigurðsson                 Ingibjörg Sigurðardóttir                  Ingibjörg Emilsdóttir

       (sign)                                          (sign)                                             (sign)

Jóhann Áskell Gunnarsson                 

       (sign)                                                                   

Fundarefni:      

1. Uppgjör ársins 2008.
2. Barna- og unglingalandsmót árið 2010.
3. Önnur mál.

Þá var gengið til dagskrár.

Hliðarkörfur í íþróttahús:
Ingibjörg Emils. er búin að  tala við Ómar Pálsson varðandi hliðarkörfur í íþróttasal. Ómar tekur að sér að sansa festingar fyrir körfurnar. Leggur nefndin til að körfurnar verði keyptar.
 
Íþróttamaður Strandabyggðar:
Jóhann Áskell hefur rætt við Hannes Leifsson vegna vals á íþróttamanni Strandabyggðar. Hannes sendi bréf til sveitarstjórnar og óskaði eftir manni frá Strandabyggð og reglu varðandi val. Nefndin leggur til að Jóhann Áskell fari fyrir hönd Íþrótta- og tómstundaráðs. Einnig leggur nefndin til að Geislinn eða þjálfarar hans komi að valinu, sem og fulltrúar frá skiðafélaginu og golfklúbbnum. 

Unglingalandsmót:
Nefndin vill halda annan fund fljótlega og boða formann HSS til að fá fréttir af Unglingalandsmóti 2010.

Félagstarf: 
Rætt var um aðstöðu fyrir félagsstarf. T.d. mætti nota neðstu hæðina í Þróunarsetri og samnýta plássið fyrir grunnskólann og fjarnámsverið. Til eru húsgögn í Broddanesskóla, borð, stólar, sófar, hillur, leirtau og fleira.
 
Nefndin óskar Vasagönguförum góðrar ferðar og góðs gengis.

Fleira ekki fyrirtekið. Fundi slitið kl. 20:45.

Kristján Sigurðsson
Ingibjörg Sigurðardóttir
Ingibjörg Emilsdóttir
Jóhann Áskell Gunnarsson               

Fundarefni:      
1. Yfirlit síðustu mánaða.  
2. Önnur mál.

Þá var gengið til dagskrár.

Hliðarkörfur í íþróttahús:
Ingibjörg Emils. ætlar að tala aftur við Ómar Pálsson.

Íþróttamaður Strandabyggðar:
Jóhann Áskell er fulltrúi Strandabyggðar og mun hann einnig sjá um undirbúning fyrir hönd Strandabyggðar.

Körfuboltavöllur við skólann:
Kristján hefur kannað verð á velli með tveimur körfum kr. 1.500.000.- og leggur nefndin til að það verði skoðað vel, þar sem standi til að taka völlinn í gegn í sumar.

Skíðafélagið:
Rætt var um glæstan árangur og dugnað félaga Skíðafélagsins, farið var á t.d. Andrésar Andarleikana og fleiri mót með glæstum árangri. Til hamingju skíðaiðkendur.

Körfubolti:
Körfumótavertíð vetrarins varð dálítið snubbótt í vor, nokkur mót féllu niður, aðallega vegna þess að keppendur að sunnan komu ekki norður. Er það mat nefndarinnar að þrýsta þurfi á fleiri mót utan höfuðborgarsvæðisins.

Frjálsar íþróttir:
Guðjón Þórólfsson er kominn í 100 manna úrvalshóp Frjálsíþróttasambands Íslands. Til hamingju Guðjón.

Félagsstarf aldraðra:
Nefndin vill funda í ágúst um framtíð félagsstarfsins, t.d. húsnæði.

Sundlaugin:
Sveitastjóra falið að kanna hvað valdi því að enn vanti baksundsflögg, nauðsynlegt er að þau komi strax. Sundmót er framundan og því nauðsynlegt að koma þessu í stand.
 
Gervigrasvöllur við skólann:
Plastkúlur vantar í völlinn og er Kristján búinn að tala við Einar Indriðason og verður það unnið af vinnuskólanum.
 
Fótboltavöllur í Brandskjólum:
Meira efni vantar til að halda áfram með völlinn. Einnig þarf að flytja mörkin af Grundunum svo hægt sé að nota það sem komið er.

Samstarf skóla, tónskóla og leikfélagssins við uppsetningu Dýrana í Hálsaskógi frábært framtak.

Klára þarf göngu og hjólastíg út á Grundir.

Einu sinni var samþykkt að setja upp hjólabrettaramp, ekkert hefur gerst með þá framkvæmd.

Mótorkrossfélag Geislans:
Til hamingju með starfsemina.

Íþrótta- og tómstundafulltrúi:
Skorað á sveitastjórn að athuga með ráðningu á íþrótta- og tómstundafulltrúa, eins og rætt hefur verið áður.

Stefnt á næsta fund í ágúst.

Fundi slitið 18:45.

Kristján Sigurðsson               
Ingibjörg Sigurðardóttir                
Ingibjörg Emilsdóttir 
Þórólfur Guðjónsson

Fundarefni:        

1. Uppgjör síðasta árs.  
2. Önnur mál.

Þá var gengið til dagskrár.

1. Uppgjör síðasta árs. 
Nokkur mál hafa verið tekin fyrir hjá nefndinni og eru það m.a. komnar brautir í sundlaugina, en enn er eftir að setja niður baksundsflögg sem eru til staðar. Skotklukkur eru komnar sem og bekkir og þakkar nefndin Má Ólafssyni fyrir smíðina á bekkjunum. Þá er búið að þökuleggja fótboltavöllinn og fá allir þeir sem lögðu hönd á plóginn bestu þakkir fyrir. Enn vantar hliðarkörfur og íþrótta- og tómstundafulltrúa og er samþykkt að fela Ingu Emilsdóttur að panta körfur í samráði við smið. Einnig er samþykkt að bjóða fyrirtækjum að styrkja hliðarkörfukaupin og fá þau þá styrktarskjöld við körfuna. Þá er stefnt að því að skoða stöðu íþrótta- og tómstundarfulltrúa áfram.

2. Önnur mál. 
Stefnt er á að gera kosningu íþróttamanns Strandabyggðar að stórum viðburði og er Jóhann Áskell Gunnarsson tilnefndur sem fulltrúi Strandabyggðar í valnefndina og honum falið að koma tillögum nefndarinnar á framfæri.

Þá er öllum þeim er lögðu fram vinnu sína í Félagsheimilinu sem og þeim sem koma til með að leggja fram vinnu færðar bestu þakkir.

Að endingu er HSS þökkuð sú djörfung að sækja um að fá að halda landsmót hér 2010 og mun nefndin leggja sitt að mörkum til að gera mótið eins glæsilegt og mögulegt er. 

Þá skal því beint til íþróttafólks og þjálfara að fylgjast vel með styrkjum og sjóðum sem hægt er að sækja í til að draga úr kostnaði vegna móta o.fl.

Fundargerð lesin upp og hún samþykkt. Fleira ekki gert, fundi slitið kl. 20:35.

Kristján Sigurðsson                   
Ingibjörg Sigurðardóttir        
Ingibjörg Emilsdóttir
Jóhann Áskell Gunnarsson           
Ásdís Leifsdóttir