Félagsþjónustan og Rauði Krossinn auglýsa eftir umsóknum um aðstoð vegna matarinnkaupa um jólin.

Verið velkomin að hafa samband við Hildi Jakobínu Gísladóttur, félagsmálastjóra í síma 451- 3510 eða 842-2511.

Í Strandabyggð er fólk í jólaskapi og undirbúningur hátíðarinnar setur mikinn svip á mannlíf og menningu í sveitarfélaginu. Þar lætur yngsta kynslóðin ekki sitt eftir liggja. Nemendur í Grunnskólanum á Hólmavík, sem eru komnir í langþráð jólafrí, hafa haft nóg fyrir stafni undanfarnar vikur við hin ýmsu verkefni tengd jólunum. Litlu jól grunnskólans voru haldin með pompi og prakt á fimmtudaginn, en þar gaf að líta glæsilega dagskrá sem starfsmenn og nemendur tóku jafnan þátt í. Eftir dagskrána gekk fólk síðan í kringum jólatréð og jólasveinar kíktu á svæðið og útdeildu mandarínum úr poka. Um kvöldið var síðan fjörugt diskótek á vegum Félagsmiðstöðvarinnar Ozon fyrir alla nemendur grunnskólans.

Á leikskólanum Lækjarbrekku hefur einnig verið mikið líf og fjör á aðventunni. Þar hafa nemendur skreytt piparkökur, útbúið jólagjafir og kíkt í piparkökuboð á Café Riis með mömmu og pabba svo fátt eitt sé nefnt. Síðastliðinn föstudag var síðan haldið hið árlega jólaball leikskólans Lækjarbrekku. Þangað komu þeir Stekkjastaur og Giljagaur og glöddu (og grættu) börnin með allskonar ólátum og gjöfum úr Grýluhelli.
 
Nóg verður um að vera um jólin í Strandabyggð, en hér hægra megin á heimasíðunni má sjá atburðadagatal sem uppfært er reglulega.

Í desembermánuði setja margskonar ljósaseríur og jólaljós mikinn svip á Strandir. Í Strandabyggð eru hús og híbýli skreytt á margvíslegan máta og víða má sjá ljósum prýdd hús sem mikil vinna hefur verið lögð í að skreyta. Það var því ekki auðvelt verk sem elstu krakkarnir á leikskólanum Lækjarbrekku á Hólmavík stóðu frammi fyrir í morgun, en þau hafa það fyrir venju að velja best skreytta húsið á Hólmavík ár hvert. Í þessum tilgangi var farinn sérstakur skoðunarúntur um bæinn í morgun.

Eftir lýðræðislegar umræður komust börnin að niðurstöðu og bönkuðu upp á hjá Stellu Magnúsdóttur og Arijus Dirmeikis sem búa í húsinu að Vitabraut 21. Þar var húsfreyjunni afhent viðurkenning við hátíðlega athöfn.

Íbúar í Strandabyggð eru hvattir til að halda áfram að lýsa upp skammdegið með jólaljósum og seríum, jafnt úti sem inni, enda eru þau vel til þess fallin að hlýja hjörtum og búa til góða stemmningu fyrir jólahátíðinni sem nálgast óðfluga.

Í kvöld munu ungir söngfuglar í Strandabyggð láta til sín taka, en þá tekur barna- og unglingakór Hólmavíkurkirkju þátt í jóla- og fjölskyldutónleikum Regínu Óskar Óskarsdóttur. Stífar æfingar hafa staðið yfir undanfarið og öruggt má telja að íbúar í Strandabyggð verði ekki sviknir af framlagi okkar fólks í kvöld. Tónleikarnir fara fram í Hólmavíkurkirkju og hefjast kl. 20:00, en auk Strandamannanna ungu munu þau Haraldur Vignir spila á píanó og hljómborð, Matthías Stefánsson á gítar og fiðlu auk þess sem eiginmaður og dóttir Regínu koma fram.

Hægt er að nálgast miða á sölusíðunni www.midi.is og við innganginn, en miðaverð er kr. 2.900.- fyrir fullorðna, kr. 1.000.- fyrir 6-12 ára og ókeypis fyrir yngri en 6 ára. Stjórnandi barna- og unglingakórs Hólmavíkurkirkju er sr. Sigríður Óladóttir, en kórinn skipa ungmenni í 5.-10. bekk grunnskólans.

Félagsþjónustan og Rauði Krossinn auglýsa eftir umsóknum um aðstoð vegna matarinnkaupa um jólin.

Verið velkomin að hafa samband við Hildi Jakobínu Gísladóttur, félagsmálastjóra í síma 451- 3510 eða 842-2511.